بلابِل الجوى

٤٢

#بلابل_ الجوى

بقلمي ..#wared_wa

قرائة ممتعة ..♥️

كان اسمك بصوتي لحن و آتغناه
‏ومابيني وبيني يطول الحكي عنك
‏ٰ
‏عطيتك اللي .. كنت منك اتمنّاه
‏ولا أخذت ، الا على خاطري منك !

———-

بلحظة غباء مني خسرت الراحة اللي كنت عايشتها ، تمنيت اني عالاقل قلت له ويكون عنده علم بشكل سطحي كان عالاقل سيطرت على الوضع ولا صار خارج عن اديني

اكتفى  وطن بنظرات تعبر عن صدمته فيني
رمى الجوال بجنبه ونطق بكلمات حسيت حرارتها وصلت لقلبي واشتعلت جمرتها وخصوصاً نبره صوته ، اللي بسببها استحقرت نفسي

- تمثلين حبك علي ياهجران ؟ تشوفينه فيني
تعشقينه لان هو ماهو مشوه مثلي ، اصريتي علينا نتقرب وانتي قلبك عند غيري؟
ليه ياهجران؟ ، وش سويت لك وتسوينها فيني

كل كلام الحب تقولينه له وانا ولا كلمه حلوه سمعتها منك ، احبك غرقتي فيها عيونه ومسمعه وانا واحبك للحين ماقلتيها لي

تنهد وسكت ثم قام اخذ ثوبه
كان بيخرج بس مسكته دموعي تنزل بقهر واردفت

- والله حرام عليك ظلمتني

دفعني وهو مو طايق يسمع مني شي بقيت ابكي بالغرفه وهو خرج مادري وين راح بهالليل

الحين وش اللي يقنعه هذا ماضي ماخنته وانا زوجته ولا اسويها

جلست ابكي بضعف وقلة حيلة وطلع النهار وانا على نفس جلستي ونفس بكاي ووطن ماجا

قمت للسرير وانا جسمي مكسر من الجلسة على الارض والشهقات لازمت صدري

اخذت الجوال واشوف وش شاف هو ولقيت دخل على الصور اللي رسلها طلال فيها محادثاتنا القديمه

بعد هذيك اللحظة وطن تغير الحب والحنان اللي تعودت عليه راح

تعرفون شعور من شخص يتعود عالاهتمام وفجأة هالاهتمام يختفي ، هذا اللي اعيشه الحين صراع
نفسي

بدأ معاي اسوأ حرب نفسيه واللي هي التجاهل

بيومها ماغفيت بقيت ماسكة جهازي ابيه يدق
يقولي مشتاق لك يسأل عني ويسولف لي وش سوا

لكن ماجاني اي اتصال ، دخلت خالتي تصحيني لجل اصلي الظهر وتفاجأت من حالي

الدموع كل ماتنشف عن وجهي تنزل بدالها دموع جديدة

ام وطن : هجران يمه وش فيك تصيحين؟
هجران :وطن ياخالة