حفار القبور💀مكتملة💀

💀الجزء 26💀

💀ﺣﻔﺎﺭ ﺍﻟﻘﺒﻮﺭ💀
🔰El Yakut
  ▫Part 26

دازو عليهم ساعات و هوما جالسين كيتسناو المصير ديالهم... خليل بدا كيديه النعاس... اما فاطمة فكانت شوية و ماتسطى كتمشي و تجي و تعض فضفارها بارتباك... بينما الشيخ صالح كان فسااابع نومة ماخايف من والو...
فاش حل خليل عينيه بانت ليه فاطمة بعدات شوية من حداهم و جالسة حدى الواحة طالقة رجليها كتمتع ببرودة الماء لي ماعمرها باقي غاتمتع بيها...
جلس حداها بهدوء...
خليل بصوت منخفض: زعما نتيقو فيه؟؟
فاطمة: ماعرفتش اخليل ولكن ايلا عتقني من هاد المصيبة راه نعطيه عينيا..ماشي غي نتيق فيه..
خليل: انا الحاجة الوحيدة لي مافهمتهاش هو كيفاش جا لهنا... واش راجل ضعيف بحالو غايتحمل الحرارة ديال هاد الصحراء... و زيدي عليها هاد الحصان الخشبي لي جايب معاه!!!

فهاد اللحظة قاطع الحديث ديالهم صوت ديال عاصفة مدوية كتعلن على قدوووم عفريـــــت الصحراء...
ناضو قافزين كيفيقو فالشيخ لي ناض مگلوب كيشوف فالعاصفة مافاهم والو.. عاد عرف بي العفريت جاي ليهم و ناض كيقاد حالتو...
بعد لحظات انتظار طويلة كانو فيها شادين فالجدوع ديال النخل حيت العاصفة قوية جا العفريت لي كان عملاق و غي الشوفة فيه كتخلعك...

العفريت: اليوم سالات مهلتك... اليوم نقسمك على جوج و نرضي روح ولدي المسكين...

ياله مد يديو باش يهزها غوت الشيخ بصوتو الجهوري: سمع أسي العفريت...
العفريت يغضب عارم: كيفاش كتتتجرأ و تقاطعني..
الشيخ: سمح ليا أسي العفريت ولكن أنا حيت عارفك كيعجبوك الحكايات قلت نعقد معاك صفقة... آش بان ليك؟
العفريت كيفكر: آشمن صفقة هادي؟؟
الشيخ: آش بان ليك نحكي ليك حكايتي و ايلا عجباتك سمح لهاد لولية و خليها ترجع سالمة غانمة...
العفريت: كتضحك عليا و لا؟؟ أنا اليوم غانقتلهااا...

مد يدو و شد فاطمة لي بقا ليها شبر للقبر... كاتدعي فخاطرها مولاها يغفر ليها و يتوب عليها...

الشيخ : و ايلا قلت ليك اسي العفريت بلي هاد الحصان راه مرتي؟
العفريت باستغراب : آشمن حصان؟؟
مشا الشيخ جاب الحصان الخشبي ديالو...
الشيخ: هادا اسيدي حصان خشبي... و هاد الحصان هو مرتي...
العفريت: همممم... عاود ليا قصتك نسمع.. ولكن ايلا ماعجبتنيش راه غانقتل هاد القتالة فالبلااصة... و نتبعك ليها...
الشيخ: متافقين وا سمع أسيدي العفريت قصتي الغريبة...

كان صالح واحد من آلاف التجار فمدينة بغداد... كان كيتاجر بالتوب و البهارات... جاب الارض من مشرقها و مغربها....
صالح كانت عندو مرأة آية فالجمال رزق منها بولد سماه جعفر...
كان عايش السعادة مع مرتو و كيبغيها و يحماق عليها... جا النهار لي قرر فيه يمشي لواحد الرحلة تجارية خاصو يدوز فيها شهرين عاد يرجع...
ودع مرتو وولدو و مشا مغامر وسط البحر و الامواج كيصارع باش يبقى على قيد الحياة... لحسن حظو تجارتو نجحات و الفضل تجاوز راس المال...
رجع بعد شهرين لبلادو محمل بالثروات و دخل لدارو فرحان... ولكن تصدم....
الكل حزنانين كيبكيو و ينحطو وسط قلب دارو... عائلة مرتو كلها مجموعة فقلب دارو و بلا خبارو...
بدا يسول فيهم على شنو وقع حتى قالو ليه الحاجة لي زلزلاتو... مرتو و ولدو تخطفو... و ماعرفوهم فين زادو... قلبو عليهم بالنهار و بالليل و لا بان ليهم الأثر..
جلس صويلح مسكين أيام و أيام و هو مريض و مفقوص على ولدو و مرتو محبوبة قلبو...
حتى جات عندو اخت مرتو لي كانت حتى هي عندها حقها فالزين... فتنات صالح و خلاتو ينسا مرتو الاولى و يقرر يتزوج بختها لي كانت كتجيب فيها شوية...
و نهار العرس كلشي كان فرحان... جابو البقرة باش يدبحوها و عيطو على صالح هو لي يقوم بالمهمة... بدات البقرة كتطيح الدموع و تتبحلس عليه و تتحكك بيدو حتى لان قلبو ليها و ماقدرش يدبحها...
ولكن جات العروسة و غضبات عليه... قالت ليه لامدبحتيش هاد البقرة مانا ليك ما انت ليا...
و فالأخير دبحها و شواوها و كلاوها...
الغد ليه قرر صالح يعطي الصدقة... مابان ليه غي العجل ولد البقرة لي دبح البارح و عطاه للخادم ديالو الوفي...
مشا الخادم داي معاه العجل للدار و كان عايش غي مع بنتو... غي دخل للدار و دخل معاه لعجل ناضت بنتو بالزربة لبسات نقابها و تغطات..
البنت: أويلي أ با شفتك مدخل علينا البراني للدار
الأب: اشمن براني ابنتي هادا راه العجل لي عطاني سيدي صالح اليوم...
البنت: واسير أبا لعند سيدك صالح قوليه هادا راه عزري ممسوخ ولى عجل...
مشا الخادم لغد ليه عند صالح هو و بنتو..
دخلو عليه للمجلس ديالو حانين الراس... لقاوه هو و مرتو جالسين..

صالح: مرحبا مرحبا... تفضلو و جلسو... آش حب الخاطر

البنت: سيدي صالح راه جبنا ليك العجل لي عطيتي لبا البارح... هادا راه عزري ممسوخ لعجل... و هاد العزري هو ولدك...(شافت فمرت صالح) وأنا عارفا شكون مسخو...

(♥ω♥ ) ~♪
ماتنساوش تعطيوني آراءكم حبوباتي 💜