Falling In Love With The Red Flag Guy

19

သုံးထပ်တိုက်အိမ်ကို​ရောက်တာ သည်အကြိမ်နဲ့ဆိုလျှင် ဒုတိယအကြိမ်​​မြောက်။ မိုး​ရည်ဖြန်းပက်ခံထားရတဲ့ သစ်ပင်သစ်ရွက်တို့က စိမ်းစိုလန်းဆန်း​သော ​လေထုကိုဖြစ်​နေ​စေသည်။ ကား​တွေက အိမ်​ရှေ့ခြံဝင်းမျက်နှာစာမှာတင်အပြည့်။ မိုး​သောက်ကားကို ခြံ​ထောင့်ခပ်လှမ်းလှမ်းမှာသာ ရပ်ထားခဲ့လိုက်ရသည်။ လှမ်း​လျှောက်​နေရင်းပဲ အိမ်မကြီးထဲက တွန်းတိုက်ထွက်လာတဲ့စကားသံတို့ကိုကြား​​နေရ​လေပြီ။

​မိုး​သောက်ရဲ့ပုံမှန်​နေ့ရက်​တွေမှာလည်း ရှပ်အဖြူနဲ့ပုဆိုးပဲဝတ်​နေကျဖြစ်လို့ ထူး​ထွေပြီးပြင်​ဆင်လာရသည်မရှိပါ။ အိမ်မကြီးအဝင်​ပေါ်တီကိုမှာ​တော့ များပြားလာသည့်​ဖိနပ်တို့စီစီရီရီ။ အကျဥ်းရုံးပဲလုပ်မှာလို့​ ဦးစီးဘုန်းလျှံကိုယ်တိုင်ပြောခဲ့သည်။ သို့​ပေမယ့် စကားသံ​တွေနဲ့ ဖိနပ်အရံများစွာကိုကြည့်ရုံဖြင့် အကျဥ်းရုံးထက်​တော့ပို​နေ​လေပြီ။ အိမ်ထဲကို​ခြေချမိရင် ဘယ်သူ့ကိုရှာရမှာလဲ မိုး​သောက်စဥ်းစားရသည်။ အန်တီ​ဒေါ်တင်တင်ခိုင်ကိုလား၊ ဦးစီးဘုန်းလျှံကိုပဲလား။

အန်တီက မိုး​သောက်ကိုဖိတ်တယ်လို့ ​ဦးစီးဘုန်းလျှံကပဲ သတင်းစကားပါး​ပေးခဲ့သည်။ အန်တီ​ဒေါ်တင်တင်ခိုင်ဆီ ဧည့်သည်လုပ်ရဖို့ကို မိုး​သောက်စိတ်​လေးချင်​နေ၏။ ဒီလိုဆိုပြီး ဦးစီးဘုန်းလျှံဧည့်ခံ​​နေမယ့်ဝိုင်းမှာထိုင်ဖို့လည်း စိတ်ကသက်​​သောင့်သက်သာဖြစ်မည်မဟုတ်။ သည်အိမ်၊ သည်အရိပ်၊ သည်မိသားစုဝင်​တွေကိုစဥ်းစားလိုက်တိုင်း မိုး​သောက်မှာ ​တွေးစရာ၊ ချင့်ချိန်စရာ​တွေရှိရ၏။ ကိုသီဟဖြစ်ဖြစ်၊ အိမ်က​ကောင်​လေးတစ်​ယောက်​ယောက်ကိုဖြစ်ဖြစ် အ​ဖော်​ခေါ်ခဲ့ဖို့ကိုလည်း အခုမှပဲ သတိရသည်။

"မိုး​သောက် သား​ရောက်ပြီ​ပေါ့။ ဝင်ပါကွယ်။ အန်တီ အခုပဲ သားဆီဖုန်းဆက်ခိုင်း​တော့မလို့"

​ပေါ်တီကို​အောက်မှာ အ​တွေးများ​နေတဲ့ မိုး​သောက်အနား​ရောက်လာတာက အန်တီ​ဒေါ်တင်တင်ခိုင်ပဲဖြစ်သည်။ မိုး​သောက်​နောက်က ​ရောက်လာတဲ့ဧည့်သည်​တွေကိုကြိုဖို့ထွက်လာရင်း မိုး​သောက်ကိုပါ မြင်သွားခြင်း။ တရားပွဲအမီဟုဆိုကာ​ရောက်​နေကြသည့်ဧည့်သည်​တွေက မနည်းလှပါ။ အန်တီ​ဒေါ်တင်တင်ခိုင်ပင် ပိုးဖဲအင်္ကျီဗြောင်ကို ချိတ်ကြီးကြီးဖြင့်တွဲဝတ်ထားကာ ပုဝါခြုံထား၏။ ​ဆံထုံးမြင့်မြင့်ထုံးဖွဲ့ထားသည့်​နောက်မှာ​တော့ အင်္ကျီအ​​ရောင်နှင့်ဆင်တူ သစ်ခွပန်း​ရောင်တို့ကိုထိုးစိုက်ထား​သေးသည်။