💀ﺣﻔﺎﺭ ﺍﻟﻘﺒﻮﺭ💀
🔰El Yakut
▫Part 29
الوالي كيعييط للحرس بالجهد: شششدوووو هادي رميوها فالزنزانة ديال القصر خليو مولاها تما حتى تعفن(كيشير على فاطمة).. و جيبو ليا هذا للمجلس ديالي دااااابا (كيشير على خليل).
تحاماو ربعة ديال الحراس على خليل لي كان كيقاوهم بكل قوتو و كيغوت عليهم باش كايديوش فاطمة لي كانت كتنحط و تبكي... ولكن ماعندو كيف يدير قدام ربعة ديال الرجال صحاح... جروه بستة و ستين كشيفة و دارو ليه الحديد و تقلوه باش مايهربش... وقف قدام الوالي كيخنزر فيه...
الوالي بغضب: كنتو متافقين يا النصابة باش تخطفو لي بنتي من وسط قصري... و ماحشمتوش..
خليل بنفاذ صبر: حنا مامتافقين معاه ما كانعرفوه.. تلاقينا فالصحراء و كنا تالفين حتى جا هو و قرر يوصلنا لبغداد...
الوالي: كتتتضحك عليا ولا.... و باش غاتبين ليا صدق هاد الكلام؟
خليل: نجيب ليك بنتك و نجيب ليك الحصان من الفوق... ولكن بشرط ديك البنت لي معايا ماتبقاش فزنزانة...
الوالي: غانخرجها و غانحطها فغرفة في الجناح ديال الخدم ماتخرج ماتدرج ماكلتها توصل ليها كل نهار...
غانمهلك عشر ايام... ولكن ايلا مشيتي حتى هربتي و لا جيتي طويل غانقتلها فالبلاصة و نقتلك حتي نتا فينما كنتي!!
خليل بصوت كيزلزل : أنا قابل...
الغد ليه بعدما وجدو الخدم لخليل جمل و المأونة ديال عشر ايام ديال الطريق... قرر يدوز عند فاطمة يطمأن عليها عاد ينطلق للرحلة... و هذا ما كان دخل عليها للبيت لقاها مربعة رجليها و كتشوف فالسرجم...
حكى ليها شنو طرا...
قررات تتيق فيه حيت عارفاه ماعمرو يخيليها و كتيق فيه... عنقاتو بكل قوتها و همسات ليه فودنو "كنتيق فيك".
انطلق خليل داك الصباح للصحراء غادي للمجهول... كيحس بالضياغ... الماء و الماكلة قليلة... ذاكشي علاش خاصو يقتاصد... كانت الشمس حارقة و هو غي غادي بلا اتجاه... داز عليه النهار الأول و هو غي تالف و غادي فصحراء قاحلة كيقلب على عجوز خطف بنت الوالي...
فجهة أخرى داز النهار اللول على فاطمة و هي خايفة على خليل كتفكر فشنو يقدر يكون وقع ليه بوحدو فالصحراء و هو ما عارف فين يمشي...
فاقت النهار لي من بعدو مخسرة و كتشوف فالماكلة محطوطة حدى العتبة ديال الباب ولكن ماعندها شهية... جلسات حدى الشباك كتشوف فالسماء و تبكي بحرقة... حتى حطات حداها حمامة بيضاء كتشوف فيها بعويناتها و تدور وجهها... فاطمة بدورها قربات منها يديها كتدوز ليها على الريش ديالها بحنان...
الحمامة: علاش كتبكي؟
نقزات فاطمة من بلاصتها مخلوعة... حمامة كتنطق؟... حتى كتأكد بلي شافت العجائب ديال الدنيا كاملين فهاد العالم وكتجي شي حاجة كتگوليها ماشفتي واااالو...
رجعات حدي لحمامة كتقرب منها بالشوية و جلسات كتشوف فيها بتساؤل..
الحمامة: ماتخافي ماتدهشي... وصل ليا الخبر ديالكم حتى لعندي و جيت نقلب عليك حتى لقيتك فالقصر... أنا سميتي ياقوتة... و ناويا نعاونك باش تتغلبي على صويلح السحار...
فاطمة باستغراب: صويلح السحار؟؟!
ياقوتة: هذاك راه واحد السحاار... و كذااب شلاهبي... خرج هو و ديك مرتو الممسوخة و مشى للجبال و المغارات يتعلم السحر... هانتي أ مولاتي شوفيني أنا و سوليني لي لاقاني ربي بيه... سحر ليا ولد لحرام من فعلو رجعني حمامة... نظل ندور في البلاد نقلب على لي يفك عليا لعنتي و مالقيت...
فاطمة بدهشة: و دابا شنو المعمول ؟؟
ياقوتة: أنا عارفاه فين غايكون دابا
فاطمة : عافاك اياقوتة لاما عتقي خليل و وريه بلاصتهم....
ياقوتة: أنا غادا دابا نقلب عليه و غانعاونو بإذن الله و نجيو سالمين غانمين...
طارت مخليا فاطمة كتفكر.. واش هاد الحمامة غاتكون بصح جايا تعاونها و لا جايا تغرقها... ولكن شنو غاتعمل... غاتسنا حتي تشوف شنو غايطرا.. و تدعي فخاطرها باش ماتكونش هادي شي حيلة جديدة من عند فراق لعواد...
أنت تقرأ
حفار القبور💀مكتملة💀
Horror💎مكتملة💎 ❌حصرية على الواتباد❌ 🌛حصريا خلال شهر رمضان المبارك🌜 قصتي بدات من زمااان.. ايام كان يطرا غير لي ما فالحسبان.. ايام كان الود بين الفتية و الصبيان.. ايام العز و الشان و المرشان.. كانو الرجال مايضورو الا بالسلهام.. و العيالات مقفول عليهم ال...
