العصر
بيت الجد ناصر
دخل سلطان ومعه مالك اللي شعور السعاده منعكس على وجهه ..
الجده نوره : هلا هلا بعيالي اللي ابطو عني
تقدموا كلهم يسلمون على راسها
سلطان: اخبارتس ياجده
الجده: بخير نحمدلله الله انتم اخباركم ياعيالي
ابتسم مالك: على ماتحبين
الجده : مبروك ماجاك ياولدي الله يجعله من مواليد السعاده ومن البارين فيكم
مالك : امييين امييين
دخل الجد ناصر الحوش وابتسم اول ما شاف عيال الليث متواجدين عندهم . قاعدين على فرش احمر وقهوة العصر بالنص بينهم ..جلسه بسيطه وحلوه
الجد : مااشاءالله عيال الليث عندنا
فز سلطان: عسى الله يرحمه وارحب ياجد
وخر مالك وجلس الجد بنص الجلسه...
سلطان: طمنا عنك ياجدي
الجد : والله حمدلله عايشين لكن تعرف وجع العظام وكبر السن
مالك وهو يهمز رجول جده : لا معليك معليك شباااب
ضحك الجد : ايييه بالحيل
شوي ودخل ابو فارس مع عياله .. لا شعورياً ابتسموا الكل
الجده : يالله حيهم ياهلا
جاء ابو فارس حب راسها وجلس بجنبها ..
قام سلطان يسلم على العيال
نايف : سلطانيييي
ضحك سلطان: هلا هلا يانايفي
نايف: ههههههههههههههههههههه لا لا مايلوق الا على اسمك
سلطان: باحلو اسمي
فارس :مبروك يامالك ماجاكم
مالك : الله يبارك فيك وعقبالك
الكل :امييين
تكى نايف على مركى سلطان وهو يتقهوى: اقول
سلطان بهمس : هاه
نايف : بركب الدباب يامسلم
سلطان: اوف والله اشتقت خلاص تم الليله
نايف : حي عينك ايه كفو وانتبه لا تنام
سلطان: ابد ازهل
قام مالك وفز معه سلطان
مالك : يالربع دام الله جمعكم اليوم حياكم الليله على عشاء بسيط بمناسبة جيت ولدي سلطان
ابتسم سلطان على كلام مالك : كفو يابو سلطان
الكل : على القوه
مالك : ياجده علمي الكل معك وحياكم
الجده: ابشر ياوليدي
وطلعوا مالك وسلطان متوجهين لبيتهم ..
سلطان: وش صار على عشاك
مالك : اخذت الذبيحة من الظهر و وديتها المطبخ يزبطها
سلطان: كفو
مالك : اسمع بنقوم الحين ننظف المشب
سلطان:ابشر
شوي ودخلوا بيتهم وبالمشب تحديداً
دخل سلطان واتجهه للشاهين وهو يرفعه على يده ..حي الله الشاهين
وقف مالك اول ما لمح صورة ابوه على الوجار .. مسكها وهو يمسح الغبار اللي عليها بالشماغ حقه ، عسى هالوجه بالجنه البارده
والله إن لك فقده يايبه اه يعجز كل شيء يملي مكانك
لف عليه سلطان وشافه منزل راسه على صوره ابوه .. نزل الطير وجاء وقف بجنبه وهو يخبط على كتفه : الله يرحمه وبغفر له
مالك : تمنيت يشوف اول حفيد
لف سلطان عنه بقهر: الله ينتقم من اللي كان السبب ياخوك
نزل الصوره مالك مكانه في محاولة تشتيت الموضوع: يلا يلا نظف
تقدم سلطان وهو يشيل عصى ابوه ويركزها بجنب الصوره كل التفاصيل اللي كانت تخص ابوه محتفظ فيها بقلبه قبل المكان ..
داخل الببت
في المجلس اللي جالسه فيه ريم .. البنات عندها ملتمين يلعبون ويتهاوشون مين يشيل سلطان الصغير فيهم .
الهنوف : ياربي باكله
العنود : نفطططه ياريم مدري وش هالعذاب اللي سببه لتس
ريم : تشوفين هالنقطه بغى يذبحني
ام سلطان: بسم الله عليتس يابنييتي
ريم : بعد قلبي ياخالتي
ام سلطان : امسكي دوتس هالعصيد اكلي منه يقوي عظمتس
ريم: لا لا ياخالتي ماحبه والله
ام سلطان: ماسالتس اكليه وبس هذا اكل النفاس لزوم تاكلينه
الهنوف وهي تمسح على ظهر البيبي : بنت اكلي ترا زين
العنود : ماتبين باكله انا
ريم: عطيها ياخالتي
ام سلطان: اقول عنودوه اسكتي ازين لتس
ريم : ياخالتي
وام سلطان واقفه فوق راسها تقنعها تاكل .. فجاءه قاطعهم دخول مالك : السلام عليكم
الهنوف : تعال تعال جابك الله
مالك : شفيتس
العنود :حرمك المصون مب راضيه تاكل هالعصيد
لف عليها مالك وابتسم وابتسمت ريم : والله مالومتس
ام سلطان: ولدددد
ضحك مالك : احممممم لا امزح يمه هاتي هاتي عنك
اخذ الصحن مالك و وخرت امه ،
مالك : يلا خذي بسم الله ولا اسمع اعتراض ً
ريم : يامالك
مالك : بنت خذي اقول
اخذت ريم الصحن وهي تتغصب تاكله .توجهه مالك وهو ياخذ ولده من الهنوف: هااتي هاتي حبيب ابوه
اخذه وجلس وهو يبوسه ويغني له ..
فجاءه صرخ مالك : يمه قلبي
ام سلطان: شفيك ياولد
رفع يده مالك وهو يوريهم إن ولده ماسك اصبعه الصغير بقوه : يمه قلبي راح
ريم : ياااااناس بسم الله عليكم
قامت الهنوف بجوالها : يمه عسووولين وش هالجمال ياخي
مالك : كفو خيتي صوره يلا
ضحكت ورفعت الجوال تصور اصبعه بيد ولده .. المنظر حنون جداً
الهنوف : يمه قلبي بسم الله عليكم
ضحك مالك ونزل راسه يبوس يد هالبيبي اللي اخذ عقله ..
العنود بهمس : يبدو اني وقتس راح ياريم
ريم بنفس الهمس : ماودتس تسكتين بس
