بين الماضي و الحاظر

16

بسيارة كانت مليحه صامته صمت غريب دق ناقوس الانذار بقلب عساف لايعلم مابها ؟...

فهد سال باهتمام / هاه شلون شفتو البنت وهلها ؟..

مزنه هتفت بحماس واعجاب / والله ماشاءالله تبارك الله ماتوقعت البنت بهذا الزين والعفه ربي يحبك يا عساف وهداها لك ..

عساف لف لوالدته بتوجس / وام المعرس وش رايها؟؟..

مليحه ردت بنغزى /اذا على الزين عزالله انه كاسيها من راسها لين اقدامها ولا الباقي مادري عنهم انت ادرى فيهم يامك ..

عساف تبادل النظرات هو ووالده فكلمتها كانت مقصوده واضحه ..

فهد زفر بحزم / المهم ترا حددنا الملكه مع عمها يوم الجمعه والعرس الجمعه اللي بعدها ...

مليحه انتفضت بصدمه كاسحة/ نعم العرس متى ؟؟..

عساف هتف بتحكم / الجمعه الجايه ليش ماهو مناسب لك؟..

مليحه زفرت بحده / اقول عاد لا هنيه وبس كانكم قمتم تصرفون من راسكم وانا اخر من يعلم بعد عشر ايام عرس اول واحد من عيالي وش يمديني اجهز ؟؟..

مزنه بتدخل / فعلاً والله مايمدي نحجز شي ليش العجله ؟..

فهد تنهد بطولة بال / كل شي ملحوق عليه وعشر ايام يمديكم تجهزون وترتبون الوضاع..

مليحه برفض قاطع / مستحيل اوافق مافيه عرس الا بعد شهر ولا شهرين وهذا انا علمتكم..

عساف تافف بضيق / لاحول ولاقوة الا بالله ..

فهد استدار للخلف وعطا مليحه نظرت توعد وهي شاحت نظرها عنه ولا همها..

من وصلو امام البيت نزلت مليحه بغيظ تتبعها مزنه

فهد لف وناظر لملامح عساف الكاتم عصبيته..

تنهد با ابوه / يابوك ترا امك معها حق تبي تفرح فيك وتفخم زواجك وبعشر ايام مايمدي تسوي شي..

عساف ناظر بعينين والده بوجع / يوبه انا لو علي مايهمني لو بعد سنه لاكن المره مريضه ومحتاجه علاج بسرع وقت وانا وعدتهم خلال سبوعين تبدا رحلة علاجها..

فهد هز راسه بحيره / والحل طيب مع امك كيف نقنعها؟؟..

عساف بذكاء وسياسه / هي واضح من دقها للكلام ان البنت ولا امها متكلمين عني وانت تعرف امي فطينه ماتفوتها الكلمه ..

فهد ابتسم بحب/ اي عزالله انك صادق لو سكتت الحين بتجي بكرا تسحبك بالكلام ..

عساف رد بتحكم / قبل لا تجيني انا لازم اروح و اقنعها حتى لو اضطريت ابلغها برحلة العلاج ..

فهد هتف باقتناع / زين تسوي مدام شافت البنت وعجبتها يمكن تقتنع ..

———————————————————