💀ﺣﻔﺎﺭ ﺍﻟﻘﺒﻮﺭ💀
🔰El Yakut
▫Part 60 الأخير
📆 بعد مرور أربعين يوم 📆
دازو هاد الأيام صعاب بزاف على خليل و فاطمة و خلالهم أبطالنا ماتلاقاوش و لا مرة وحدة حيت هادو من العادات و التقاليد ديال العرسان.
كانت النفسية ديال فاطمة متحطمة و كذلك خليل... كل واحد فيهم كيحس بالغبينة.
فاطمة بدات كتأقلم بشوية بشوية مع الأجواء ديال القصر و ذلك بفضل زينب اخت خليل لي دارتها بحال ختها و كتمشي عندها يوميا تدوز معاها الوقت..
حسات فاطمة براسها فعالم آخر خصوصا... كلشي عاطيها قيمة و كيحتارموها... و عندها وصيفات مكلفين باش يجهزوها للنهار ديال العرس... كانو كيديرو ليها الوصفات لشعرها باش يطوال حتى وصل ليها حد كتافها... و اعتناء بالبشرة يوميا حتى مبقاوش فيها آثار ديال التعذيب و الضرب و ولات كتشعل.
بمرور الوقت بدات كتنسى الهم و تتسنى الوقت ايمتا تشوف خليل مرة أخرى و هاد المرة غاتبقي معاه و هما ماشي تحت التهديد و لا خايفين على حياتهم.
أما بالنسبة لخليل فكان مشغول بزاف بالمراسم ديال الدفن و الجنازة و ماكيساليش... ديما مع الوزراء كيتناقشو و قرر انه العرس ديالو مع فاطمة غايكون مباشرة بعد حفل التتويج بنهار.
حتى هو كيحس بلي عندو نقص فاش مابقاش كيشوفها ولكن ماعليه غير الصبر حيت كلشي غايتحل و غايتلاقى أخيرا بحبيبتو و يعنقها يشم ريحتها و يبقي معاها للأبد كيفما تمنى.
اليوم هو يوم التتويج من بعد أربعين يوم ديال الحداد و الحزن المخيم على قصر... رجعات الأمور لطبيعتها.
يوم الجمعة... فاق فيه خليل بكري لبس العمامة ديالو و مشى يصلي الصبح و بقى تما كيقرى القرآن حتى قرب الظهر... دار الامام خطبة الجمعة و صلاو عاد ركب خليل فوق العود و داز بين الطريق لي كيفرق المسجد مع القصر و الناس مجموعين كيهتفو بسيمتو .
" عاااش خلييل عاااش سيدنا عاااش السلطان "
الكل فرحانين كيشوفو فالسلطان الشاب و هو كيشير ليهم و الابتسامة ماخطاتش وجهو حتى وصل للقصر و لبسوه العمامة الملكية ديال الحاكم و جلس فوق العرش كيجيو عندو المعارف و الناس لي مقامهم كبير فالبلاد يسلمو عليه و يباركو ليه.
بينما فالطرف الآخر فاطمة كانو مخرجينها من الحمام بالزغاريت و الصلاة و السلام على رسول الله.
كانو معاها العيالات هازين القصاعي مذهبين فوق راسهم فيهم الحنة و كل قصعة فيها جوح بيضات كيشطحو بيهم..
دارو شوية ديال الحنة لالة العروسة فيديها و رجليها بشكل زوين و ممعيقش... و دارو ليها شعرها على شكل جوج ضفرات و جمعوهم بالصوف.
دازت ليلة الحنة زوينة و مع الشيخات و الغناء و الشطيح و الرديح... كلشي فرحان و النشاط حتى شاط.
جمعو و طواو بكري باش ماتعياش لعروسة حيت باقي تابعها شلى خدمة.
الغد ليه كان هو النهار المنتظر... العرس الأسطوري ديال السي خليل و لالة فاطمة.
الناس فالمملكة فرحانين و جايين من بعيد يشوفو العرسان.
كلشي داز فطابع تقليدي.. بالأهازيج و الغناء التقليدي..داكشي متول و مصايب.. خرجو العرسان ديالنا راكبين فالهودج كيحيو الشعب.. و الناس كيهتفو...
عاد دخلو للقصر يكملو القصارة و عيساوا بالبنادر و الطعارج من وراهم كينشطو الجو و يحميوه...
و الدفوع شمنك يا ذهب و فضة و تكاشط و لباسي داكشي الرفيع...
