بيت ابو سلطان
فتح الباب وكان متلهف جداً على لقاء راشد خوي قلبه اللي دايما يكون بالمقام الاول بقلب سلطان قدره كبير وغالي حيل يقطع المسافات والطرق الطويله بين الديار بس عشان يكون معه و برفقته وقت حزنه قبل فرحه .. هذا الرفيق عزاءه بالدنيا
لف على فتحة الباب راشد وابتسم : هلا يا شاعري هلا
ابتسم سلطان من ابتسامته وحضنه : هلااااااا بالشرق واهله هلا ياهل قلبي
راشد : ياحظنا بالقلب وصاحبه والله
ابعد سلطان وهو يحب خشمه : اخبارك رشودي
راشد: الاخبار كلها عندك سلطاني
ضحك سلطان: اخييييييه اقلط اقلط حياك
دخل راشد
سلطان : المشب على يسارك بروح دقايق واجيك
راشد : الشاهين فيه ؟
سلطان: اييييه فييييه
فتح باب المشب راشد دخل يشغل النور ابتسم من شاف الشاهين على جنب الوجار .. تقدم رفعه على يده سحب برقع الطير عنه وابتسم حييي الشاهين حي
وجلس من عقبها والشاهين على الوكر قباله ..
دخل سلطان بالقهوه : حييي الله راشد
راشد : البقى ياحبيب اخوه
صب سلطان له فنجال قهوه :عطنا علومك
تكى راشد ونزل الفنجال: قبل لا اشرب فنجالك وش علمك انت سلطان لا تكابر على حزنك و جهك ونظرة عينك مهب عاجبتني والله
سلطان ارتخت نظرة عينه : راشد الحلم اللي كنت احلم به انتهى قبل لا يبدا الحُب اللي كبر بصدري الحين احرق جوفي ، فحوصاتنا ايجابيه ولا يقدر يتم هالزواج انا ماعندي مشكله بسالفة العيال لكن اعرف عمي وامها يبون احفاد يبون يفرحون بعيال بنتهم ! ياراشد قسم بالله من سمعت الخبر قبل امس وانا في حرب نفسيه مع ذاتي تعبت طول هاليومين وانا مدري القاءها من وجع قلبي ولا وجع القوولون . اظلمت الحياه بعيني والله كانه محلوف علي بالحزن والشقى طول عمري ! لي يومين طايح بالغرفه الكلام انحبس بصدري ولا لقيت من اقوله له ، غيرك انت جيت بالوقت المناسب
كب كل اللي بصدره على مسامع راشد اللي منتبه معه ومتاثر حيل من تاثر سلطان وكلامه وصوته اللي خانقته العبره
نزل راشد راسه بضيق :لاحول ولا قوة الا بالله ، خيره خيره وانا اخوك تاكد ان كل شيء يصيبك بالحياه خيره
سلطان: بس ياراشد
راشد : اسمعني زين ياسلطان الموضوع والله مو سهل واللي صار لكم اكيد خيره كونك تقول ماعندي مشكله بسالفة العيال هذي ممكن اول السنوات بينكم لكن بعدها ! وش بيصير قلبك بيتلهف على الضنى! وبيطير قلبك تبي لك ولد ولا بنيه عشان كذا خلاص ياخوي ماقدامك ولا حل والله بيعوضك باذن الله
سلطان: ياراشد يعز علي والله اني اكسر قلبها
راشد : ياخوي من قالك بتكسر قلبها انتم الاثنين المفروض تتفهمون الوضع والحاصل صدقني بترضا بالامر الواقع
سلطان: اه ياقلبي قسم بالله انها ضايقه فيني السبع الاراضي
راشد : الحمول الثقال مالها الا جملها ياسلطان
سلطان:وانا جملها وانا ولد ابوي
راشد: كفوووو هذا العشم
سلطان : بس ماقدر ماقدر اقول لها والله لو اموت ماقول
راشد : لا تقول هي بتفهم
سلطان: اخ والله تعبت
راشد : اصبر اصبر الوقت راح ينصفكم
تكى سلطان و رفع راسه للسقف :
