كنت قاعدة ماسكة فونى ومستنياه ينزل الرواية أو أى بوست .. مش عارفة ليه بس بقيت متلهفة أوى انى اشوفله أى حاجة .. وأخيراً جالى إشعار انه نزل بوست .. فتحت اشوفه ...
" قبل ما ابدأ معاكوا الرواية الجديدة ف كذا حد سألنى هل الأغانى حرام؟! مبدئياً أنا مش شيخ ومش بفتى عشان بس الكومنتات السخيفة دى .. بس أنا هجاوب ع السؤال .. اه الأغانى حرام لأننا لما بنسمع موسيقى الموسيقى دى بتشتغل على جزء مهم جداً فينا بتشتغل على الروح نفسها والمشكلة ان الروح دى هى نفس المنطقة اللى بيعمل فيها الوحى اللى هو {القرآن} يعنى لو روحك اتأثرت بالموسيقى صعب تتأثر بالقرآن .. هبسطلكوا الموضوع أكتر وافهمكوا بمثال بسيط .. تخيلوا انتوا اتعزمتوا على بيتزا وشاورما أو أياً كان الأكل اللى بتحبوه هتلاقوه موجود ع السفرة بس هتاكلوه العصر وجيتوا الساعة ٢ قبل العصر كلتوا مثلاً ييجى ٨ سندويتشات جبنة تخيلوا هيحصل ايه! هتكون شبعت ومش هتعرف تاكل حاجة من الأكل اللى بتحبه صح! لما تقعدوا ساعتها قدام أكلكم المفضل مش هيعجبكم ومش هيكون ليكم نفس تاكلوا مش عشان سندويتشات الجبنة أحسن لا عشان المعدة اتملت وشبعت خلاص ف مهما كان ايه قدامكم مش هتقدروا تاكلوه خلاص مفيش شهية هتقولوا نفسنا ناكل بس شبعنا .. اللى هو بالظبط أنا نفسى افتح المصحف ،، أنا نفسى اقرأ قرآن .. من غير حرام وحلال وآراء علماء هى دى حقيقى خطورة الموسيقى .. لو غذيت روحك بالموسيقى والغُنا مؤكد مش هتشتهى القرآن ولا هتتأثر بيه .. يا تصبر على القرآن وتفتحه مراراً وتكراراً لحد ما ربنا يفتح عليك وتدوق حلاوته .. يا تستعجل وتاخد متعتك الوقتية من الموسيقى والغُنا .. وكمان الدليل من القرآن ف سورة لقمان {وَمِنَ النَّاسِ مَن يَشْتَرِي لَهْوَ الْحَدِيثِ لِيُضِلَّ عَن سَبِيلِ اللَّهِ بِغَيْرِ عِلْمٍ وَيَتَّخِذَهَا هُزُوًا ۚ أُولَٰئِكَ لَهُمْ عَذَابٌ مُّهِينٌ} وكمان سيدنا ابن عباس واللى كان من أعلم الناس وأفهم الناس للقرآن .. والنبى (ﷺ) دعا لي ان ربنا يرزقه الفقه ف الدين وفهم القرآن الكريم قال عن معنى لهو الحديث انه الأغانى وحديث آخر للحبيب (ﷺ) : {ليكونن من أمتى أقوام يستحلون الحر والحرير والخمر والمعازف}. دا دليل صريح قال فيه النبى (ﷺ) ان المعازف حرام وان هييجى زمان الناس تعتبرها حلال زى الوقت اللى احنا فيه دا ربنا يعصمنا من الفتن .. امال ايه الحلال؟! .. الأناشيد الدينية من غير موسيقى مش حرام .. لكن بموسيقى حرام مش عشان النشيد نفسه لكن عشان الموسيقى اللى معاها .. والأغانى لهو الحديث وان كانت من غير موسيقى فهى حرام لكونها لهو الحديث .. طب أنا عايز ابطل اسمع أغانى اعمل ايه بقى؟! .. زاحم الأغانى بسماع القرآن بصوت حد من القُرّاء بتحب تسمعله وأكثر من هذا السماع بالليل والنهار وهتلاقى نفسك مع مرور الوقت بتردده ف سرك وجهراً كمان .. وبعدها نعلى درجة ونحفظ سور من القرآن بتحبها واتلُ بها ف الصلاة وبركة القرآن هتكسر عنك قيود التعلق بغيره .. حاجة أخيرة ممكن حد يقولى أنا مثلاً بكون مخنوق ولما اسمع أغانى برتاح ليه أبطلها؟! هقولك هل جربت تبدل سماع الأغانى دى مثلاً بسماع سورة يوسف لقارئ صوته حلو وبيريح قلبك؟! جربها وهتحبها مع الوقت وهتلاقى ف هدوء وسكينة احتلوا قلبك وهتحس براحة .. الأغانى بتوصف وجعك اه لكن مش الدوا والعلاج للوجع دا مجرد مسكن بس .. لكن جرب كدا تواظب على سورة البقرة أو وِرد كل يوم وهتلاقى فرق كبير جداً ما بين راحتك المؤقتة ف سماع الأغانى وراحتك الدايمة والطمأنينة ف سماع القرآن
أنا آسف انى طولت عليكوا بس أتمنى تكون الرسالة وصلت وفهمتوها كويس .. استمروا ف الجهاد لأن جهاد النفس صعب وخصوصاً ف الأيام دى ومهما تقعوا قوموا من تانى الأهم انكم متستسلموش للهزيمة ولشيطانكم وتسيبوه يتغلب عليكم🖤✨ "
YOU ARE READING
أنار لى عتمتى♥️✨
Romanceروايتنا المرادى مختلفة .. عبارة عن مجموعة من القصص داخل بعضها من وحى خيال البطل بأحداثها وشخصياتها♥️