فالأخير جلسو العرسان فالبرزة شربو لبعضهم الحليب و كلاو التمر... عاد مشاو للجناح ديالهم تحت الزغاريد و الأهازيج...
حطات فاطمة يديها فالدقيق و مرمرتها عاد رماتها علي عين قفاها و دخلو للمضجع ديالهم مخلين الناس برى مكملين الاحتفالية و البارود كيتطلق فالسماء.
جلسات فاطمة فوق الفراش حشمانة بينما خليل حيد السلهام و العمامة مخلي راسو لابس غي السروال ديال الجبادور من الفوق عريان...
قرب منها حيد ليها الحجاب لي مغطي ليها وجهها و باسها من راسها عينيه كيبريو و كيشوف فيها بحب عارم أما هي فحناكها مزنگين و فمها حميمر فيه السواك و عينيها كبار ولاو دايرين كيف لغزال مع التكحيلة لي دارو ليها.
جلس حداها و شد ليها فيديها...
خليل بحب : بغيت نشري ساعة مالقيت ماحسن من الساعة لي شفتك فيها... اليوم غانبدل وسادتي و نديرك بلاصتها... قلبي و عقلي تناقشو عليك... هدا كيبغيك ر لاخر كيموت عليك.
فاطمة: ماعرفتش كيفاش غاتغيب بلا مانزيد نتعلق فيك... بغيتك بقلب صافي و مابغيت والو من غير أنك تكون ديالي... دق قلبي ليك قبل مانعرف مكانتك و لا شكون نتا.
خليل كيقرب ليها: لي تربات على القناعة ماعمرها تكون طماعة.
حبهم بدا وسط دوامة من الخوف و الحزن و المصاعب... و هاكذا كان أقوى... واجهو كلشي مع بعضياتهم... و دابا جازاهم الله على الصبر و المحاين..
خلي قلبك كبير و بغي لبنادم الخير فهاد الدنيا بالنية سير و دير راسك دلو تعرف اشنو فقاع البير و تعرف آش فراس الغير و للي ظلمك وكل عليه الله هو ولي التدبير.
ناضت فاطمة حيدات ديك التكشيطة و الذهوبات لي كانو متقلين عليها بقات غي بكسيوة خفيفة بيضاء ديال الحرير و خلخال كتشوف فخليل لي ضحك ليها و هزها بين يديه بالشوية خايف عليها بحالي غاتهرس.. مع هي رقيقة و جسدها صغير خاف عليها من راسو و من جسمو الضخم.
بينما هي حسات بالأمان و بلمستو الدافئة فوق بشرتها الحليبية.
حطها فوق الفراش و اعتلاها مخليها كتشوف فيه و كتلعب بشعرو الطويل بين يديها.
بينما هو قرب ليها بالشوية و حط شفايفو فوق الكرزتين ديالها بقبلة حنينة.. قبلة سطحية بريئة و دافئة خلات دموعهم يطيحو فنفس اللحظة و يتخلطو .. دموع فرح.. كيحسو بأنهم و أخيرا نجاو بالمعنى الحرفي.
و هاكا تسدلو الستائر و امتزجت أرواح خليل و فاطمة فديك الليلة لي كتصادف اكتمال القمر... ديك الليلة الحمراء.
توتة توتة سالات الحدوثة.
✴ النــــــــــــــهـــــــايــــــــــة ✴
كانت هاد القصة خفيفة ضريفة نتمنى تكون نالت استحسانكم و استمتعتو بيها.
إن الله مع الصابرين.
كيمثلو الشخصيات الشريرة فهاد القصة العراقيل لي ممكن نتعرضو ليها فحياتنا بينما الأبطال هما حنا... حنا أبطال حياتنا و قصتنا الخاصة.
شكرا على حسن المتابعة بنفزجياتي... كل وحدة كملات الرحلة و وصلات هنا تقدر تحيد حزام السلامة على سلامتكم راكم رجعتو سالمين😹.
بغيتكم تحطو ليا آراءكم و تعليقات تفرحني... كل وحدة تقول رأيها فالقصة
أنت تقرأ
حفار القبور💀مكتملة💀
Horror💎مكتملة💎 ❌حصرية على الواتباد❌ 🌛حصريا خلال شهر رمضان المبارك🌜 قصتي بدات من زمااان.. ايام كان يطرا غير لي ما فالحسبان.. ايام كان الود بين الفتية و الصبيان.. ايام العز و الشان و المرشان.. كانو الرجال مايضورو الا بالسلهام.. و العيالات مقفول عليهم ال...
