💀ﺣﻔﺎﺭ ﺍﻟﻘﺒﻮﺭ💀
🔰El Yakut
▫Part 47
أتوما: ماتو... سيري جيبي هادوك لي مخبين مورا ديك السدرة
ماتو بضحكة شريرة: ههههههه حاضر.
غي سمعو كلامهم برد ليهم الماء فالركابي طرطقو عينيهم... بقوة الخلعة....فاطمة طلقاتها فحوايجها.. أما خليل فكان حاط يدو على سيفو و كيدعي فخاطرو باش يخرجو منها سالمين غانمين.
جات قدامهم ماتو... و شافت فيهم بدوك العينين دالآسياويين مجبدين... عينيها كيفتنو بطريقة غير معقولة.
دارت ليهم حركة بيديها باش يتبعوها... و بالرغم من أنهم كاقادينش يزيدو حسو براسهم ترفعو و مشاو بارادتهم لعند اتومي لي كانت جالسا مخبيا نص وجهها و كتشوف فيهم بابتسامة محجوبة.
مشات ماتو مخلياهم غي بثلاثة بيهم.
اتوما بفرح: عرفتي شحال تسنيتكم... سنين هادي و أنا حاملة بشرى.. كتقول بلي قربتو تجيو لعندي.... قربتو تجيو بين يديا...
أنا عارفا و نتوما عارفين قصتي...
ودابا غانلعبو شوية... جبدات جوج دميات و حطاتهم قدامهم... و جبدات مجموعة كبيرة من الأبر حطاتها فالجنب كتشوف فخليل و فاطمة لي التبوريشة و الخلعة قتلاتهم و هوما كيشوفو فتصرافتها الباردة.
اتووما: ما تصاحب حتى تجرب او ما تحرث حتى تزرب او ما تضرب حتى تقرب... و دابا ملي قربتو مني غاتجيكم الضربة هي هاديك.. سمعوني و ستلغاو كلامي... كل دمية من هاد مرتبطة بالجسد ديالكم و الأعضاء ديالكم... (جبدات ابرة و دگات اليد ديال الدمية لي قدام خليل الشيء لي خلاه يتألم) فهمتو دابا بلي ايلا بغيت نقتلكم يكفي نحط هاد الابرة فوق القلب ديال اي واحد فيكم هههه... ولكن انا مانيش طميميعة... و مانيش نظلم فالعباد... غانسولكم جوج أسئلة لكل واحد و ايلا ماجاوبتوش الخبار فراسكم.. ودابا جاوبوني واش موافقين؟
خليل و فاطمة كسرطو فريقهم: موافقين.
خليل: ولكن عندي شرط... بغيت فكل سؤال تخلي لينا ثلاثة ددقايق نتشاورو بيناتنا.
اتوما: ماطلبتيش شي حاجة عصية... موافقة.
وقفات أتوما كتضور عليهم و كيتسمع صوت خلخالها... نفس الرنة... رنة الموت لي سمعوها عشرات المرات و هما فهاد العالم البائس.
آتوما السؤال الأول ليك نتي: يموت القلب أو يموت المحبوب؟ تقدرو تتشاورو بيناتكم هههه.
فلطمة تحت سانانها كتهضر مع خليل: موت القلب أكيد.
خليل: واش عارفا بلي هي قتلها راجلها حيت خانتو مع المحبوب... يعني غالبا غاتكون حاقدة... موت القلب هو موت مول القلب...
فاطمة: يعني ايلا كانت حاقدة فخاصني نختار موت المحبوب لي بسبابو مات قلبها.
خليل كيشجعها: آه و باذن الله الاجابة صحيحة.
فاطمة بصوت عالي: موت المحبوب.
اتوما مزيرة على يديها بغضب: همممم صحيح... ندوزو ليك نتا... السؤال هو: غدر و تعلم و لا حب وتألم؟
خليل كيفكر: على حسب قصتها... غدر وتعلم هي نهار غدرات راجلها و تعلمات بلي الغدر هو هلاكها.
فاطمة: اذن حب و تألم هي نهار بغات المحبوب و تألمت فاش قتلها راجلها.
خليل: هممم ممكن.. ولكن لي محيرني هو واش هي نادمة حيت غدرات و لا حيت حبات.
فاطمة عقلها مشوش: ايلا كانت حبات المحبوب بزاف فمغتكونش نادمة... خاصنا نعرفو هي شكون بغات.
خليل: الجواب واضح.
خليل بصوت عالي: حب و تألم.
آتوما: هممم الذكاء منكم كينقط ههههههههههههههههه... السؤال الموالي ليك نتي...(مشات وقفات قدامها) وتش أنا زوينة؟
خليل بصوت منخفض: قولي آه.. قولي آه
فاطمة : آه
حيدات أتوما القناع الشيء لي خلا فكها يطيح... بان فمها كامل مشرك و مشدود من حد لودن شوية و يطيح فالأرض.
شهقات فاطمة بينما خليل غمض عينيه كارز علي يديه.
آتوما: شوف فيا نتا... و دابا واش أنا باقا زوينة؟
خليل: لا
رجعات آتوما القناع لبلاصتو... و هزات الدمى خباتهم و عاد شافت فيهم بحقد: خليتكم لماتو... ماغانقدر ندير لكم والو بعد ما جاوبتوني صحيح... ولكن نقدر نآذيكم شوييييية.
جبدات الدمية ديال خليل قطات ليه طرف صفير من لحم درجليه الشيء لي خلاه يغوت و هو كيتألم عاد هزات حوايجها و دارت لجامها و تخبات وسط الظلام و الضباب بلعها فالداخل ديالو.
فاطمة بقلق: خليل صبر نجيب ورقة ديال الشجر نضمض ليك هادشي... راك كتنزف.
ناض قافز مخسر سيفتو: دابا ايلا بقينا كل مرة تضمضي ليا راه ماغانخرجوش من هنا... ياله نكملو طريقنا راه غي جرح صغير.. كيف والو.
فاطمة كتنهد: مكتسمعش اخليل... ماكتسمعش.
خليل بغضب: صافي صافي واش ماكاتشوفيش شنو باقي تابعنا.
أنت تقرأ
حفار القبور💀مكتملة💀
Terror💎مكتملة💎 ❌حصرية على الواتباد❌ 🌛حصريا خلال شهر رمضان المبارك🌜 قصتي بدات من زمااان.. ايام كان يطرا غير لي ما فالحسبان.. ايام كان الود بين الفتية و الصبيان.. ايام العز و الشان و المرشان.. كانو الرجال مايضورو الا بالسلهام.. و العيالات مقفول عليهم ال...
