💀ﺣﻔﺎﺭ ﺍﻟﻘﺒﻮﺭ💀
🔰El Yakut
▫Part 35
فاقو الصباح بكري... حطات ليهم ميمونة شوية ديال الخبز و الحليب...
عاد خرجات معاهم تال باب الكوخ كتدعي معاهم و الدموع فعينيها...
ميمونة:سمحو ليا أوليداتي موحالش باقي نشوفكم!
هز خليل الشبكة و فاطمة هازة فاش تدير الحوت... غادين كيهضرو و يقشبو ناشطين... حتى وصلو لواحد لبلاصة فيها الصخر مناسبة باش يقدرو يلوحو منها الشبكة... توكلو على الله...و بداو المهمة ديالهم.
بدات فاطمة هي اللولة و خليل كيوجهها شد ليها يديها و قاد ليها الوضعية ديالها باش تقدر ترمي الشبكة بطريقة مناسبة... كتحس بالقرب ديالو ليها حتى تزنگات و تفافات..
فاطمة: صافي أخليل غي بعد راني فهمت...
خليل كيزيد يقرب: متأكدة؟
فاطمة كتغوت: وااا صااافي...
بعدما عصبها بدا كيضحك عاد بعد منها كيشوف فيها كتلوح الشبكة و تتسنا...
طالت مدة الانتظار و ملو بجوج...
جبدو الشبكة عاوتاني و بقاو كيلوحو و يعاودو مرارا و تكرارا... ولكن دون جدوى... ديما الشبكة خاوية و لا لاسق فيها الخز...
الشمس توسطات السماء و هوما بداو كيعياو و الحرارة قهراتهم....
قررو يجلسو يرتاحو شوية...
فاطمة: الله يا ربي... الله و علم كيف كانت ديك المرأة مسكينة مستحملا هاد العذاب..
خليل كيطل علي البحر: طرف الخبر راه صعيب.
رتاحو شوية عاد ناضو تاني كيلوحو و يعاودو... بداو بجوج كيقطرو بالعرق حيت المجهود لي كيديرو ماشي ساهل... فاللخر جمعو غي ربعة ديال الحوتات صغار بالحساب...
وقفو كيشوفو فالحصيلة ديال اليوم... خليل طالع ليه الزعاف و فاطمة كتحس بالشمتة..
خليل: عرفتي آشنو غانلوح آخر مرة هاد الشبكة و غانشوف...طلعنا شي حاجة تبارك الله... ماطلعناش نرجعو فحالاتنا...
ترجعو فحالاتكم؟؟!
قال بسم الله و لاح الشبكة... تسنى خمسة الدقائق عاد بدا كيجرها و كيحس بيها متقلة... فرح و بدا كيعيط علي فاطمة لي كانت جالسة فالارض.. ناضت عندو قافزة كيتسناو يجبد شي حوتة فاعلة تاركة...
غمض خليل عينيه و جر بكل جهدو حيت كان داكشي ثقيل... جبد الشبكة و هو فرحان...
ولكن فثانية وحدة تقلبو ملامحو للتفاجؤ... مافهم والو من داك لعجب لي جبد من وسط لبحر....
كانت جرة من الفخار كبيرة و مزركشة... مسدودة باحكام...
قربات فاطمة خاشية وجهها و كتشوف فداك لعجب... مشاعرها مخلطين بين خيبة أمل و استفسار...
فاطمة: شنو هادشي..
خليل: هاذي خابية ديال الماء... ولكن مافهمتش شنو جابها لوسط البحر...
مدات فاطمة يديها كتتحسسها... قربات من الغطاء حلاتو تتفقد شنو كاين لداخل من باب لفضول... الفضول لي قتل شحال من قطة.
بدا الدخان كيخرج من الفم ديال الخابية حتى تحول لسحابة كحلة... تكون اثرها واحد من أبشع المخلوقات المسمى بمارد الدخان..
كان مارد الدخان كيف سميتو مصنوع من لدخان مايبان والو من جسمو الضخم لي من الدخان الأسود بحال العملاق من غير ديك العين الوحدة لي علي شكل تقبة كحلة وهي لي كيشوف بيها..
هاد المرة ماجبدش خليل سيفو و فاطمة ماغوتاتش مخلوعة... كيحسو براسهم بداو كيتعودو علي المفاجآت لي كيتسناوهم ... غير هو بدات كتشدهم الخلعة فاش غوت المارد بصوت بحال الرعدة زلزلهم من بلاصتهم...
المارد: نتوما خرجتوووني دابا من هاد الحبس... سركم نخنقكم بدخاني على شنو درررتو...
تسنيتكم ألف عام تجيو و ماجيتوش.... تسنيتكم و أنا مخشي وسط هاد الخابية... هضرووو مالكم ساكتين كاتشوفو فيا بحال لي سرطتو لسانكم..
خليل بشجاعة: و دابا حنا ملي خرجناك... غي بالعقل علاش غاتخنقنا و تقتلنا؟
المارد: دازت عليا مئة عام... قلت لي خرجني غانعطيه فلوس كثار وماخرجني حد... دازت ثلثمية عام قلت لي خرجني نرجعو أمير ماخرجني حد... دازت خمسمية قلت لي خرجني نحقق ليه ثلاثة دالؤمنيات و ماخرجني حد... دازت سبعمية قلت لي خرجني نحقق ليه عشرة دالأماني و ماخرجني حد... و البارح كملت الالف و اقسمت بلي لي غايخرجني غايموت بدخاني...
فاطمة كتحاول تضيع الوقت واخا كتقفقف بالخلعة تجرأت تهضر: و علاش أسيدي المارد كنتي فهاد الخابية و نتا لي بهاد العظمة و القوة و السلطان.
المارد : كنت تانا عندي همة و شان... ولكن تقلب عليا كلشي فاش غلبني العفريت الاعظم و وليت تحت السلطة ديالو... رجعني خادم عندو... و نهار بغيت ننقالب عليه حطني فهاد الخابية مدلول و منبوذ غي بوحدي... و داكشي علاش غانبرد فيكم جنوني و گاع داكشي لي قااااسيت... هههههههههحخهه
بداو كشوفو فبعضياتهم و يسرطو ريقهم... خاصهم ضاروري يتلفو الوقت باش يقدرو يفلتو منو بأي طريقة...
خليل: ولكن أسيدي مارد الدخان... موحااالش واش نتيق قصتك
أنت تقرأ
حفار القبور💀مكتملة💀
Horror💎مكتملة💎 ❌حصرية على الواتباد❌ 🌛حصريا خلال شهر رمضان المبارك🌜 قصتي بدات من زمااان.. ايام كان يطرا غير لي ما فالحسبان.. ايام كان الود بين الفتية و الصبيان.. ايام العز و الشان و المرشان.. كانو الرجال مايضورو الا بالسلهام.. و العيالات مقفول عليهم ال...
