بلابِل الجوى

٢٦

#بلابل_ الجوى

بقلمي ..#wared_wa

قرائة ممتعة ..♥️

كِنت أكذّب،
‏كِنت أقول الجرح عادي
‏وكِنت أقول الكذب عادي
‏وكِنت أقول كثير
‏وإني بخير
‏لين أصبحت عادي.
.
.

هجران : تغيرت ملامح وجهها للحزن وبدت تسرد قصتها وجالسة تتعايش جروحها لليوم

- تمر سنه وانا ماحملت وسمعت بزوجته حامل
جا يبشرني واشوف فرحته وفرحت له

واحس داخلي مكسور والحريم بداو بكلامهم علي وماكانت تسكتهم الا ام فهد الله يرحمها

لكن الله ماتركني خايبه وحملت يوم زوجته كانت بالشهر الرابع

وفرحته صارت اضعاف وحملي كان صعب طلبت اروح لاهلي لكن مارضى وبقى عندي هو يساعدني

ومن ولدت زوجته سمعت انها ماخلته يشوف ولده وعاندت ، ورجع لي مكسور وواسيته مصيرها ترضى وانت راح تشوفه

كنت اشوفه مهموم امسح على راسه واقرا عليه واواسيه

وقالي
- تسامحيني لو وش ماسويت معك
وانا ادري هو يحبني ويخاف الله فيني ولا اتخيل بيوم يسوي سواه يجرحني فيها وعلى بالي بس هو سؤال عادي فتحه لجل نسولف فيه

وقلت له
- مسامح يابو وطن دنيا واخره
وعلى هذي سالفتنا جا اليوم الثاني يبشرني هي رضت وشاف ولده ويحكيني عنه شلون صغير

وانا اتلهف لليوم اللي يجي فيه ولدي واشوف سعادة ابوه

وجا اليوم والله رزقني بوطن ولدت الحمدلله ولادة سهلة ونورت حياتي بوجود وطن وابوه كان طاير فيه

رغم عنده عيال من فرحته حسيت هذا اول ولد له
وكملت حياتنا ولله الحمد ووطن كان يشبه ابوه بكل شي حتى بالشكل وتعلق بأبوه كمل ١٠ سنين وطن وتوفى فهد

بكينا وانكسرنا وجا يوم توازع الورث ونادانا اخو فهد الكبير وتجمعنا ومادريت الا ابو وطن مسجل كل شي يملكه لزوجته

وطلعت هي هذيك الايام مانعته من ولدها وشوفته الا من يسجل فلوسه كلها له وقتها تخليه يشوفه وهو سواها

مافكر فيني وبولده وين نروح وماورثت انا ووطن الا هذا البيت منه اللي سجله بأسمي

مادريت باللي سواه عشنا حياة صعبه انا وولدي حتى اخوانه مايزورونه وقاطعين فيه

بس الوحيد اللي يذكرنا اخو فهد الكبير يصير عم وطن ، حاول يساعدنا ووطن رفض اي مساعده منه وصار بين فترة وفتره يزورنا