💀ﺣﻔﺎﺭ ﺍﻟﻘﺒﻮﺭ💀
🔰El Yakut
▫Part 45
فالصباح الباكر فاق خليل بكري... لبس لفاطمة حوايجها مخليها ترتاح و خرج يقلب على الماء و على شي حاجة يقدرو ياكلوها...
لقى واد صغير قريب من الكهف و اشجار فيهم بعض الفواكه..
كانت الغابة استوائية بامتياز مع صوت القردة و الطيور...منظر خلاب من صنع الخالق.
رجع للكهف لقى فاطمة حلات عينيها ناويا تنوض.
ماگال ليها والو و زاد مخليها كتشوف فيه.
جبد دوك الفواكه نقاهم و حطهم فورقة صغيرة مع شوية الماء... حط داكشي قدامو و شاف ففاطمة باش تجي تاكل معاه.
مشات كتجري كتاكل بنهم... و تفكر فشحال من يوم ماذاقت النعمة.
فاطمة كتشوف فخليل بندم: خ...خليل.
خليل ببرود: اممم
فاطمة: حلمت بلي واحد الدب كان معنقني و أنا ناعسا... كان دافي و و جسدو كبير.
خليل: مزيان ملي عنقك هاد الدب من البرد.
ناض بعد ما كمل ماكلتو مخليها كتبقلل الدغمة واحلة ليها... تأكدت بلي ظلماتو و جرحاتو بزاف... رغم ذلك كيبقى راجل بكرامتو و هي حملاتو مسؤولية شي حاجة ماكان عندو دخل فيها.
ناضت بالزربة بحال شي بنيتة صغيرة عنقاتو من ضهرو جامعا يديها على خصرو.
فاطمة بأسف: يمكن عرفت شكون هاد الدب لي عنقني... دب ضريف و حنين...ههه خليل عافاك مابغيتش نزيدو نعقدو المسائل... أنا ماكنتش واعية بشنو قلت... خليل سمح ليا هاد المرة عارفة بلي هنتك.
ضار عندها كيشوف فيها... كان نيفها حمر و عينيها مغرغرين كتشوف فيه بنظرات خلاو قلبو يدوب... تنهد و ربت ليها على راسها.
خليل: صافي بلاماتغبني... بلاني بيك الله...اللهم بخوشة وْ تونس ولا ياقوتة وْتْهَوَّس.
و دابا ياله... وجدي راسك خاصنا نعرفو فين حنا.
ياله بغا يتجه للمدخل ديال الكهف بانت ليه واحد الحجرة ضخمة حبسات عليهم الطريق... ماكين مخرج إذن...
حاول يدخل للداخل ديال الكهف باش يشوف شنو كاين لايلقاو منين يخرجو و أمر فاطمة تبقا فبلاصتها تتسناه.
حتى جا عندها كيعيط ليها تتبعو.. وقفو بجوجهم مبهوضين قدام واحد الحيط كبير لداخل فالجبل... كلو رسومات و رموز...
رموز قصتهم تعود لآلاف السنين... رسومات واضحين... كيحكيو قصة قديمة.
قصة طرات هنا فهاد الجزيرة..
قصة أتوما و ماتو... جوج خواتات كيفتنو بالزين كانو مزوجين بالحاكم ديال القبيلة لي عاشت فوق هاد الجزيرة.
كانو كيتميزو بعيونهم الآسيوية المثيرة... فداك الوقت تفتن بيهم الحاكم و تزوجهم بالغصب بجوجات... كان بالنسبة ليه المرأة هي داك الجسد لي كيفرغ فيه رغباتو و شهواتو.
جا النهار لي عشقات فيه أتوما واحد من حراس الحاكم و بدات قصة حب بيناتهم ماكملاتش على خير فاش حصلهم وسط فراشو... قتل الحارس و هز أتوما شاف فيها بحقد
الحاكم: واس كيسحاب ليك بلي نتي زويينة؟
هز السيف ديالو شرگ ليها فمهل من لودن لودن و لاحها يفرسوها لكلاب.
أما ختها ماتو مشات ضحية غي حيت كتشبه ختها و قطعها الحاكم بكل وحشية لطروفة و انتقاما شوى من لحمها و كالو و عطى منو لگاع الناس لي فالقبيلة.
هادي كانت حكاية الحاكم لي مرسومة بالرموز و مكتوبة فالجدار الكبير..نظرا لأن خليل مطالع على بزاف ديال اللغات فقدر انه يترجم القصة لفاطمة لي غي كتشوف بتعجب فأفعال هاد الحاكم الوحش.
فهاد اللحظة بان ليهم بلي الجدار تحطم دقة وحدة و قدرو يخرجو من الكهف ولكن أكثر حاجة صدماتهم هي الظلام لي كان طايح.. هوما ياله فاقو كيفاش الظلام طاح بهاد السهولة.
فاطمة: خليل أنا مابغيتش نبقا غي مخبية فهاد الكهف... ايلا ماستكشفناش هاد الجزيرة راه ماغانخرجوش منها.
خليل كيتنهد: آش غانگول ليك... كنت ناوي زعما نستكشفو بنهار ولكن طاح الظلام كيفما شفتي...الشوف ما يبرد الجوف, والناقة ما ترضع الخروف... خاصنا نخرجو و نشوفو شكاين و لا غاتعفنو هنا.
شافو فبضياتهم كيشجعو ريوسهم و كل واحد استعد نفسيا عارفين بلي هادي غاتكون ليلة أخرى طوييييلة.
كانت الجزيرة كلها عامرة أشجار كثيفة لذلك أكيد غايكونو فيها حيوانات خطيرة... اتخدو الحذر ديالهم فكل خطوة و ضوء القمر هو لي معاونهم باش يشوفو طريقهم...
بقاو غادين حتى حسو براسهم كيقربو من واحد لبلاصة مافيهاش الشجر بزاف... حيت الأشجار غادين و كيتناقصو.
كان داك الموضع هو عبارة عن قرية صغيرة وسط ديك جزيرة و الغابة محيطة بيها..
كانت القرية مكونة من ديور صغار حدى بعضياتهم و كتبان مكان مسالم...
كتحس بالسعادة فاش كتدخل ليها خصوصا فاش كتشوف الجثث متساقطين فكل جيهة بحال الدبان.
الجثث!!؟
أنت تقرأ
حفار القبور💀مكتملة💀
Horror💎مكتملة💎 ❌حصرية على الواتباد❌ 🌛حصريا خلال شهر رمضان المبارك🌜 قصتي بدات من زمااان.. ايام كان يطرا غير لي ما فالحسبان.. ايام كان الود بين الفتية و الصبيان.. ايام العز و الشان و المرشان.. كانو الرجال مايضورو الا بالسلهام.. و العيالات مقفول عليهم ال...
