أنار لى عتمتى♥️✨

💔🇵🇸🇵🇸فلسطين🇵🇸🇵🇸💔

اوعى تيأس .. فوق .. "فلسطين قضية مش تريند"
ربنا سبحانه وتعالى قال ف سورة الإسراء .. {وَقَضَيۡنَآ إِلَىٰ بَنِيٓ إِسۡرَٰٓءِيلَ فِي ٱلۡكِتَٰبِ لَتُفۡسِدُنَّ فِي ٱلۡأَرۡضِ مَرَّتَيۡنِ وَلَتَعۡلُنَّ عُلُوّٗا كَبِيرٗا}. دا خلاص حصل .. وقضينا ف الكتاب ان بنى إسرائيل هيفسدوا ف الأرض مرتين وهيبقوا عاليين علو كبير .. { فَإِذَا جَآءَ وَعۡدُ أُولَىٰهُمَا بَعَثۡنَا عَلَيۡكُمۡ عِبَادٗا لَّنَآ أُوْلِي بَأۡسٖ شَدِيدٖ فَجَاسُواْ خِلَٰلَ ٱلدِّيَارِۚ وَكَانَ وَعۡدٗا مَّفۡعُولٗا}. وأول مرة دى حصلت أيام الصحابة خلاص .. هنا ربنا بعث عليهم عباداً لنا .. {ثُمَّ رَدَدۡنَا لَكُمُ ٱلۡكَرَّةَ عَلَيۡهِمۡ وَأَمۡدَدۡنَٰكُم بِأَمۡوَٰلٖ وَبَنِينَ وَجَعَلۡنَٰكُمۡ أَكۡثَرَ نَفِيرًا}. هنا ربنا بيقولهم هخليكم تانى انتم الأكثر نفيرا وهما فعلاً دلوقتى إسرائيل معاهم فلوس وعيال كلهم ف الجيش وعددهم أكبر من الفلسطينيين ومعاهم الإعلام والأسلحة وكل حاجة .. {إِنۡ أَحۡسَنتُمۡ أَحۡسَنتُمۡ لِأَنفُسِكُمۡۖ وَإِنۡ أَسَأۡتُمۡ فَلَهَاۚ فَإِذَا جَآءَ وَعۡدُ ٱلۡأٓخِرَةِ لِيَسُـُٔواْ وُجُوهَكُمۡ وَلِيَدۡخُلُواْ ٱلۡمَسۡجِدَ كَمَا دَخَلُوهُ أَوَّلَ مَرَّةٖ وَلِيُتَبِّرُواْ مَا عَلَوۡاْ تَتۡبِيرًا}. المرة التانية بقى اهى لما يفسدوا ف الأرض اللى هى آخر مرة هيفسدوا فيها .. ان شاء الله المسلمين هيدخلوا المسجد نفس الدخلة اللى دخلوها أيام الصحابة ان شاء الله .. اللى بنيتوه وعملتوه وأسلحتكوا وكل دا هيتنسف ف الأرض .

ف الوقت الحالى اللى احنا فيه دا .. ف ناس كتير ممكن ييجى ف دماغها تساؤلات خطر جداً زى مثلاً .. " هو فين حكمة ربنا سبحانه وتعالى! .. فين نصر ربنا؟ .. هو ربنا مش قادر ولا ايه! " والشيطان بقى يضرب بكل قوة والسؤال الأكثر تداول "هو ربنا سايبهم ليه!"

تعالوا شوفوا القرآن ازاى بيعالج القصة دى .. الصحابة بعد غزوة بدر وقع ف قلوبهم كدا خلاص احنا مسلمين وهما الكفار .. احنا قليلين أو كتار احنا بعد كدا هننتصر ف أى غزوة خلاص .. ربنا معانا احنا اللى على الحق .. نروح نكسب ناخد الغنايم ونرجع .. أظن ان الخوف اللى كان عندهم وهما داخلين غزوة بدر مش هو نفس الخوف اللى كان عندهم وهما داخلين غزوة أحد .. ف غزوة أحد فجأة الصحابة تُقتَل وينتشر خبر قتل الرسول "صلى الله عليه وسلم" تخيل بقى المشهد بعد الغزوة! سكوت .. الدم ف كل حتة "دم المسلمين" .. قتلى كتير أوى وشهداء كتير أوى مرميين ع الأرض .. ناس انت بتحبهم فعلاً .. مصعب ابن عمير ،، سيدنا حمزة تؤكل كبده! اتفتح بطنه .. و٧٠ من المسلمين يستشهدوا؟ ايه دا؟ ايه اللى حصل! هو مش احنا المسلمين وهما الكفار! احنا اللى يحصل فينا كدا؟ ليه يحصل فينا كدا؟ هما مش الشهدا دول حرام يموتوا كدا؟ الشيطان عمال يضرب بكل قوة .. أصل انت دلوقتى بتتكلم ف قدر فهو متكيف أوى ..

