حفار القبور💀مكتملة💀

💀الجزء 53💀

💀ﺣﻔﺎﺭ ﺍﻟﻘﺒﻮﺭ💀
🔰El Yakut
  ▫Part 53

بقاو متبعين الخريطة حتى وصلو للجزيرة الأخيرة مع جوايه الخمسة... فرحو حيت ماضاعوش فالبحر و حيت هادي هي آخر جزيرة غايزوروها فهاد الطابق.. كانت الروح الاجابية مالياهم و لكن كون عرفو شنو كيتسناهم ماكانوش نهائيا غايبتاسمو.

الجزيرة كانت كتبان خاويا مافيهاش بزاف ديال الشجر  و الأرض ديالها مشققة تقول فيها الجفاف.
استغربو فبادئ الأمر حيت الجزر اللولين لي زاروهم كانو فيهم غابات كثيفة..
ربطو القارب فواحد الحجرة... هنا لاحظ خليل واحد الحاجة غريبة فوق القارب مانتابهوش ليها فاللول... كانت جرة كبيرة..بحال خابية ديال الماء...
جبدوها  و هوما فرحانين كيشربو حيت العطش كان دار فيهم حالة ... عاد داوها معاهم و قررو يدخلو للجزيرة يكتاشفو شنو كاين و شنو كيتسناهم..

خليل كيهضر بشوية: كنسمع صوت ديال شي حد كيدندن.
فاطمة كتحاول تركز باش تسمع الصوت: اااه جاي من الشمال.
خليل: نمشيو نشوفو؟
فاطمك بتردد ظاهر: ممم ... ياله.
تمو غادين للجهة ديال الشمال.. كلما قربو كلما الصوت بدى كيوضاح أكثر و أكثر...
حتى بان ليهم جسد صغير جالس قدام واحد الضاية صغيرة ديال الماء... كيبان جسد طفل... شافو فبعضياتهم و قربو من داك الطفل لي كان جالس كيدندن بصوة طفولي رقيق.

حتى وقفو قدامو و هز راسو فيهم بابتسامة باين فيها نيابو طوال..
تراجعو للوراء... حيت تعرفو على صاخب الجسد.. شكون من غيرها ريتشيل... ناضت كتشوف فيهم و كتقيس فنيابها..  بمجرد ما حطت يديها على الراس ديال الناب تجرحت... هنا عرفت بلي هي مستعدة تنقض عليهم... و بالقوة ديالها قدرات أنما تربطهم بحبل على جدع ديال واحد الشجرة بينما بدات كتشعل العافية..
ريتشيل: قالو لي بلي اللحم كيجي بنين و هو مشوي... و من تما و أنا كتسني قدومكم بفارغ الصبر.

خليل كيغوت: واش هاد لعجب؟؟؟!!!!.. ياك قتلناك شحال هادي؟
ريتشيل كضحك بالجهد: قتلتوني؟ هههههه نتوما قتلتو غي الوهم... أي واحد قتلتوه سابقا فهاد العالم راه مكيموتش.. ماتنساش بلي حنا فبناية التمويه و الوهم... ولكن باقي عندكم فرصة أخيرة... نتوما دابا فأرض العفريت الأعظم... ايلا مات شي حد فوق هاد الأرض ماكايعاودش يحيى... واخا يكون فالوهم...و الحاجة الأخيرة لي بغيت نقول هو انه حنا هنا كلنا ميتين هههههه.. هادو هما القواعد.
فاطمة كتغوت بهستيرية : علاااش هادشي كامل... شنو درنا لييك حنا ؟؟؟؟
ريتشيل حتى هي كتغوت: حتى واحد ماغايفهمني... حتى واحد ماعارف باش دزت... كلهم قالو بلي أنا حمقة... تاحد ماحاول ينقذني من عالم السحر لي دخلت فيه... تاحد فيهم ماعطاني الحنان... ام نرجسية كتبغي غير راسها... و أب مغتصب كيتعدى عليها... أخوات جشعات و متنمرات كيعجبهم يضايقوني... اسرة مفككة... كنت فيها أنا ريتشيل الضعيفة.. ريتشيل المظلومة... أما مانادماش حيت قتلتهم واحد واحد..(بدات كتبكي) كنت باغا نعنق شي نهار ماما و نشم ريحتها... و نعنق بابا و يحن عليا... نلعب مع خواتاتي و يكونو كيبغيوني... أنا كنت الضحية ماشي هوما... أنااااااا هي الضحية من هادشي... أناااااا
فاطمة كتغوت و تبكي: واش يسحاب ليك غي نتي لي دزتي من مراحل صعيية... ماعارفاش بلي كاينين ناس تعذبو اكثر منك... نتي على الأقل عشتي فداركم... اللهم تعيش فداركم معزز مكرم... و لا عيشت الدل لي عشتها أنا...واش عارفا بلي أنا حياتي كاملة عشت خادمة... ماتتت مّي بعد ما انتحرت... ماتت قدامي تلاحت بالبير... تاحد ماجدها من تما... تاااحد... كنت باقا صغيرة... تخلاو عليا كاملين... تامن بّا مشا و خلاني.. تزوج و خلاني عايما بحري... كندور بين خوالاتي... كانو كيعدبوني الله ياخد فيهم الحق... كنت كل النهار نتكوى بالقطيب ديال لحديد..  لحمي كلو عامر طباعي... و لكن المسامح كريم... ماقتلتهم ما آذيتهم الله هو لي كاياخد الحق ديالنا من الناس.. ماشي حنا لي خاصنا ناخدو حقنا بيدينا... الحياة ماشي غابة غي گزر و زيد... رباتني جدة الله يرحمها... ماتت مغدورة... ماتت و هي كادافع عليا... طيحو عليا الباطل و دفنوني حية... عشت لعجب و قاسيت لا فحياتي و لا فهاد العالم... ولكن مافقدتش الأمل... كنت كندعي الله باش ياخد الحق فلي كان حيلة و سباب.

حسات فاطمة بالحبل كيتحل... طاحت للأرض و هي كتشوف ريتشيل كتتنخصص... و تبكي بجهد... أكيد كتبقى درية صغيرة... قربات منها و بلا ماتفكر عنقتها... واخا ريتشيل انزعجت فاللول و لكن زيرات على فاطمة كتحاول تحس بحنان الأم لي فقداتو من شحال هادي بينما بقا خليل كيشوف فيهم و يتنهد... على الأقل نجاو من انهم يتشواو فوق العافية... قرب من ريتشيل و فاطمة و ربت على ضهورهم عاد تراجع للوراء كيشوف فيهم.

كانو كيبانو مشتاقين بجوج للحنان...
عاد تفرقو علي بعضياتهم عينيهم منفوخين بالبكاء.
ريتشيل كتهضر و تتنحصص: صافي دابا... سيرو.. أنا فكيت سراحكم... ماغانقرب ليكم ماغانقيسكم... غانبقا هنا... سيرو نتوما واجهو مصيركم... ماغانسفكش دمكم النقي... ماغانلوتكمش...

مشات جلسان حدى العافية كتشوف و جامعا رجليها لسدرها بينما خليل جر فاطمة عندو من كتافها و هو كيربت عليها...هاد الأخيرة لي بدات كتحبس دموعها و هي خاشيا راسها عند خليل كتحس بالدفئ و حنان.