بيت ابو فارس
نايف بنبرة تحمل الكثير من الغضب : يبه عاجبك ذا اللي سويته الحين
فارس : يبه لا تقول بعد اللي سمعته انك بتزوج جميله تركي ؟
انصدمت جميله الي كانت واقفه بينهم : تركييي !
ابو فارس بصراخ الجم كل الموجودين : اييييه تركي وانا ماعلي من تسجيل الصوت اللي سمعتوه وابو سلطان مات وشبع موت
نايف : يبه اخوك !
ابو فارس : اخوي تبروا مني عياله
نايف : بس انت اللي اجبرتهم يسون كذا يبه سلطان كلنا نعرفه مايرضى الظلم ولا يرضى الرجال الرخمه ياخذ وحده تقرب له بتقول عشانه كان يحبها بقولك لاااا يايبه لا سلطان ماعنده مشكله في زواج جميله عنده مشكله مع ذا اللي مايتسمى جاي يخطب وحده يحبها خوييه نعنبوه هالرخمه !
نوف : يبه بتثق في واحد غدر بخوييه!
ابو فارس : يااااااااااعالم الرجال ماغدر باحد جاي يخطب بعد ماتاكد ان خطبة سلطان ماتمت
فارس : يا يبه الله يرحم ثنين جابوك امنعنا تكفى محنا ناقصين
ابو فارس : اناااااا قلت كلمتي بعد اسبوعين الملكه والزواج بنفس اليوم
قال هالكلام ابو فارس ودخل غرفته بعد ماسكر الباب بكل قوته فز كل واحد فيهم وادرك ان الموضوع بيصير سوا رضوا ولا لا في هاللحظه رسميًا ادركت جميله ان حبها لسلطان انتهى و ادرك نايف انه مستحيل ياخذ الهنوف اوجعه قلبه على حاله وحال اخته طلعوا كل واحد لغرفته بعد ما اوجعهم مر الحقيقه ..
شقة فارس
دخل و رمى شماغه على الكنب و جلس بتنهيده ..
عبير : شصار
فارس : ماصار شيء ابوي راكب راسه ولا هو متنازل عن قراره
عبير : بس على قد اللي اعرفه ان تركي خوي سلطان الروح بالروح !
لف فارس لجهتها : ايييه هذي المصيبه اللي فجرت قلب سلطان الله ياخذ عقله وقوة القلب اللي عنده ياحمار كان خويك الروح بالروح تجازيه كذا !
عبير : وش سوا سلطان
فارس : طلع من عندنا بعد ما قال لابوي انسى ان عندك عيال اخ وانسو انتم ان عيال عمكم كبروا معكم وبينكم
عبير : اووووووف !!!! ياربي كذا الامور تعقدت حيل
فارس : اخ راسي صدع من كثر هالمشاكل
عبير : معليه معليه بتزين إن شاءاالله
فارس : الله يزينها
غرفة البنات - بيت ابو فارس
نوف : جميله وش بتسوين
جميله : وش اسوي يانوف حكم القوي على الضعيف
نوف : يعني وش راضيه ؟
جميله : اجل ابوي اخذ رايي حطني تحت الامر الواقع ولا فكر بقراري نهائياً
نوف : ياربي وش هالعارض
جميله : قبل كم يوم جاء عندي وطبطب على كتفي اخذني بحضنه يانوف فجاءه حسيت بالامان اللي فقدته من كنت صغيره واليوم جاي يسلب مني هالامان !
نوف : ياربي تكفى
جميله : قسم بالله الحياه بنظري ما عاد لها طعم صدق تعبت
قامت نوف بجنبها حضنتها ومسحت على كتفها : الله يجبر بقلبك و يزينها يارب
مسحت جميله دموعها وشدت عليها : امين امين امين
بيت ابو سلطان- المطبخ تحديداً
واقفه الهنوف تحرك السكر بكوب الشاهي سرحانه تفكر بالحال اللي وصلو له تتذكر الايام اللي كانوا عمها وابوها ما يرضون على يعض عيال عمها تعدهم اخوان واليوم والليله تحديداً تغير كل شيء البيوت نفسها والمسافه نفسها ما تغيرت لكن مسافة القلوب هالليله حالت بينهم تجهل هالشعور اللي سكن كل فرد بالعايله ..
العنود : هنوفه وين وصلتي ؟
تنهدت الهنوف و سحبت الكرسي جلست : والله ما وصلت مكان مشغلني حالنا هاليومين
العنود : قهرني عمي وقهرني خوي سلطان
الهنوف : عمي ماقدر اقول شيء لكن خوي سلطان!؟ للحين تعدينه خويه ! مافي خوي يرضى انه يحرق قلب خويه ! مافي والله وهذا طول عمره ماكان خوي
العنود : تكفين والله قاهرني حيييل
الهنوف : مالي عين بصراحه اسال سلطان جرحه وصلني
العنود :اخ الله يعينه يارب لكن هو وينه الحين
الهنوف: ادق ؟
العنود : احس ايه يلا
رفعت جوالها تدق على سلطان اللي طول ما رد و اخر شيء رد ..
الهنوف : سلطان
العنود : حطي سبيكر
سلطان: هلا ياتوامنا
تنحنحت الهنوف : سلطان وينك بتجي ؟
سلطان : لا ياقلبي انتم ناموا
العنود : وينك سلطان
سلطان: الشرقيه لا تسالوني كيف وصلت هنا لاني ما ادري
الهنوف بضحكه: قلبك دليييلك وصلك هناك
سلطان: اييييي والله يالهنوف انشهد
العنود : اقولك سلطان هنوف ودها بشيء
سلطان: يه تم وتبشر
العنود : ودها تسافر لندن
ضحك سلطان: ابشري ابشري لا تزوجت تروحين معي وكلكم
الهنوف : ياروحي ياسلطان
العنود : اضحك يا سلطان والله مافيه اغلى علينا من ضحكتك
ابتسم سلطان: وين اضيق وانا عندي انتم واسمعوا باخذ يومين هنا طمنوا امي
الهنوف : تم ابشر وانتبه لك
سلطان: يلا ودعناكم الله
سكر من عندهم و دخلوا ينامون بعد ما تطمنوا عليه ..
