حفار القبور💀مكتملة💀

💀الجزء 30💀

💀ﺣﻔﺎﺭ ﺍﻟﻘﺒﻮﺭ💀
🔰El Yakut
  ▫Part 30

عند خليل لي كان جالس بالقرب من واحد الواحة شاد راسو بين يديه كيحس بالاحباط... لحد الآن كيحس بواسو تالف... ماعارف لا فين يمشي لا فين هو... كيحس بحالا السخانة بدات كتشد فيه و عينيه كيتغمضو راسهم... بانت ليه واحد لحمامة بيضاء وقفات ليه فوق فخضو... بدا كيشوف فيها باستغراب.. ياك لحمام ديما خواف؟؟

الحمامة: السلام عليكم... أنا مسيفطة ليك من طرف فاطمة... جيت ندلك علي الطريق...
ناض خليل ببرود كيضرب فراسو...
خليل: صبر أ خليل شوية ماتحماقش راه باقي ليك طريق طويلة... ونتا ولا يبان ليك لحمام كيهضر...

مشا باغي يهز الجمل ديالو و يزيد فحالو حتي نقزات عليه لحمامة كتنقبو من راسو...
الحمامة: سمممعنييي... أنا ياقوتة و جيت نعاونك قصتي قصة طوييلة بعد ما كنت بنت عادية و مسخني صويلح السحار.. ولكن ماغانعاودهاش ليك دابا... ماعندنا وقت نضيعو خاصنا نلقاوه داغيا باش نفكو بنت الوالي...

بقا خليل كيشوف مخنزر... ملي دخل لهاد الجايحة و هو من مصيبة لمصيبة... ها بنت صغيرة تحولات لقتالة فرمشة عين... ها راجل مزوج حصان... ها حمامة كتهضر... صافي شوية يزهق ليه الفرخ.... كيحس براسو عايش فألف ليلة و ليلة...
خليل: الله يخرج هاد لعجب على خير... انا ماغانسولك لا على قصتك لا على فين تلاقيتي فاطمة... وريني غي داك المحتال فين راه و بسلامة ماتعرفيني مانعرفك...
ياقوتة:نعل الشيطان و برد... بعدا أنا سميتي ياقوتة... و أنا عارفة فين كاين المخدع ديال صالح... هو مابعيدش بزاف...واحد يومين ديال الطريق و نوصلو.. و دابا ياله على بركة الله...

مشا هو و ياها مايهضرو مايتكلكو...حيت هو ماشي مسطي يدير راسو فحمامة يتبادل هو وياها اللغى و الحديث...
داز عليهيومين تكرفس فيهم بالمزيان... الريح و العجاج... الشمس مطنطنة فوق راسو و السخفة ديال الجوع... كان خليل كيفرتت لياقوتة شوية من الخبز فالماء و يعطيه ليها و كياكل حتى هو شوية... قهرو الجوع ولكن بقا صابر... حتى لليوم الثالث لي لقاو فيه راسهم فواحد التلة رملية كبيرة...

ياقوتة: ها حنا وصلنا... تحت من هاد التلة كاين الخيمة ديال صالح... سنين هادي و انا متبعاه كنعرفو فين كيمشي و يجي... و هو ديما كينصب الخيمة هنا حيت قريبة من واحد الواحة...
هبط خليل بالشوية راكب فوق الجمل ديالو حتى كاتبان ليه الخيمة ديال صالح بعيدة منو بمسافة قليلة...حداها واحد الواحة....

بدا كيحاول يقرب باش يعرف آش طاري حتي كاتبان ليه بنت الوالي جالسة كتسگي من الواحة و تبكي بحرقة...
دخلات الجرة ديال الماء للخيمة و عطاتها لصالح لي خواها ليها فوق راسها و آمرها تعاود تعمرها...
كيتمتع بالتعذيب ديالها...
لحد الآن كان كلشي عادي...خليل جبد السيف ديالو مستعد باش ينحر هاد السحار... و لكن طرى لي ماكان فالحسبان... جاو قطاع الطرق و اللصوص ديال الصحراء... ماعرفهم منين تسلطو...
جاو دارو السطو علي الخيمة هزو گاع داكشي لي كان فيها من متاع..حتى الحصان الخشبي... و داو معاهم بنت الوالي لي غي كتفركل... أما صالح فقتلوه عصا و زادو فحالهم مخلين لعجاج...
قرر خليل مايستسلمش... ركب فوق الجمل ديالو بالزربة تابع اللصوص حتى دخلو لواحد المغارة دايرا بحال الكهف و دخلو معاهم گاع داكشي لي سرقو...

ياقوتة: شنو المعمول دابا؟ خاصنا شي طريقة كيفاش ندخلو باش نعتقو بدر البدور...
خليل: أنا كنفكر فواحد الخطة ولكن بغيتك تعاونيني..

شرح خليل لياقوتة الخطة ديالو و خلاها تقدي ليه الغرض أما هو فخلا الجمل ديالو مربوط.. ساس حوايجو كيقاد حالتو و كيتسنى ياقوتة ترجع عندو..

مشات ياقوتة دخلات للمغارة حتى لقات فين ساجنين بنت الوالي و مع هي صغيرة دغيا دخلات من الشباك...
و أكيد بعدما تصدمات بدر البدور من الحمامة لي كادوي و عاودات ليها ياقوتة قصتها بعجالة بداو كيهضرو علي الخطة لي دارها خليل باش يخرجها من هاد المكان..
ياقوتة: شوفي بغيتك تغوتي و تجدبي بأعلى صوت عنك و تديري راسك حمقة... هاذا المطلوب منك دابا و خلي اللصوص يشوفوك فهاد الحال و شي لاخر عولي على خليل هو لي غايكمل المهمة...

دارت بدر البدور شي لي قالت ليها ياقوتة و بدات تغوت و تجدب حتي خرجوها من السجن ديالها و داوها للرئيس ديالهم غي وقفات قدامو بدات تاني تغوت و دارت راسها حمقة بالمزيان...
الرئيس : واش هاد الكريثة تاني... هاد المجدوبة هادي شنو غانديرو بيها دابا ما هي صالحة لحتى حاجة !!

فهاد الأثناء كان خليل واقف قدام الباب ديال المغارة... تعرضو ليه جوج حراس من اللصوص شدوه و كتفوه دخلوه عند الرئيس...
بانت ليه بدر البدور كتجدب... غي دخل شافت فيه و غمزت ليه و كملات التمثيلية...

ياله ألبنات لي عرفات الخطة ديال خليل نعطيها بوسة من عند فراق لعواد... وا اجتاهدو معانا 😂💜