أنار لى عتمتى♥️✨

البارت ٢❤️

" _هل وجدت حلاً..!؟
                              = نعم
_ماذا فعلت..!؟
                      = دعوت الله وكفى بالله وكيلا ".

لقيته منزل البوست وكالعادة الكلام لمس قلبى وحسيت جسمى قشعر .. دخلت الكومنتات لقيت واحد كاتبله انه بقاله فترة بيدعى بحاجة بيتمناها ولحد دلوقتى مش شايف أى استجابة .. دخلت اشوف رده كان صعب ومؤلم أوى بس ف كمية رضا مش طبيعية! وهو كالآتى ...

" أنا فضلت ٥ سنين ادعى بيها ف كل سجدة وبصلى قيام الليل عشان انولها وف الآخر بقت نصيب واحد تانى غيرى .. ف هل دا معناه انى ابطل ادعى أو أقول ليه يارب وافقد ثقتى فيه! مستحيل طبعاً .. أنا معرفش ايه حكمته ف ان دا يحصل بس واثق انه خير وهستناه يعوضنى .. بس الصبر ياصاحبى .. اصبر مهما طال صبرك بس تأكد انك ف الآخر هتنول نتيجة صبرك خير حتى لو مش الحاجة اللى كنت بتتمناها هيجيلك الأحسن منها "

أنا مش متخيلة يعنى ايه الإنسان يفضل سنين يدعى بحاجة وف الآخر مينولهاش وجواه كمية الرضا دى! أدهم بالنسبالى كان حاجة غريبة أول مرة اشوفها .. مش متخيلة ان ممكن واحد يحب واحدة بالطريقة دى لدرجة انه يفضل ٥ سنين يدعى بيها ويقيم الليل مخصوص عشانها وف الآخر متبقاش نصيبه ومع ذلك لسا بيحبها؟ ..

لقيت الولد رد عليه بسؤال تانى ..
" معاك حق فعلاً .. بس المشكلة انى مش عارف انتظم ف الصلاة .. بصلى اه بس لو صليت مرة بسيب ١٠ .. انتظمت ازاى! "
كنت متلهفة اشوف رده لأن يمكن أنا كمان كدا ومستنية حاجة تشجعنى أو تدينى دفعة للانتظام .. وكان رده كالآتى ..

" أيقنت أن لا أحد يقبل لقائى خمسة مرات ف اليوم بجميع حالاتى : سعيد ،، حزين ،، مكسور ،، ضعيف ،، قوى .. سوى أرحم الراحمين🖤
دى إجابة لكن هسألك أنا سؤال وآسف على قساوته .. انت لما بتزعل من حد بتتجاهله شوية وترجعله تانى ويمكن يكون غلطان ف حقك غلطة كبيرة وبردو بتسامحه ومش قادر تستغنى عنه .. طب ربنا بقى أذاك ف ايه! ماذا فعل الله لك كى تتجاهله؟! دا بينادى عليك ٥ مرات ف اليوم عشان يشوفك ويسمعك ف خلال دقايق والله مش هياخد من وقتك كتير "

ملقتش رد تانى من الولد لأنه غالباً معرفش يرد تانى وعنده حق .. السؤال كان قاسى فوق القسوة قسوة .. أنا حسيت بحاجة بتجرى على وشى! دموع! أنا عيطت من غير ما احس من قساوة السؤال وسألته لنفسى تانى .. هو أذانى ف ايه فعلاً..!؟ دا حتى اسمه الرحمن الرحيم .. مستنتش ثانية كمان وقومت جرى اتوضيت وفرشت سجادة الصلاة وبدأت أصلى بخشوع ولما سجدت محستش بنفسى غير وأنا بعيط بانهيار وبقول كل حاجة جوايا واشكيها لربنا .. خلصت صلاة وأنا حاسة براحة نفسية رهيبة .. حسيت انى عايزة اشكره .. مسكت الفون وفتحت الشات بينى وبينه وكتبتله ..

