بلابِل الجوى

٧

#بلابل_ الجوى

بقلمي ..#wared_wa

قرائة ممتعة ..💗

و أسولفك و أتصوّرك بين الأنفاس :
‏طفلة تذرّ أحلامها لـ العصافير ،

‏دسّيت بشفاي المشاعر عن الناس ،
‏أخاف لو فزّت / عصافيرك تطير !
.

.

.

جواهر

- بعد كلام امي تطمنت لان ادري فيها راح توقف معي وانا ماخاف دام هي بظهري

والحين يبي لي اجهز ملابس شتويه وبعد اجدد جواز السفر والاوراق وهالسوالف وارسلها

افكر واسمع صوت بكاء احمد تحت يبكي
قمت بإستعجال والف فكره وفكره

اخاف طاح ولا تعور من شي
لقيته بغرفه امي وابوي وواقف عند الادراج ويده محبوسه مثل ماتوقعت لازم يسوي شغب وبعدين من يتورط يصيح

- حميد ليه اللقافة اللي فيك متى تبطل تفتح بالادراج
اقولها وانا اطلع يده المحبوسه واشوف اصابعه الصغيره حمرا

رفع يده يبيني اشيله ويبكي منظره يحزن ماقدرت اتحمل وهو يستغل هالفرص يبي ينشال

خذيته بحضني وبوست اصابعه
- خلاص حبيبي راح الوجع
حط راسه على كتفي وحضنته بقوه وادور بيه من الحب

مشكلته مدلع كثير لان اول حفيد عندنا وامي ماتقصر فيه ماشاءالله

حاملته ورحنا  للصالة نتمشى انا وياه واشوف امه
منسدحة عالكنت وتتابع مسلسل بالتيلفزون
حسيت داخلي حرقه يعني مو معقول ماسمعت صوته يصيح

- انتي ام انتي؟
ناظرتني ببرود وهي تاكل الشبس
- ليه وش فيه؟
- الولد فوق جالس يصيح ماتسمعينه تراه ولدك انا وامي مو ملزومين فيه كثرك
- وش هالكلام خالته عالفاضي؟ وانا سامعه يصيح بس ادري فيه عندك

- لا والله ماكان عندي كان يلعب وتسكرت الادراج على اصابعه
- احسن عشان يتوب من لقافته
- لاحول ولا قوة الا بالله هذا قدامي كذا تقولين اجل وش تسوين فيه ببيتكم؟
- ياالام الحنونه مين يقرص بالولد ويضربه ويعضه وجاية تعلميني الامومه

قالت اخر كلامها ورفعت صوت التلفزون تنهي النقاش
رحت للحوش واشوف ابوي يسولف مع امي ويشربون قهوه
حطيت احمد بالارض وجلست بجنب ابوي

- يمه شوفي حل بنتك جالسة بالتيلفزون وولدها يصيح اصابعه انحبست بالدرج وهي سامعه وماتقوم تشوف وش فيه