صباح اليوم الثاني - الشرقيه
جلست الجادل بعد ماعطت جدتها الأدويه زاوية الكنب سحبت البطانية على رجولها بالها مو معها حرفياً .
الجده : الجادل يابنيتي فيك شيء ؟
الجادل : لا ياجده ليه
الجده: مدري اشوفك مسرحه من البارح
الجادل : لا معليك ياجده لا تشغلين بالك افكر بس بطلبية عطور مابعد خلصتها
الجده : زين ياحبيبتي ولا تتعبين نفسك
الجادل : ابشري
تكت براسها على الكنب خايفه من الصدف اللي خلتها تشوف سلطان.. ماتدري وش هالمشاعر اللي داهمت صدره وضيقت خلقها تدري ومتاكده مليون مره إن قصتهم مُستحيله وإن حصلت كيف بتنسى إنه كان يحب وحده وكانت ملهمة شعره ! شهدت كل احزانه وحستها من قصايده ونبرة صوته
نجد العذيه - الفندق
صحى محمد من نومته البارح ومن عمق النوم اللي يحس بإنه نايم على طرف الغيم .. يوم يختلف عن باقي ايامه اللي عاشها من قبل صحى فيه على صوت العنود يسمعها بالصاله تكلم .. دخل بكل هدوء يغسل ويبدل ملابسه
عند العنود جالسه تكلم
العنود : ايه وانت وينك الحين
سلطان: والله شوفيني تو صاحي قلت اتطمن عليتس لا يكون محمد قبعها
ضحكت العنود : لا معلييييك اختك ذيبه خلاص
سلطان: اييييه خليتس شجاعه مثل مانتي ومثل ماعهدناك
العنود : ابشر وسلم لي على امي وهنوفه
سلطان: تامرين ويلا فمان الله
دخل محمد الصاله ببتسامه وهو يشوفها معطيته ظهرها وتلعب بشعرها: صباح الخير يالعنود
فزت العنود تعدل فستانها : صباح النور استا.... محمد
ضحك محمد : استاذ ! خااافي الله رجلك انا الحين
انحرجت العنود لانها للحين ماتخطت إنه كان مُحاميها : معليش بالغلط
محمد : ماعليك انتي كل اغلاطك بعيوني صواب
ابتسمت العنود بحُب من هالكلام المعسول اللي يرميه عليها وفي كل مره تتملكها نرجسيه !
محمد : افطرتي ولا باقي
العنود : لا
محمد : زين انا بطلع اجيبه
طلع محمد وهو شوي وينسكر فكه من كثرة الابتسامات.. وده يقعد طول الوقت ويتاملها بدون كلل او ملل
ضحكت العنود على نفسها .. و وقفت عند المرايا تعدل شكلها ببالها صورة زواجها الاول وزواجها ذا .. كيف الفرق والشتان بينهم
كيف انها نامت ذيك الليله والدمعه على خدها واليوم صحت والمشاعر الحلوه مغرقه قلبها .. ما توقعت ولا واحد بالميه إنها تعيش العوض اللي حاسه فيه مع محمد
شقة مالك
صحى على صراخ ولده ..
مالك : بسم اللله شفيكم !
ريم : مادري يامالك من صبح ربي يصيح حرارته مرتفعه ولا فاد الدواء
مالك : تستهبلين كان صحيتيني من اول طيب
ريم : ياخي قلت ممكن يفييد
مالك : قومي قومي البسي بنوديه المستشفى وهاتيه
اخذه مالك منها وقامت تلبس عباتها ..
جهزت ريم وطلعوا مسرعين للمستشفى..
بيت ابو سلطان
الهنوف : سلطان قوم الوقت راح
طلع سلطان من الغرفه وهو يحرك شعره بعشوائيه : صاحي من اول ترا انتي اللي الوقت راح
ضحكت الهنوف : صدق والله وينك طيب مانزلت
سلطان: اكلم العنود
الهنوف :الله و وش قالت
سلطان: والله ولا شيء وتسلم عليتس
الهنوف : ياعمري الله يسلمها
سلطان: امي وين!
الهنوف: افطرت ورجعت نامت
سلطان: ياعزي عنها شكلها تعبانه من عقب امس لكن انتي افطرتي
الهنوف : كانت خايفه على العنود حيل بصراحه
سلطان: اخت الشاعر دامها مع المحامي ماعليها خلاف
الهنوف : والله هذه الواضح
سلطان: الله يتمم عليهم يارب اسمعي يارب انتس مافطرتي
ضحكت الهنوف: لا
سلطان: كفووووو يلا تعالي المطبخ نطبخ سوا
الهنوف : الله تم تم واخر شيء بيكون كله علي وانت تسوي كرك وتطلع
سلطان: هههههههههههههه لو سمحتي لا تكشفين اوراقي
الهنوف : مشكلتي عارفتك
