حفار القبور💀مكتملة💀

💀الجزء 28💀

💀ﺣﻔﺎﺭ ﺍﻟﻘﺒﻮﺭ💀
🔰El Yakut
  ▫Part 28

صالح كان بحال الصديق ديال الوالي... ديما يجيب ليه من الحكايات العجب ولكن ماعمرو حكى ليه
حكايتو...
و فكل مرة كيزورو فقصرو كيحتافل بيه و يوجد ليه وليمة كببرة..
تجمعو خليل و فاطمة و صالح مع الوالي و مرتو و بنتو... كانت مرت الوالي عامرة ذهوبات و لابسة الحرير الفاخر... أما بنتو فكانت تقريبا عمرها سطاش... زوينة فوجهها... لابسا ملابس بسيطة بحال الاميرات و دايرا تاج صغيور فراسها...
جلسو كاملين على نفس السفرة و الوالي كيرحب بيهم و يعاود فرحان...
الوالي بسعادة: مرحبا بيك أسي صالح تاني و مرحبا بلي معاك... داري دار الكبيرة... حسبو راسكم فداركم...و خدو راحتكم.. إيوا شنو الجديد أ سي صالح... شنو جيتي تحكي لينا تاني. ..ههه
صالح: وا أ سيدي هاد المرة ما جيتش باش نحكي... جيت و جايب معايا هدية لمولاي الوالي...
الوالي: إياااااه؟ إيوا أسيدي أنا قابل هديتك من دابا...
صالح بمكر: ولكن أسيدي هاد الهدية راها هدية عجييبة... و لا تقدر بثمن... ولكن أنا بغيت عليها غي حاجة بسيطة...
الوالي: طلب يجيك مني لي بغيتي...
صالح: بغيت اسيدي الا عجباتك الهدية تحقق ليا أمنية...
الوالي: إوا أسيدي ماطلبتي غي الموجود... ياله كولو كولو مرحبا بيكم...

كلاو و سالاو حتى شبعو... الوالي كان كيهضر مع خليل لي بان ليه عارف الشي الكثير... عجبو كلامو و عطاه قيمة قدامو...
ناضو كلهم من فوق السفرة و غادين للجردة ديال القصر....
وقفو قدام داك الحصان الخشبي...
الوالي: هادي هي الهدية أصالح؟ ها أنا شفتها و ماتدهشت!
صالح: تسنا أسيدي الوالي حتى تشوف بعينيك... ركب صالح فوق الحصان و آمرو باش يطير... و هذا ماكان طار الحصان فالسماء ديال بغداد بحال شي عصفور... غي رجع صالح للأرض استقبلو الوالي و هو مدهوش... فمو مابغاش يتسد ليه بقوة الصدمة...
صالح بضحكة جانبية: إوا أسيدي الوالي عرفتي علاش هديتي لا تقدر بثمن؟
الوالي بلهفة: طلب طلب أصالح لي بغيتي... و القسم ديالي هو انني غنحققو ليك...
صالح: اوا أسيدي الوالي أنا مانيش طميميع... زوجني غي بنتك بدر البدور و خليني نديها معايا...

هنا بدا الوالي ةيشوف فيه مبهوض اكثر بينما جرات بدر البدور عند باها كتطلبو باش مايعطيهاش لداك الشارف تتزوجو... و هي باقا صغيرة ماشافت ماتشوفت...
أما خليل و فاطمة شافو فبعضهم و عارفين بلي هادشي لي كيطرى ماااكيبشرش بالخير.

الوالي بغضب: صااالح... ماتافقناش على هادشي... أنا بنتي باقا صغييرة... ماشافت متشوفت... و نتا ماشي من مقامها...
صالح: ولكن أسيدي نتا وعدتيني بأمنية... و الرجال لي بحالك كاكيخلفوش الوعد...
الوالي كيفكر: إوا فهاد الحال غانرفض الهدية و غاترجع منين جيتي و عمرك باقي تعتب فهاد القصر...
صالح كيضحك بمكر: آش جابنا لهاد الهضرة أسيدي...

وقفو كيشوفو فيه و هو كيهضر مع راسو بحال الحمق بحال لي تلبسو شي جن... كيتعوج و يتعوق... طاح فالأرض كيتمرغ فيها....
صالح: همممم دعيييتك يا فراق العواد.... بالقوة القوة..

غي قال هاد الجملة تاحد فالقصر مابفا قادر يتحرك من بلاصتو بحالي جمدو... مشا صالح بالزربة هز بدر البدور بين يديه كي الريشة و جسدها مجمد غي كتغوت باش يطلقها دون جدوى...
حطها فوق الحصان الطيار و ركب حداها طار بيها لبعيييييييد....

هنا زالت اللعنة و رجعات الحركة للقصر... مخليا الوالي كينهج و مرتو حداه كتبكي و تندب...
أما واحد خليل و فاطمة بقاو كيشوفو فبعضياتهم و تأكدو بلي ايلا نجاو من عفريت الصحراء... ماغاينجاوش من سيف الوالي....

الوالي كيعييط للحرس بالجهد: شششدوووو هادي رميوها فالزنزانة ديال القصر خليو مولاها تما حتى تعفن(كيشير على فاطمة).. و جيبو ليا هذا للمجلس ديالي دااااابا (كيشير على خليل)..

توقعاتكم للأجزاء الجاية💜