Falling In Love With The Red Flag Guy

8

"ရတီ့ကို သီးသန့်ကြီး​အချိန်​ပေးခိုင်းရတာ အားနာပါတယ် ကိုမိုး​သောက်ရယ်"

"ရတယ် မရတီ။ ကျွန်​တော်လည်း စကား​ပြောချင်​နေတာပါ"

​ရေခဲရိုက်သားအဖြူခံ​ကိုမှ အပွင့်နုပ်နုပ်​လေး​တွေပါသည့် မြန်မာဝမ်းဆက်ဖြင့် ရတီမြင့်မိုရ်မျက်နှာက တည်တည်ငြိမ်ငြိမ်ဖြစ်သည်။ ငါးရိုးကျစ်​ဆံမြီးကို ပုခုံးတစ်ဖက်ချထားတာဖြစ်လို့ ကျက်သ​ရေရှိမှုက နုပျိုမှုထဲထပ်​လောင်းပါဝင်​၏။ ဒီ​နေ့က တတိယ​မြောက်ဒိတ်ဖြစ်ပြီး ရတီမြင့်မိုရ်သွားချင်သည်ဆိုတဲ့ Sule Gallery က ဓါတ်ပုံပြခန်းကိုသွားကြည့်ဖို့ ချိန်းဆိုထားကြတာဖြစ်သည်။

ဒီ​နေ့​တော့ ဒိတ်မတိုင်ခင် မိုး​သောက်နဲ့အရင်​တွေ့ချင်ပါသည်ဆိုတဲ့ ရတီမြင့်မိုရ်​ကြောင့် Sule Gallery နဲ့မလှမ်းမကမ်းမှာရှိတဲ့ Cafeteria တစ်ခုမှာ ဝင်ထိုင်ဖြစ်ကြ၏။ မိုး​သောက် ကား​လေး ခုတ​လော ချူချာလိုက်​နေတာဖြစ်လို့ တက္ကစီ​နဲ့ပြေးလာခဲ့ရသည်။ ဒီ​ရောက်​တော့ ရတီမြင့်မိုရ်က ​ရောက်နှင့်​နေပြီ။

"ကိုမိုး​သောက်နဲ့က လိုင်း​ပေါ်က​နေ ပြောဖူး​ပေမယ့် ရတီတို့အပြင်မှာ​တော့ ​သေ​သေချာချာစကားမ​ပြောဖြစ်ကြ​သေးလို့​​လေ"

"ဟုတ်တယ်။ ​တွေ့ဖို့ကို ကျွန်​တော့်ဘက်ကအရင်စီစဥ်​လိုက်ရမှာကို။ ကျွန်​တော့်လိုအပ်ချက်ပါ မရတီ"

"မဟုတ်တာ။ ​မေ​​မေတို့​တောင်းဆိုတဲ့အတိုင်းပဲ ကိုမိုး​သောက် စီစဥ်​ပေးရတယ်ဆိုတာ ရတီသိပါတယ်။ အခုကလည်း လူကြီး​တွေ​ပြောထားတာ​တွေကို ​ကျော်ပြီး ကိုမိုး​သောက်ကို နားပူချင်တာမျိုးလည်း မဟုတ်ရပါဘူး"

ရတီမြင့်မိုရ်တို့အိမ်ဘက်က တစ်သက်လုံးပျိုး​ထောင်လာခဲ့ရတဲ့ တစ်ဦးတည်း​သောသမီးနဲ့ပတ်သက်လို့​တော့ ​မျှော်လင့်ချက်​တွေကြီးကြတာ အမှန်ဖြစ်သည်။ မိုး​သောက်ကိုအလုပ်အပ်​ခဲ့​ပေမယ့် ရတီမြင့်မိုရ်နဲ့နှစ်ဦးထဲစကား​ပြောဆို​တွေ့ဆုံဖို့ကို သီးသန့်ကန့်သတ်ခဲ့၏။ အခု မိုး​သောက်ကိုချိန်းတယ်ဆိုတာကလည်း ရတီမြင့်မိုရ်မိဘ​တွေမသိတာ​တော့ ​သေချာသည်။ ရတီမြင့်မိုရ်က နှစ်ဆယ်​ကျော်စွန်းစ လူငယ်ပီပီ အမူအရာ​တွေ​သွက်သည်။ ပြုံးလိုက်၊ တည်လိုက်မျက်နှာဟာ မည်သို့​သောစိတ်ခံစားချက်တို့ကိုမှ ဖုံးကွယ်လိုဟန်မရှိပါ။