မှော်စက်မှုအင်ပါယာ - ရှုယီ (ဘာသာပြန်)

သုတေသနဌာနမှ သုတေသနသမားများ

မှော်စက်မှုအင်ပါယာအခန်း ၀၄၅ ။ သုတေသနဌာနမှ သုတေသနသမားများ

အစည်းအဝေးပြီးသွားသော် နေ့လယ်ရောက်လေပြီ။ မုန်တိုင်းလည်စဲသွားပြီး တိမ်တိုက်ကြားမှ အလင်းရောင်လေးထိုးထွက်လာသည်ကို မြင်နေရသည်။

ဘန်တာမြို့ကို မိုးထဲရေထဲမှ ဖြတ်သွားရန် ရှုယီ အနည်းငယ်တွန့်ဆုတ်နေမိသည်။

ထို့ကြောင့် အိမ်ကိုချက်ချင်းမပြန်ဘဲ မြို့အနောက်စွန်းက သေးငယ်သော အဆောက်အဦးလေးတစ်ခုဆီ ဝင်လေသည်။

ထိုနေရာသည် ကုမ္ပဏီ၏သုတေသနဓါတ်ခွဲခန်းဖြစ်သည်။

အစောပိုင်းက သူ၏အကြံသည် ထိုဓါတ်ခွဲခန်းနှင့်စက်ရုံကိုတွဲ၍ တည်ဆောက်ရန်ဖြစ်သည်။ ထိုမှလည်း လိုရင်လိုသလို လဲလှယ်နိုင်မည်ဖြစ်သည်။

သို့သော် စိုင်စ်နယ်မြေတွင် မှော်ပညာရှင်များကို အခြားလူများထက်မြင့်မြတ်သည်ဟု ယူဆခြင်းကတစ်ကြောင်း၊ ပထမဆုံးသုတေသနလုပ်မည့်လူမှာ ငယ်ရွယ်ချောမောလှပသော စတေးလ် ဖြစ်နေသည်ကတစ်ကြောင်းတို့ကြောင့် ဓါတ်ခွဲခန်းကို သီးခြားထားရန် ဆုံးဖြတ်လိုက်ရခြင်းဖြစ်သည်။

အာကာလီနှင့် အီဗီတာတို့သုတေသနဓါတ်ခွဲခန်းသို့ရောက်လာသော် ရှုယီသည် သူတို့အတွက် သီးသန့်ခန်းလုပ်ပေးလိုက်သည်။ သူတို့နှစ်ယောက်လည်း အဆောက်အဦးသေးလေး၏ ပတ်ဝန်းကျင်ကိုမြင်သော် ဓါတ်ခွဲခန်းထဲမှာပဲနေရန် ဆုံးဖြတ်လိုက်သည်။

ရှုယီလည်းသူတို့ကိုမငြင်းပေ။ ဤသို့ဖြင့် ထိုအဆောက်အဦးလေးသည် သုတေသနဓါတ်ခွဲခန်းသာမက သုတေသနပညာရှင်တို့နေထိုင်ရာဌာနလည်း ဖြစ်လာသည်။

တံခါးပွင့်လာသော် အာကာလီ မျက်နှာပေါ်လာသည်။

သူမသည် ဤမျှမိုးသည်းသည်းထဲတွင် ရှုယီလာမည်ဟု ထင်မထားပေ။ အံ့ဩစွာဖြင့် အထဲသို့ဝင်ခိုင်းလိုက်သည်။

သူအခန်းထဲရောက်လာသော် လှည့်ပတ်ကြည့်လိုက်ရာ အတော်လေးဖရိုဖရဲဖြစ်နေသည်ကိုတွေ့သည်။ ပုံကြမ်းများသည် ဗရုတ်သုတ်ခဖြစ်နေရုံမက မှော်ပစ္စည်းအားလုံးလည်း ရှုပ်ပွနေလေသည်။ ကြမ်းပေါ်တွင် မိန်းကလေးအဝတ်အစားများ ပြန့်ကျဲနေသည်။