بلابِل الجوى

٤٣

بلابل_ الجوى

بقلمي ..#wared_wa

قرائة ممتعة ..♥️

لا يطوِّل غيابك ثم آخذ عليه
‏لو تخلَّيت عنَّي عنك قلبي تخلَّى

‏العذر والتعلِّل والحكي ما نبيه
‏من تحرَّك فؤاده بالهوى ما تغلَّى

——

نزلنا من السيارة ودخلنا للبيت من الباب الخلفي
محد استقبلنا وسامعين اصوات الحريم بالصالة

دخلنا انا وخالتي وجود وكان بس العائلة فقط يعني قليلين ماهو مثل هذاك اليوم المجلس يجيب الكتمة من الزحمه

رحبو فينا ولا كأنهم عندهم مصيبة بدينا نسلم واشوف سحر وبجنبها نفس البنت اللي ضربتها بهذاك اليوم ودخلت مستشفى

جلست خالتي  بجنب مره اخوها تهون عليها المصيبة وانا جالسة واحسني غريبه ،، حتى البنت اللي تعرفت عليها هني ماهي موجوده

جود لقت صديقاتها وراحت وانا حتى جهازي مافيه،

ام وطن : ياخيتي تصبري وادعي ان شاء يجيك انتي توكلي على الله

ردت وهي تبكي
- والله ادعي ليل نهار ربي يرده سالم لي قليبي محروق ياام وطن مافيه احد يحس فيني مافيه

كسرت خاطري وهي تبكي، مع انه رجال كبير ومتزوج ولكن اللي يشوف حال امه يقول اكيد هذا اللي خاطفينه اكيد عمره ٦ سنين ماهو رجال كبير، لهالدرجة الضنا غالي عالام

طيب حتى امي ام ليه ماهي مثلها؟ ، ليه ماحبتني مثلها ليه مااحتوتني عالاقل حسستني بغلاي وحضنتي ولو كذب عالاقل يجي منها شي

جالسة ومهضومه من امي بقيت كل ام اشوفها اقارنها مع امي شلون هم حنونات وامي لا، هم يدعون لعيالهم وامي تدعي علي

ماتحملت وقمت من مكاني اغسل وجهي ، حسيت كتمتني العبره اخذت نفس عميق ونشفت نفسي

لقيت سحر واقفة

سحر: منورتنا

ابتسمت لها بغرور

- شكراً ، شايفتك جاية وراي شكلك اشتقتي لي من اخر مره

ضحكت ب استهزاء
- اي جداً مشتاقة ماتدرين راح اطير من شوقي

- لا خليك عالارض مانبيك تطيرين

قلتها ورجعت مكاني ، ومن فنجال لنفجال قهوه لين ماطلع الفجر وهم على نفس الجلسة والرجال للحين ماجابو خبر