بعد مرور اسبوع قرر ابو سلطان انه يجهز عشاء للعرسان وكفل مالك يتصل على راكان وابوه ويعزمههم مع كل الربع
بعد ماوصل اتصال العزيمه راكان وشاف ان مالك اصر انه يجي ويجيب العنود دخل بيته وهو معه مقاضي للاكل وهو طول هالاسبوع مقصر مع العنود ولا يذكرها الا عقب يوم او يومين
العنود :واخيراً ذكرت ان فيه انسان غيرك يحتاج اكل
راكان : عن الهرج الزايد وقومي اطبخي بسرعه
تنهدت العنود بضيق وقامت مسرعه للمطبخ تجهز الغداء لانها شوي وتموت من الجوع
بعد مرور نص ساعه طلعت العنود بالغداء وحطته بالحوش وطلع راكان على الريحه
راكان: ماشاءالله
جلست العنود تاكل بصمت وهو كالعاده يتحلطم
راكان : اجهزي المغرب بنروح لاهلك
تضايقت العنود : مابي اروح
راكان :اقول فكيني من صجة اخوك والقاك جاهزه
العنود : عاجبك وجهي وهو معلم بضربك ؟
مسك راكان يدها ولفها :ضربي على قولتك تستاهلينه ومكياجك وش فايدته اخفي فيه الاثار
سحبت يدها العنود: دامك مو قدها لا تعلمها على وجهي وكب الرخامه
قهرة راكان كلمتها وماحس بروحه الا وهو معطيه كف قوي حيل
تنهدت العنود وحطت يدها على خدها لفت عليه :والله ل يجي يوم تندم واذكرك
قام راكان من عندها وهو منغث لكن حس من نظرة عيونها بقوتها اللي هزته وشكلها وهي مبتسمه وتقول "كب الرخامه " طلع راكان وصفق الباب برجله مايدري ليش خاف
تنهدت العنود بضيق وقامت تشيل المواعين وتتجهز ..
قهوة العصر في بيت الجد وكانوا الكل مجتمعين
ابو سلطان: مالك يابوك علمت النسيب يجي للعشاء الليله
مالك: ايه يبه
الجد ناصر: الله يقويك يابو سلطان لكن ودنا نطلع بعد يومين ولا ثلاث نكشت الاجواء تخبرون زاينه
الهنوف: ايه ياجدي الديار مربعه
ابتسم عليها نايف وهو يسمع سوالفها..
سلطان: تم تم ابشر ياجدي
الجد ناصر : كفو يا راعي الشاهين
ابتسم سلطان : كفوك الطيب ياجدي
فارس : اجل نكفل سلطان مكان الوجهه
استغرب سلطان : ابد ابشربي يافارس
كانت جميله شوي وتشرق بالقهوه وش هالذرابه اللي نزلت عليه فجاءه
خبطت على رجلها نوف وعدلت جميله نقابها وسكتت..
رفع سلطان جواله ببتسامه وارسل لها : وش مسويه لاخوتس وش هالذرابه شكلي بموت
وصلت الرساله جميله رفعت عيونها عليه وابتسم سلطان : اص عني لا تفضحنا سو كنترول
سلطان: لا افضحك؟ وبسم الله نخطب
جميله: هييييه سلطانوه انتبه
نزل سلطان جواله: ودام الله جمعكم يالربع اليوم
انشدت اعصاب جميله وزادت نبضات قلبها مصدومه منه.
الجد ناصر : وش عندك ياسلطان
سلطان: ماش ياجدي بقول الله يحييكم على العشاء الليله
ضحك الجد : باذن الله والله يقويكم
تنهدت جميله براحه .. وابتسم سلطان وهو يناظرها متوتره وعيونها واضحه عصبت عليه ..
قام ابو سلطان وقاموا معه مالك وسلطان
ابو سلطان: نشوفكم الله ان شاءالله
ابو فارس: ان شاءالله
ومشوا طالعين من الحوش لبيتهم مد سلطان يده للهنوف وقامت معه حاوط كتفها ومشت معه ..
الهنوف :اخ بموت من الشوق للعنود
سلطان : كلنااااا والله مشتاقين لها
