بلابِل الجوى

١٩

#بلابل_ الجوى

بقلمي ..#wared_wa

قرائة ممتعة ..♥️

فمان الله يانبض المشاعر و أول الخلان
‏فمان الله يا أول من طلب قلبي ومديته...
.
.
.

احساس الخيبة تملكها من كلام ابوها
ماتوقعت كلمته اللي اثرت فيها وجرحت كرامتها ،  سمعت صوت خالها عند الباب
- يبه هجران افتحي

ماسمع منها رد وكرر ندائه
- هجران
تكلمت بنبره غضب ممزوجة بشهقات
- روح عني مابي اشوف احد

بندر: افتحي يابنيتي نتفاهم
ردت بصوت اعلى
- ماتفهم انت؟ قلت لك روح عني

بعدها اختفى صوته وكملت هي بكاها وحدها
- الله لايوفقهم واحد واحد ويحرق قلبهم مثل ماحرقو قلبي
والله اوويك يايبه ولا اسامحك طول عمري

..

ابو عبدالعزيز: ماعليك فيها ماتدري بلسانها انت
بندر : زودناها معها
ام عبدالعزيز: هي ماتعرف مصلحتها وين

بندر : هجران ماتجو بعد هالعمر تمشون معها بأسلوب الاجبار خلوها هي تقتنع باللي تبونه ماتجبروها
والله تخسرونها

ابو عبدالعزيز: حنّا امها وابوها الواجب عليها تطيعنا اثنينا نعرف مصلحتها وين
بندر : انا ادري يابو عبدالعزيز بس من هي صغيرة علمتوها الدلال وتمشي كلمتها عليكم
وتقولون بنتنا الوحيدة والبنت تستاهل الدلال ومن غلطت الحين تبون تقسون عليها والله حرام حتى على نفسيتها تتدمر مهما كانت مدللة بس هي قاروره والرسول عليه للصلاة والسلام قال استوصو بالنساء خيراً

انا معكم تبون تزوجوها وطن لان اعرف الرجال واعرف اخلاقه بس مو معكم على سالفة الاجبار والغصب خلها لين ماتقتنع هي من نفسها وتتقبله وانت ترتاح وهي ترتاح ولا اللي جالس يصير

ترا حتى لو تبيها تفهمك مستحيل تتفهمك بهالوقت هي صغيره عمرها ١٩سنه وقوفكم ضدها مايفرق معها

لان هي مقتنعه انها صح بسبب قسوتك عليها بسالفة طلال تعال بالعقل وافهم منها ليش تسوين كذي
وقتها هي بتحس بالذنب مو بالصراخ والاذية وقتها تشوف نفسها هي المظلومه وانت الظالم

سكت ثم اردف
- افهمني يا بندر اشوف بنيتي اللي دللتها واللي لو طلبت روحي عطيتها تخون ثقتي و تكلم رجال من وراي وانا ادري هو جالس يضحك عليها وش تبيني اسوي ؟
ابوس راسها ولا امدحها على هالتصرف

انت تدري فيني عندي هالمبدأ سوي اللي تبيه بس لاتخون الثقة لانها شي مقدس وهذا هو مين يخونها ؟ بنيتي ..
جلست بين نارين ولا ادري ويش اسوي واللي سويته معها لحظة غضب  وروحتي لابو طلال

بس اداري حرتي اخاف تنفضح بنيتي وانت تدري لو بس ولده تكلم عن بنيتي بالجماعة مايسكتون ياكلون لحمها