💀ﺣﻔﺎﺭ ﺍﻟﻘﺒﻮﺭ💀
🔰El Yakut
▫Part 31
فهاد الأثناء كان خليل واقف قدام الباب ديال المغارة...تعرضو ليه جوج حراس من اللصوص شدوه و كثفوه دخلوه عن الرئيس...
بانت ليه بدر البدور كتجدب غي دخل شافت فيه و غمزت ليه و كملات التمثيلية...
الرئيس: مال هذا تاني آش جابو هنا؟
الحارس: لقيناه اسيدي قدام الباب ديال المغارة ماعرفناه شنو بغا..
خليل: ايلا سمح ليا سيدي...جيت نگول ليك بلي أنا طبيب... و كنداوي المجدوبين و المشيرين... جوادي قالو لي بلي عندكم شي حد مريض هنا و جيت نداوي... مايسحابنيش نتوما ماباغينيش... هي غير نمشي فحالاتي...
الرئيس: لااا گاالاك... علي دخول الحمام بحال خروجو... شوف ليا هاد البنت هنا... راها نيت مشيرة و لا مانعرف ليها...
خليل: على هاد لحساب وجدو ليا بلاصة خاوية باش نبدا فالعلاج ديالها و ماخاص حد يدخل علينا... طلبو التسليم..
الكل بصوت موحد: تسسسلييييم...
وجدو ليه بلاصة خاوية فجعة معزولة من المغارة و خلاوه مع بدر البدور... غي دخل عليها شافت فيه شوفة امتنان...
خليل: شوفي أنا غانسيفط ياقوتة تتأكد بلي ماكاين حد و نخرجو بشوية باش مايعيقوش بينا و ديك الساعة نشوفو شغانديرو...
بعد ما تأكدو بلي الطريق خاوية خرجو...
هز خليل معاه مشعل فيه العافية احتياطا و خرجو كيتسلتو حتى وصلو للمخرج ديال المغارة... غفل خليل الحارس لي كان قدامو و جبد سيفو صفاها ليه...
الخطوة الموالية كانت هي انه يفتعل حريق فالمغاوة و نجح... عاد خرجو هو و بدر البدور مخبيين فبلاصة مايقدر يقشعهم فيها حد...
بعد ما حسو اللصوص بالعافية شاعلة فالمغارة و الدخاخن نايضا.. بداو كيجريو باش يخرجو گاع داكشي لي مخبي من الكنوز لي سرقو...
خرجو حتى الحصان الخشبي...
فهاد اللحظة بان صالح لي كان كيتابع كلشي من بعيد ناوي يسرق الحصان الخشبي ولكن خليل كان ليه بالمرصاد... عطاه ضربة لرجليه زحفاتو و هز بدر البدر بين يديه ركبها فالحصان و ركب حداها بالزربة... بانو ليه اللصوص شافوه و جايين جيهتو كيجريو... و هو كيفكر كيف غايقدر يخلي الحصان يطير...
تجمعو عليه المصائب دقة وحدة... الأرض بدات كتزلزل و الحراس جايين ليه... غنض عينيه و هضر فالجهد...
خليل: فلتحلق أيها الحصان الطيار...
غي نطق بهاد الجملة بدا الحصان كيحلق فالفضاء... طل خليل تحت منو بان ليه الأرض تخسفت و گاع ليكان تما شقاتهم الارض و بلعتهم... ما بقا لا صويلح لا لصوص...
تنفس الصعداء... الطريق بطبيعة الحال غاتكون قصيرة حيت هو دابا طاير فالسماء ماشي غادي فالأرض بالجمل وسط الصحراء...
بعد مدة قصيرة بدات كتبان ليه بغداد من بعيد... ضور راسو عند بدر البدور لقاها سخفانا... وجع كيشوف قدامو... لقي راسو كيحلق فوق بغداد لي كتبان كلها ألوااان...
فاش قرب من قصر الوالي قال للحصان باش يهود بيه... هود وسط الساحة الأمامية ديال القصر و استقبلوه الحرس....
هبط هاز بين يديه بدر البدور... جاو الخادمات كيجريو هزوها داوها لجناحها و دخلو الحراس خليل عند الوالي....
كان الوالي ماقاداه فرحة بعدما تأكد بلي بنتو بيخير ماطاري ليها والو...
شاف فخليل شوفة عندها معنى...
الوالي: سمعني أولدي... عرفت راسي ظلمتك و ظلمت البنت لي معاك... ولكن هادي راها بنتي و كبدتي... تشويت فيها و كنت خايف مانعاودش نشوفها داكشي علاش قسيت عليكم.... نتمنى تتفهمني و تسمح ليا ايلا قلت ليك كلمة العيب...
خليل: هذشي لي درت اسيدي واجب... كنت غانديرو بالتهديد و لا بلا تهديد...
الوالي: داكشي علاس اليوم هو اليوم لي غانحتافل فيه بيك... (عيط على الخدم و الاتباع ديالو) اليوم على شرف هاد البطل غاتكون أكبر حفلة فبغداد... عرضو على الأشراف ديال المدينة... اليوم سهرة من داكشي الرفيع...
خليل باعتراض: ولكن...
الوالي: ماكاين ما ولكن... نتا اليوم ضيف الشرف...
قرر خليل يقبل هاد العزيمة و هو متردد...
بعد كا مشا من عند الوالي داز علي فاطمة هي اللولة لي لقاهم داوها للجناح الملكي...
دخل عليها بعدما دق الباب لقاها وافقفة كتسناه بأحر من الجمر و لابسة كسيوة حمرة فيها شوية دالبنفسجي... تلاحت عليه بحال شي قرد عنقاتو مخلياه كيضحك... بدات كتضرب ليه فسدرو و هو مخليها كيشوفها بحال شي بنيتة صغيورة....
فاطمة كتتنخصص: تخلعت...تخلعت عليك... اهى اهى سحابني ماغاترجعش... خفت بزززاااف...
خليل بمكر: توحشتيني زعما؟
أنت تقرأ
حفار القبور💀مكتملة💀
Horror💎مكتملة💎 ❌حصرية على الواتباد❌ 🌛حصريا خلال شهر رمضان المبارك🌜 قصتي بدات من زمااان.. ايام كان يطرا غير لي ما فالحسبان.. ايام كان الود بين الفتية و الصبيان.. ايام العز و الشان و المرشان.. كانو الرجال مايضورو الا بالسلهام.. و العيالات مقفول عليهم ال...
