الساعه 3 الفجر ..أنتهوا سلطان ونايف من سباقهم وبعدوا عن الدراجات وهم ينزلون الخوذه ومافيه أعلى من أصوات ضحكهم ..
وقف سلطان وهو يحرك يدينه في بعض من قوة البرد:اه مبطي والله مبطي عن هالشعور
نايف:اووووف حتى انا اشتقت والله
سلطان : جد الحمدلله على هالمتع البسيطه رغم انها خطيره بس شنسوي
نايف: حنا حذرين ان شاءالله لكن انت شفيك كانك بردان
سلطان: اخ بمووووت من البرد درجة الحراره 10 خل نرجع
ضحك نايف: الحمدلله اني متعود لكن امش معي البيت نشب ضوء ونكمل السمره هناك
شد سلطان جكيته:احيييه ودي ودي بس ماقدر برجع بيتنا
نايف:ههههههههههه يااااحلو براد نجد خل عنك
سلطان: امش امش خل عنك براد نجد لا اتفاهم معك
نايف :يلا
ركبوا السياره وفي طريق العوده للبيت
نايف:اقول الشاهين وينه ماعاد اشوفه معك
سلطان : اخذوه ربع لي يم الشرقيه وهاليومين حزة رجعته
"الشاهين"صقر سلطان
نايف: ايييه وانا احسبك بعته
سلطان: ههههههههااااي ابيع عمري ولا ابيعه صادق انت؟
نايف : ايييه هذا العشم بس على طاري الشرقيه ياحلوها ياخي
سلطان: انشهددد وتصدق بعد لو ماني من نجد تمنيت اني منها ياخي وساعة صدر وناس تفتح النفس ماشاءالله عليهم بس
نايف: اي والله صدقت وهذانا وصلنا
سلطان بضحك: اوووف مابغينا بنزل اتدفى ماش ماخذيت فيني خير ماغير الهواء لفحني
نايف : اخخخخ منك يامسلم
سلطان: اضحك معك ويلا نشوفك على خير
ابتسم نايف ومشى..
دخل سلطان بيتهم وشافه هادي ولا فيه الا صوت القران والكل نايم ابتسم وهو يدعي بنفسه ماتغيب عنهم هالالفه.. دخل المطبخ بيسوي له مشروب دافي اللي كان فعلا ماهر فيه الكرك
وقف وهو يطلع الاغراض اللي يحتاجها عشان يسوي له كرك وركبه على على النار وعلى بال ماجهز الصينيه جهز الكرك خذاه حطه وطلع لغرفته ..
تكى وصب له واخدته الهواجيس يفكر بصحة ابوه وخطبة جميله وغثاء فارس تعمق سلطان بالتفكير وقلب مزاجه وقام عليه القولون العصبي اللي كان يعاني منه سلطان ودايم يهزمه .. لكن على طول قام شرب مويه بارده لعله يهدى .. وارتاح شوي لكنه فز على اذان الفجر تنهد وهو يقول يارب أنا في وجهك
شغل انوار البيت ودار على كل الغرف يصحيهم
الين صحوا للصلاه
طلعت ام سلطان وشافته جالس بالصاله بعد ماتوضى :
سلطان يامك مانمت انت
سلطان: هلا بالغاليه لا والله يمه بصلي وارجع انام
ام سلطان: زين ولا عاد تسهر ترا السهر مرض
اشر سلطان على خشمه: ابشري على هالخشم
طلع أبو سلطان: سلطان يلا يابوك بنلحق الصلاه
سلطان: يلا يبه
واول ماطلعوا مع باب الشارع نزل سلطان بشته الشتوي وحطه على كتوف ابوه مع انه كان بيموت من البرد لكن صحة ابوه اهم..
ابو سلطان: ياولدي مامن برد بس البسه انت
سلطان: لا يبه خله عليك لابس من جوا انا
ابو سلطان: الله يرضى عليك ياولدي
سلطان: امين يارب
ودخلوا المسجد على اقامة الصلاه ..
بيت ابو فارس
صحت جميله على صوت فارس اللي قبل لا يطلع للصلاه وصى إن الفطور يكون جاهز عقب الصلاه
نوف: يمه فارس ذا زودهاااااا
جميله: ظريف جاي من بيته بيفطر هنا !
نوف: والله مايستحي قسم بالله الله يصبرني لا انفجر عليه ثم مابيردني احد وقتها
ام فارس: اقول اعقلي انتي وياها.
جميله: يمه زودها زودها بعدين الفطور بييت جدي
ام فارس: بس علينا
نوف : اخ الله يطولك ياروح
جميله: طيب يلا انا بسوي الخبز وانتي شوفيلك شي
نوف : اخ طيب