شوف بقى ربنا قال ايه ف سورة "آل عمران" (ياريت اقرأوها من أول الآية ١٢٠) بتعالج فعلاً ابتلاء شديد كان عند الصحابة .. هوضح كام آية ومشهد بسيط بس منهم عشان منطولش أوى .. انت مثلاً قاعد بتعيط ع الشهدا .. ازاى يحصل فيهم كدا؟ ليه يحصل فيهم كدا؟ تلاقى ربنا سبحانه وتعالى يقول .. هما دول اللى انت بتعيط عليهم .. "فرحين عند ربهم يُرزقون" .. {وَلَا تَحْسَبَنَّ الَّذِينَ قُتِلُوا فِي سَبِيلِ اللَّهِ أَمْوَاتًا}. ايه! اللى أنا عمال اعيط عليهم! .. {بَلْ أَحْيَاءٌ عِنْدَ رَبِّهِمْ يُرْزَقُونَ} .. {فَرِحِينَ} .. اللى أنا عمال اعيط عليهم دول هما نفسهم فرحين! دا كدا أنا اعيط على نفسى ان أنا مش معاهم ولسا موجود هنا .. {فَرِحِينَ بِمَا آتَاهُمُ اللَّهُ مِنْ فَضْلِهِ وَيَسْتَبْشِرُونَ بِالَّذِينَ لَمْ يَلْحَقُوا بِهِمْ مِنْ خَلْفِهِمْ أَلَّا خَوْفٌ عَلَيْهِمْ وَلَا هُمْ يَحْزَنُونَ} .. بعد ما كنت بعيط عليهم بقيت بعيط على حالى ان أنا مش معاهم .. {وَلِيَعْلَمَ اللَّهُ الَّذِينَ آمَنُوا وَيَتَّخِذَ مِنكُمْ شُهَدَاءَ ۗ} .. الموضوع طلع اصطفاء من ربنا سبحانه وتعالى .. اللى ماتوا دول أصلاً ربنا مختارهم عشان ياخدوا المكانة دى .. {وَاللَّهُ لَا يُحِبُّ الظَّالِمِين} .. يعنى ممكن اكون أنا اللى عملت حاجة غلط ف مبقتش معاهم .. ييجى يقول طب ماشى ليه ربنا اختارنا احنا مختارش حد تانى من الكفار مثلاً .. {أَوَلَمَّا أَصَابَتْكُم مُّصِيبَةٌ قَدْ أَصَبْتُم مِّثْلَيْهَا قُلْتُمْ أَنَّىٰ هَٰذَا ۖ قُلْ هُوَ مِنْ عِندِ أَنفُسِكُمْ}

