حفار القبور💀مكتملة💀

💀الجزء 25💀

💀ﺣﻔﺎﺭ ﺍﻟﻘﺒﻮﺭ💀
🔰El Yakut
  ▫Part 25

بدا العفريت كيشوف فيهم بجوج.. عاد طلق فاطمة لي طاحت نيشان فالارض كتكحب و مشا فحالاتو للبعيد.مخلي خليل كيشرب ففاطمة الماء و يضرب ليها على ضهرها حيت شرگ ليها..

بعد ما مشا العفريت مخلي العجاج شافت فاطمة فخليل و تلاحت عليه كتبكي و تمسح خناينها شادينها لغدايد...حتى من الجمال لي كانو عندهم مابقاوش لقاوهم... مابقا ليهم هروب..
الهروب فحالتهم هادي هو انتحار..
فاطمة كتنحط: واااا عباااد الله واش أنا فينما مشيت يتبعني النحس... شنو غانعمل دابا فهاد لحريرة... غدا غايقتلني أخليل... غايقتلني.. اهى...اهئ
خليل بخوف كيحاول يسكتها: صافي دابا...شششش سكتي غانلقاو الحل... غي سكتي خليني نفكر....

بدات هي كتنخصص و حاطة راسها بين يديها أما هو فكيشوف قدامو و يمشط شعرو الطويل بيديه كيفكر.

دازت عليهم ساعة بحال عام... كلها و همو...حتى سمعو صوت ديال أقدام كيقربو منهم... ضارو كيشوفو فالمكان لي جاي منو الصوت بان ليهم راجل شيباني لابس طربوش كحل و ملابس طويلة و محزم من لوسط... لحيتو البيضة لي داير ليها الحنة من الوسط حتى حمارت عطاتو وقااار...
تم جاي عندهم كيددش على العكاز ديالو و جار وراه حصان خشبي كبير محمل فيه متاعو...

شاف فيهم بفضول: السلام عليكم
خليل: وعليكم السلام..
الراجل: مالكم أ وليدي شفتكم مهموومين و حزنانين.
فاطمة: جلس جلي أشريف تسمع قصتي اجلس.

مشا الراجل جاب الأرجيلة ديالو و جلس كيسمع لفاطمة بتمعن و يبخ... سمع قصتها مع العفريت...

الشيخ: اييه يا بينيتي فولة ما دير بيصار و فارس ما ينوض غبار... ماغاتقدوش عليه بجوجكم....
خليل: وشنو المعمول... الصبح مابقا ليه غي ساعات قلال.. أسي....
الشيخ: صالح... سميتي صالح...
فاطمة كتبكي بحرقة: سمع أسي صالح... ماعندكم ماديرو ليا هذا مكتوبي... حنا هنا من البارح كانقتاتو غي على التمر و نشربو الماء دالواحة... و عذبت معايا هاد السيد(كتشير لخليل بيديها) كان عندو هموم و زدتو همي... و دابا ايلا سمحتي خليني انا نموت و وخرجو نتا وياه من هاد الصحراء لعلى و عسى يلقا الطريق لي يخرج منها...الله يجازيك بالخير.
خليل تعصب كيشوف فيها: سممعيي مززيان... رجلي على رجليك.. مانتحرك من هنا حتى نديك معايا..

ناض الشيخ من بلاصتو توجه لداك الحصان الخشبي لي عندو و جبد من متاعو شوية ديال الخبز و اللبن عطاهم لفاطمة و خليل.

الشيخ صالح: هاكو أوليداتي كولو منو... و سكتو الجوع... و سمعي ابنيتي المكتاب مااامنو هروب...

بدات فاطمة كتاكل بينما خليل اعتاذر بحجة انه شبعان و كيدقق فالشيخ مزيان... و يشوف فداك الحصان لي مصنوع من الخشب مافهم منو والو.. جاه الشك لايكون هذا شي مسخ آخور يسدق خارج عليهم...
قاطع تأملاتو الشيخ: السوق حامي والدّْلاَّلْ رامي والشاري عْوْرْ... مالكم على هاد الحالة... أنا عندي ليكم الحل..

شافو فيه بجوج مصدومين كيتسناوه يكمل..
الشيخ: ولكن عندي شرط واحد... ايلا عتقتك ابنيتي خاصكم تمشيو معايا لبغداد عندي شي غراض تما... غاتعاونوني و تخدموني على حالتي لي انا فيها... كيما كاتشوفو..الصحيحة الغدارة..

كرز خليل على يديه معصب.. هو لي طول عمرو كان سيد و كلمتو عمرها طيح للارض غيولي على اخر يامو خادم..
نقزات فاطمة بانفعال: مايكون غي خاطرك اايلا عتقتيني غاتلقاني مستعدة نخدمك..

دار الشيخ يشوف فخليل و كيتسنا جوابو... هاد الاخير لي هز راسو بموافقة..