حفار القبور💀مكتملة💀

💀الجزء 24💀

💀ﺣﻔﺎﺭ ﺍﻟﻘﺒﻮﺭ💀
🔰El Yakut
  ▫Part 24

فاطمة باستغراب : كيفاش لقتيني فالمقبرة.... انا آخر حاجة عقلت عليها هي كنت فالرياض... و..و..لالة الغالية ضربتي...(بدات كتغوت) أوييييبيلي وحديييي وااااش نكون مت و عاودت حيييت.
خليل: شنو كتخربقي انا فاش دخلت للمقبرة لقيت آثار السحور.. باينا غايكونو سحرو بيك يسحابوك ميتة و صدقتي حية... لاباس ملي جبدوك قبل ماتخنقي..
فاطمة: آجي بلاتي... نتا منين كتعرف سيدنا السلطان؟
خليل: نقدر نكون ولدو!
فاطمة: واش أثرت عليك الشمس(قاصت ليه جبهتو) شفتك سخون... نوض نوض عوم شوية يبرد عليك لحمك.. راه ايلا ضرباتك السالمة ماعندي كيف ندير ليك..
ناض خليل تخشى فالماء كيعوم و يضحك فخاطو

اما فاطمة فسكتات  كتشوف قدامها... كتفكر فجداتها... ماعرفاتش كيفاش غاتكون تقبلات الخبر ديال موتها...
دازو جوج سوايع خرج فيهم خليل كنهج حيت أجهد راسو و هو كيعوم...
نوضها من يديها وقفها حداه غادي بيها فالاتجاه ديال النخل...
خليل:ياله وريني حنة يديك...جمعي لينا شوية ديال التمر بينما رتاحيت شوية و نشفت.
طلعات كتسلق بحال القرد و مع هي خفيفة دغيا دغيا وصلات... كان التمر طاايب و حلو... بدات كتلقط و تحط فورقة كبيرة ديال النخل...
سالات و هودات للظل... عيطات على خليل لي كان متكي و مغمض عينيه باش يجي حداها و ياكلو... قتلهم غا الجوع فهاد الصحراء و هوما كيتسناو شي حد يجي عندهم ينقذهم.
و هوما جالسين حدا بعضياتهم... بدات فاطمة كاتاكل و تلوح لعضام ديال التمر بالجهد... كاتحاول تبرد غدايدها... فينما تاكل شي تمرة تلوح لعضم وتشوفو فين وصل...

حتى بداو كيشوفو العاصفة من بعييييد.... عاصفة رملية كبييييرة...
فاطمة كتغوت: خلييل شنو غانديرووو دابا؟؟
خليل بانفعال: تعلقي مزيان بالجدع ديال النخلة انا غانمشي نتأكد بلي الجمال مربوطين و نرجع...
ماحد الوقت كايمر ما حد العاصفة كتقرب... حتى وصلات عندهم.... خليل معلق فنخلة و فاطمة معلقة فنخلة اخرى سادين عينيهم بالجهد و كيحاولو يشدو فراسهم باش مايطيحوووش...
حتى حسو بالعاصفة بدات كتهدأ شوية بشوية و حلو عينيهم....
غي بان ليهم داك لعجب لي قدامهم و جوههك صفارو بالخلعة...
كان واقف قدامهم طولو فايتهم بأضعاااق... جسدو ضخم...عملاق صافي... وكلو مصنوع من الرملة... عيونو كحلين و منخارو طويل...

وقفو كيشوفو فيه مبهوضين... خليل شاد فسيفو واخا عارف بلي ماغاينفعو بوالو و فاطمة كتقفقف فبلاصتها...

العفريت:النهار المبارك عليك واحد يغديك و واحد يعشيك و النهار الصكع عليك واحد يدعيك و واحد يشهد فيك...أنا عفريت الصحراااء...( شاف ففاطمة) نتي يا القتااالة قتلتي ليا ولللدي...

هز بيديه ولدو لي كان مليوح فالارض ماكايبانش حيت بحالو بحال باه مصنوع من الرمل...
فاطمة شوية و ماتطلقها فحوايجو: انا....انا أسيدي العفريت مادرت والو....(بدات كتبكي)
العفريت: قططططططعي حسسك... اللبن والزبدة كانو خواتات ما فرقوهم غير لعيالات... نتوما يا لعيالات سباب المشاكل... و نتي يا القتالة كيفما قتلتيلي ولدي غانقتلك... ماحشمتيش ؟؟! لحتي غليه لعضم ديال التمر حتى طاح ليه فعينو و عورتيه... حنا عفاريت الصحراء العين ديالنا هي باش كنعيشو...

فاطمة تعقد ليها اللسان بقات غي كتشوف فالعفريت و البخار طالع ليه من ضهرو هاز ولدو صغير بين يديه كيشوف فيه بأسى...
دفن ولدو تخت واحد النخلة و ضار عندهم... مد يديه شد بيها فاطمة و هزها عندو...
يديه بوحدها ساوية خمسة من جسد فاطمة... قربها لوجهو كيخنقها مزير عليها...
العفريت : الحجلة الخفيفة من سعد الصياد... جيتي من سعدي... اليوم مانطلقك حتى نقسمك على جوج...

خليل كيهضر بالجهد: ياااا عفريت الصحراء ... آش بان ليك تخليها حتى لغدا مع الصبح... تودع هاد الدنيا و تصلي ليها شي ركيعات يغفرو ليها غدا يوم القيامة عند الله...
فاطمة كتهضر مخنوفة: انا مزاوگة... و رجاء فالله... لاما طلقني غي اليوم و غدا تلقاني نتسناك مع الصبح... ديك الساع قتلني و انا مصلية لمولانا.

بدا العفريت كيشوف فيهم بجوج.. عاد طلق فاطمة لي طاحت نيشان فالارض كتكحب و مشا فحالاتو للبعيد... مخلي خليل كيشرب ففاطمة الماء و يضرب ليها على ضهرها...

(｡ŏ_ŏ)
هاد المنحوسة كلها بلاوي!
آراءكم حبيباتي 💜