أكبر غلط بيحصل ف الابتلاء هو اتهام ربنا سبحانه وتعالى واتهام حكمة ربنا سبحانه وتعالى وقدرته .. {إِنَّ اللَّهَ عَلَىٰ كُلِّ شَيْءٍ قَدِيرٌ} .. هو انت فاكر ان ربنا مش قادر انه يكسبكوا؟ .. ربنا مش قادر ان يخليكوا انتوا اللى تنتصروا؟ لا تعالوا نرجع شوية .. {وَلَقَدْ نَصَرَكُمُ اللَّهُ بِبَدْرٍ وَأَنتُمْ أَذِلَّةٌ ۖ فَاتَّقُوا اللَّهَ لَعَلَّكُمْ تَشْكُرُونَ}  .. هذه النعمة .. لعلكم تفتكروا وتشكروا النعمة اللى انتوا كنتوا فيها .. اوعى ف الأزمات والابتلاءات تفكر ف ربنا ظن مش صح وتقول فين وعده! .. {وَلَقَدْ صَدَقَكُمُ اللَّهُ وَعْدَهُ إِذْ تَحُسُّونَهُم بِإِذْنِهِ ۖ } .. تحسونهم يعنى انتوا كنتوا بتكتموا حسهم .. كنتوا منتصرين أوى .. {حَتَّىٰ إِذَا فَشِلْتُمْ وَتَنَازَعْتُمْ فِي الْأَمْرِ وَعَصَيْتُم مِّن بَعْدِ مَا أَرَاكُم مَّا تُحِبُّونَ} .. هو ليه ربنا سبحانه وتعالى سايبهم! احنا بنتعامل مع الموقف على أد عقلنا احنا .. يعنى احنا مثلاً عايزين الشخص الملحد يتسخط قرد قدامنا .. عايز سنة سنتين مش أكتر من كدا اشوف اننا بننتصر واشوف ربنا سبحانه وتعالى وهو يعز الإسلام والمسلمين .. ربنا قال ف سورة البقرة ..شخص كان عنده تساؤل عن قدرة ربنا .. {أَوْ كَالَّذِي مَرَّ عَلَى قَرْيَةٍ وَهِيَ خَاوِيَةٌ عَلَى عُرُوشِهَا قَالَ أَنَّى يُحْيِي هَذِهِ اللَّهُ بَعْدَ مَوْتِهَا} .. ربنا سبحانه وتعالى عشان يعلمه عمل ايه! .. {فَأَمَاتَهُ اللَّهُ مِائَةَ عَامٍ ثُمَّ بَعَثَهُ} .. عشان ربنا بس يعلمه موته ١٠٠ سنة .. أهل الكهف قعدوا أد ايه ف الكهف! ٣٠٠ سنة وازدادوا ٩

ربنا سبحانه وتعالى لا يعجل بعجلة أحد .. يعنى انت ممكن تكون اه مستعجل دا عادى بس اوعى تظن ف ربنا سبحانه وتعالى ان هو اتأخر .. أو هو امتى بقى النصر هييجى .. دى بس بعض المشاهد البسيطة .. اقرأوا سورة آل عمران من الآية ٢١ لحد الآخر وشوف الفرق وحال الصحابة قبل ما القرآن ما ينزل وبعد ما نزل وسمعوا الآيات دى وهما بقوا ماشيين ازاى مبسوطين ومرفوعين الراس .. يارب أعز الإسلام والمسلمين .. اوعى ف موقف زى دا تظن بربنا ظن مش صح ..

لا تيأسوا إذا أخر الله ما تحبون ولا تتأذوا من مرارة القدر ولا تحزنوا إذا أُجبِرتم على تعايش وضع قد يؤلمكم .. بل اصبروا وابتسموا .. فالله سبحانه وتعالى قال بكل رحمة "إن مع العسر يسرا" .. الله يدبر لكم ف الغيب أمور لو علمتموها لبكيتم فرحاً .. فهوناً على قلوبكم وأبشروا❤️‍🩹
اللهم النصر لغزة🤍

أكثروا من نشر كلام الله ورسوله ف والله لولا كتاب الله لفقد الإنسان عقله وقلبه من هول ما يرى❤️‍🩹 ..
لو كشف الله لكم الحجاب ل١٠ دقائق فقط ونظرت لسماء فلسطين لرأيت العجب .. أفواج من الملائكة تتسابق للصعود بأرواح الشهداء إلى الله تعالى باحتفالية مهيبة
أقسم بالله الذى لا إله إلا الله هو أن السماء فعلياً تمتلئ برائحة العطر .. ناس انهت امتحان الدنيا فاختارها الله تعالى لتسكن الجنة .
مناظر مؤلمة تراها .. لكن رسولى ورسولك "صلى الله عليه وسلم" يقسم بالله أن الشهيد لا يجد من الألم إلا مثل القرصة .. لا تخافوا عليهم
احنا زعلانين عليهم لكن الرسول "صلى الله عليه وسلم" يقول : أن كل من يموت ف الدنيا يتمنى الرجوع إلا الشهيد لأنه يرى أشياء لو رأيتها أنت بعينك لتموت من الفرح .
أحياء عند ربهم يرزقون🤍✨

سيعود مسجدك الحزين مكبِّراً وتطول فيه خواشع الصلوات .
فليكن دعائنا لأهلنا ف غزة ..
اللهم أدخلهم مدخل صدق وأخرجهم مخرج صدق .. واجعل لهم من لدنك سلطاناً نصيراً .
اللهم اكفهم باسمك الكافى كل ما أهمهم .. بما شئت وكيفما شئت .. اللهم احفظهم باسمك الحفيظ .. وانصرهم بقدرتك ياقادر ياقدير .❤️‍🩹