أنار لى عتمتى♥️✨

البارت ١❤️

نورهان قاعدة ف أوضتها مرهقة نفسياً وجسدياً .. بتقضى يومها بين ٤ حيطان وحيدة .. مبتعملش حاجة غير انها بتفضل قاعدة ساكتة حزينة ومهمومة يا اما بتحاول تشغل نفسها وتقرأ كتب .. فتحت فونها وبدأت تقلب ف مواقع السوشيال ميديا بملل لحد ما قابلت بوست ع الفيس بالصدفة مكتوب فيه ..

"حبيبتى .. تمنيتك حلم لا يرحل ،، تمنيتك نبض لا يستكين ،، تمنيتك روحاً لا تمل ،، تمنيتك أن تكونى عالمى الذى لا يرحل عنى ،، تمنيتك شعور جميل وإحساس صادق كبير لا يفارقنى ،، تمنيتك أن تكونى كل حياتى لا فقط  .. حبيبتى  ما أصعب الأمانى البعيدة وانتى أول أمنياتى المستحيلة
البعد مؤلم للغاية .. أحبك حب مريب تعيس يجعلنى أفكر بك طيلة أيامى وأوقاتى أتشعرين بى؟!💔
لا أعلم ما هى تفاصيل يومك .. اشتقت لكِ ولرؤيتك  .. استودعت ربى روحك التى أحببتها ليحفظك بحفظه"
Adham Al_Sayad✍🏻🖤

كلامه لمس قلبها وإحساسها .. كل كلمة هو كاتبها كانت حاسة انها بتديها بالقلم على وشها وبتيجى عليها بزيادة .. وف نفس الوقت اتمنت الحب دا ف حياتها .. هو لسا ف حد بيحب كدا؟ دخلت الكومنتات وشافت كومنت بيسأله عنها هى مين! مش عارفة كانت متلهفة جداً تشوف رده وفتحته بفضول .. كان رده كالآتى ..
"متجوزة💔اعتبرنى بكتب أى كلام زى الخواطر اللى بكتبها وعدى ياصاحبى"

مش عارفة ليه اتوجعت من رده! يمكن عشان هى كمان بتعيش نفس الوجع بس باختلافات بسيطة .. هى جوزها طلقها بعد شهر من جوازهم وسابها وسافر اتجوز برا لكن هو .. واضح انها مكنتش مكتوباله أصلاً ..

"أحياناً حوار النصيب دا بيبقى مؤلم وصعب أوى ف الحب بالذات .. يعنى ايه أفضل احب إنسان واستنفذ كل مشاعرى وطاقتى ف حبه وف الآخر يبقى نصيب حد تانى غيرى! ربنا يعوضك خير🖤"

فوقت من تفكيرى واكتشفت انى كتبت كل دا ف كومنت ونشرته من غير ما اخد بالى ولا احس باللى أنا عملته! أنا مفكرتش واتكلمت مع نفسى بس لا .. أنا ايدى تلقائى كتبت اللى بفكر فيه وحسيت بيه .. بعد دقيقتين بالظبط جالى رده عليا  ..

"هو بيبقى صعب اه بس دا مش معناه انه شر .. كل شئ نصيب وكل نصيب خير طالما بإيد ربنا .. يمكن يبقى الشخص دا مكتوبلى بس ف وقت تانى غير دلوقتى .. محدش عارف ايه الحكمة من اللى بيحصلنا ف حياتنا سواء حلو أو وحش بس الأكيد انه خير .. عموماً شكراً على كلامك ودعوتك دى ولكى بالمثل🖤"

عملت لاڤ للكومنت ومعرفتش ارد عليه بس فضلت اعيد قراءته مرة و٢ و٣ و١٠ .. كلامه بيوضح اد ايه هو إنسان ذوقه عالى وهادى وجميل وعنده إيمان كبير بربنا وان كل اللى بيحصل خير وصبور لأبعد حد .. أتمنى انى اقدر أوصل لنفس المرحلة دى من الرضا ف يوم من الأيام .. دخلت ع البيدج بتاعته مكنش حاطط أى صور شخصية لي حتى صورته الشخصية عبارة عن صورة لإيده وهو ماسك القلم على ورقة مكتوب فيها اسمه بخط مزخرف جميل  "𝓐𝓓𝓗𝓐𝓜" .. الاكونت عبارة عن خواطر كتير مكتوبة لحبيبته المجهولة وف قصص قصيرة وكتب وروايات بيقول انها نزلت للى حابب يشتريها .. واضح انه كاتب ممتاز ومشهور جداً والأهم من دا كله محبوب مشوفتش حد كاتبله كومنت وحش أو بينتقده مثلاً! .. جمعت كام كتاب لي وقررت انى اشتريهم لما انزل ف أى يوم .. عملتله فولو وخرجت من الفيس لقيت مسدج منه ع الماسنجر بيرحب بيا..!

"شكراً ع المتابعة .. نورتى البيدج🖤"
دا إنسان متربى ١٠٠٠٠ مرة باين🙂هو ف حد بيدخل يرحب بمتابعينه كدا .. والله انى اتشوقت اشوف وجه الجميل هذا😹فتحت المسدج ورديت عليه ...

نورهان : شكراً يا أستاذ أدهم منورة بيك🖤
أيوا حطتله قلب أسود زى ما هو حاططلى وبيحطه ف أغلب كتاباته وواضح انه بيحبه دا اللى لاحظته يعنى😌أنا ف قوة الملاحظة معنديش ياما ارحمينى بس حد يسكتنى ويمسك ايدى ولسانى عشان أنا اتغابيت دلوقتى وكتبت مسدج تانية متخلفة ...

نورهان : بس معليش يعنى ف السؤال هو ف حد بيدخل يرحب بالمتابعين كدا؟😹دا أنا بشوف المشاهير وهما بيقولوا مش ملاحقين نرد ولا نشوف مسدجات بحس ان الحوار معقد لكن انت ماشاء الله مبتفوتش كومنت من غير رد وحتى بتتكلم خاص

أدهم : هو صعب فعلاً عشان العدد الكبير بس أنا اتعودت على كدا خلاص دا غير انى بخصص يومين ع الأقل اجازة ببقى قاعد فاضى فيهم ومتفرغ للبيدج وارد ع الكل .. يعنى ف الأول و ف الآخر انتوا السبب ف وصولى للنجاح والمرحلة دى والفضل ليكوا انتوا بعد ربنا🖤

مش قولتلكوا ياجدعان متربى ١٠٠٠٠ مرة🙂أنا عايزة اقابل الكائن دا حالاً واقوله ودينى لأمك أبوس جزمتها ياسطا عشان ربت راجل محترم زيك نادر ف الزمن دا ...
نورهان : كلك ذوق والله بجد🖤ربنا يوفقك

فن الردود عندى ملوش حل بالله😌قفلت الفون وحطيته جمبى وحطيت راسى ع المخدة ونمت .. نمت وحسيت انى لأول مرة أنام مرتاحة بعد فترة تعب طويلة وقلة نوم .. يمكن كلامه هو السبب وفرق معايا مش عارفة بس كل اللى اعرفه ان كلامه فعلاً كان مشجع وحافز ليا .. بشكر الصدفة اللى حطت البوست بتاعه قدامى عشان ادخل اشوف كلامه وردوده ع الناس واعرف يعنى ايه رضا بقضاء ربنا وصبر .. صبر لعوضه وأنا هصبر واستنى عوض ربنا .. يارب اجبر خاطرى وخاطره وخاطر كل شخص مهموم ...

كدا البارت خلص♥️رأيكوا؟؟!!!....