💀ﺣﻔﺎﺭ ﺍﻟﻘﺒﻮﺭ💀
🔰El Yakut
▫Part 58
غي قرب خليل لعند فاطمة بدى العفريت كيزرب باغي يقضي عليها ولكن خليل ماخلاش ليه الفرصة و قطع لفاطمة شعرها لي كانو شادينو الخفافيش فالسقف حتى طاحت للأرض...
ياله حلات فاطمة عينيها لقات العفريت قدامها بينما خليل طايح فالأرض رجليه كتنزف.. ضربو العفريت لرجلو باش يبطأ ليه الحركة.
هز المسخ يديه حتى للفوق باش يضرب فاطمة هاد الأخيرة ليبدات كتقلب على شي حاجة تحمي راسها بيها مابانت ليها غي المرآة... هزاتها مضرگة بيها و فنفس الوقت ضرب العفريت المرآة شقها من النص الشيء لي أدى لأنه يضرب قلبو.
قلب العفاريت كيكون فالمريات ديالهم... الى تشقت المرآة من النص كيموت العفريت بعد ما كيسكت ليه القلب....
طاح العفريت الأعظم فالأرض كينزف الدم أسود و بدى كيتحجر و يتحول لحجارة سوداء بينما الخفافيش كيغوتو فالسقف و بداو كيهربو من ديك القلعة واحد واحد حتى مابقا كيتسمع حس.
طاحت فاطمة فالأرض مامايقاش راسها بينما خليل غي كيشوف فيها مصدوم.
ماحسو براسهم حتى طاح واحل المفتاح من السقف...
مشا خليل بالزربة هزو.... بان ليه واحد الصندوق فالركن ديال القاعة... لاشعوريا حلو بالمفتاح و جبد منو واحد المخطوطة قدها قداش مكتوبة بالخط العربي.
شاف المفتاح لي كان فيديه و بدى كيقلبو... لحد الآن باقي ماعرفش كيفاش يلقى الباب لي غاتخليهم يخرجو بمرة من هاد العالم.
مشى عند فاطمة لي كانت كتشوف فيه بدورها و عنقها بالجهد...حتى هي كانت محتاجة لداك العناق و زيرات عليه أكثر.
فاطمة كتبكي: خلي... خليل... بغيت نخرج من هنا... ياك صافي غانرجعو للعالم ديالنا؟
خليل كيسكت فيها: ششش صافي سكتي.. شش أنا غانشوف كيفاش غانديرو نخرجو... أكيد ايلا كان داك فراق لعواد عند كلمتو راه غانخرجو... جبدي ليا گاع دوك المفاتيح لي جمعناهم فهاد الرحلة من اللول.
جبدات فاطمة المفاتيح و حطاتهم قدامها.... كانو المفاتيح بثلاثة محطوطين حدى بعضياتهم و فيهم نقوش غريبة باللغة العربية.
بدا خليل كيقرى الكلمة مكتوبة فكل واحد.
المفتاح الأول: إقرأ
المفتاح الثاني: آية
المفتاح الثالث: الكرسي
شافو فبغضياتهم مصدومين... إذن الحل للخروج كان هو آية الكرسي من اللول... يعني المفتاح من البداية ديال الرحلة كان هو آية قرآنية لي هي آية الكرسي.
شد خليل فيد فاطمة.... غمضو عينيهم و بداو كيقراو آية الكرسي مع بعضياتهم فنفس اللحظة و بصوت عالي.
أعوذ بالله العظيم من الشيطان الرجيم
بِسْمِ اللّهِ الرَّحْمنِ الرَّحِيمِ
اللّهُ لاَ إِلَهَ إِلاَّ هُوَ الْحَيُّ الْقَيُّومُ لاَ تَأْخُذُهُ سِنَةٌ وَلاَ نَوْمٌ لَّهُ مَا فِي السَّمَاوَاتِ وَمَا فِي الأَرْضِ مَن ذَا الَّذِي يَشْفَعُ عِنْدَهُ إِلاَّ بِإِذْنِهِ يَعْلَمُ مَا بَيْنَ أَيْدِيهِمْ وَمَا خَلْفَهُمْ وَلاَ يُحِيطُونَ بِشَيْءٍ مِّنْ عِلْمِهِ إِلاَّ بِمَا شَاء وَسِعَ كُرْسِيُّهُ السَّمَاوَاتِ وَالأَرْضَ وَلاَ يَؤُودُهُ حِفْظُهُمَا وَهُوَ الْعَلِيُّ الْعَظِيمُ.
بقاو مغمضين عينيهم و هما كيحسو بلي كيطيحو فالظلام... كيحسو براسهم بحالا كيطيحو من فوق واحد الجرف عاالي...
حلو عينيهم بالشوية كيضورو راسهم فالمكان لي هما فيه...
براكة صغيرة؟
خرجو من باب كتبان قدامهم المقبرة... بدى خليل كيضحك بهستيرية بينما فاطمة كتضحك و تبكي فنفس الوقت.
هاذي هي لذة الانتصار... ها هما رجعو بعد عناء طويييل... بعد بزاف ديال الصعوبات... كل واحد خسر بزاف ديال الأشياء و تصاب فمناطق من جسمو... ولكن كسبو حب... كسبو خبرة فالحياة من خلال التجربة ديالهم... هنا نزلات عليهم الحكمة... هنا و فوسط المقبرة تبنى واحد الجسر متين حطو أبطانا أقدامهم فوق منو... تهزو لمكانة عالية...مكانة الحكمة.. مكانة الصفاء و النقاء.
شدو فيدين بعضياتهم كيقربو و كل واحد كيشوف بعينين الآخر... رغم الإصابات كل واحد فيهم كيشوف شريكو باقي زوين.
فاطمة كتحاول تتمالك راسها و متنهارش: خليل الطريق باقي مكملش باش نفرحو... حنا رجعنا ولكن شنو غانديرو.
هز خليل قدامها المخطوطة لي جابها معاه فيديه و وراها ليها مخليها كتشوف فيه بعدم فهم.
خليل: بهاد المخطوطة غانحكمو البلاد.
بوراهي 💜
أنت تقرأ
حفار القبور💀مكتملة💀
Horror💎مكتملة💎 ❌حصرية على الواتباد❌ 🌛حصريا خلال شهر رمضان المبارك🌜 قصتي بدات من زمااان.. ايام كان يطرا غير لي ما فالحسبان.. ايام كان الود بين الفتية و الصبيان.. ايام العز و الشان و المرشان.. كانو الرجال مايضورو الا بالسلهام.. و العيالات مقفول عليهم ال...