" شكراً🖤 "
رد عليا بعد دقايق وهو بيسألنى باستغراب ..
" على ايه؟! "

نورهان : على حاجات كتير🖤البوست بتاعك ظهرلى فجأة ودخلت البيدج فيها كلام يطيب الخاطر وردودك ف الكومنتات تريح القلب بس أنا دلوقتى بشكرك بشكل خاص على آخر بوست نزلته النهاردة وردك على الولد اللى سألك ازاى انتظم ف الصلاة .. سؤالك كان قاسى أوى بس ف نفس الوقت كان حافز .. أنا قومت صليت وقولت كل اللى نفسى فيه .. كل دا بفضلك انت من غير ما تحس
 
أدهم : الفضل لله وحده .. كلامى ماهو الا سبب ربنا حطهولك قدامك صدفة زى ما انتى بتقولى عشان لسا بيحبك وعايزك ترجعيله .. بس عموماً أنا اللى بشكرك على كلامك اللطيف دا لأنه بجد فرحنى جداً🖤شكراً

مردتش عليه بس فضلت متنحة للمسدج! ربنا بيحبنى وعايزنى! أنا يارب! دا أنا أول واحدة انهارت ساعة طلاقى وكنت أول واحدة بلعن الحياة والظروف لو وقعت ف أى مشكلة .. دموعى نزلت بصمت وسمعت صوت مسدج تانية منه زى ما يكون فهم سكوتى!

أدهم : متفكريش وتسألى نفسك كتير .. أيوا ربنا بيحبك وعايزك .. لو مش بيحبك مش هيبتليكى ويحطك ف مشاكل  .. احنا بنى آدمين مش ملايكة ووارد نضعف وييجى علينا وقت نتساءل فيه هو ليه بيحصل كدا؟ ويجيلنا لحظات ضعف وانهيار بس المهم ف الآخر اننا نقدر نقاوم كل دا ونقوم نقف تانى أقوى من الأول ويكون عندنا ثقة فيه🖤ربنا يقويكى ويثبتك على طاعته

أنا ضحكت وأنا بعيط بس المرادى دموع فرحة .. أنا كنت بقول امتى هعيط من الفرحة يارب واجرب الإحساس دا وادينى اهو دلوقتى جربته وحسيته! مش عارفة اقوله ايه واشكره ازاى أو اشكر ربنا ازاى ع الصدفة دى وانه حطه ف طريقى!♥️

نورهان : هو أنا ممكن أسألك سؤال!
أدهم : اتفضلى
نورهان : هو انت دكتور نفسى؟!😹

أدهم : لا والله😹أنا دكتور اه بس أطفال مش نفسى
نورهان : 😳ايه دا بجد؟! يعنى الكتب وكل دا مش هو دا شغلك ومصدر دخلك بس!

أدهم : لا طبعاً دول كانوا هواية بالنسبالى عمرى ما اعتمدت عليهم كمصدر دخل .. أنا خريج طب أصلاً .. وبعدين مصدر دخلى من الكتب وكل دا مش المبالغ اللى هى انتى متخيلاها أنا لو اعتمدت عليهم هشحت مش هعرف افتح أوضة حتى😹

نورهان : 😹اه معليش ساعات بيجيلى لحظات غباء كدا اعذرنى .. بس اشمعنا اختارت تخصص أطفال؟!
أدهم : بحب الأطفال جداً وبرتاح معاهم .. لما بيجيلى طفل مرة وييجى تانى مرة يطلبنى أنا مخصوص بالإسم ومش عايز غيرى دى كفاية .. حضنهم ليا حياة .. تفاصيلهم الصغيرة دى عندى بالدنيا🖤

ابتسمت من كلامه ولسانى تلقائى ردد دعوة لي بأنه يعوضه خير ويرزقه باللى تستاهله ويرزقه بالذرية الصالحة .. واضح انه هيبقى أب جميل وحنين أوى🖤

كدا البارت خلص♥️رأيكوا؟؟!!!....