💜💜
Mahender ne Jeetu par banduk taan fire kiya tha, magar usase pehle Jyoti ne jaldi se Mahender ke paas jaa banduk upar utha di. Jiske karan goli mandir ke sealing me jaa lagi.
Mahender ne Jyoti par bhadakte hue kaha : Kya kar rahi hai. Hat samne se.
Jyoti ne banduk chhinte hue kaha : kya kar rahe ho. Iski jaan lekar khud jail jaana hai. Jab ki khot to apne sikke me hi hai.
Jyoti ki baat Mahender ko samajh nahi aayi to vo use dekhne laga.
Vahi Jyoti ne gusse me Janhvi ko dekhte hue kaha : Maine kaha tha na ki iska chakkar chal raha tha is ladke ke saath. Maine khud dono ko akele me milte julte dekha tha kayi baar. Par meri baat to kisi ne na suni.
Isi ne is ladke ko yaha bulaya aur dekho kitne sahi time par ye yaha aa bhi gaya. Aur bhar di iski maang. Is sab me iski marzi thi.
Apni bhabhi ki baat sun Janhvi ko hosh aaya aur usne apna sar hilaa rote hue Mahender se kaha : Nahi bhaiya. Maine nahi bulaya. Mera kuch lena dena nahi hai is sab se. Meri baat ka vishwas karo.
Janhvi apna lehanga sambhal jaldi se apne bhai ke paas gayi aur usne rote hue kaha : bhabhi jhuth bol rahi hai. Mera inke saath koi rishta nahi hai. Main inse mili jarur hu par...
Janhvi aage kuch kehti usase pehle ek jordaar thappad ki awaz mandir me gunj uthi.
Ye thappad Jahnvi ke bhai ne use mara tha.
Mahender ne Janhvi ko dur dhakelte hue kaha : Rishta nahi tha iske saath to phere kyu liye. Aur agar rishta na tha to ab bana liya na to ab reh iske saath. Aur ab kabhi mere ghar ki dehlij na chadhana. Mar gayi tu mere liye.
Mahender ke dur dhakelne ki vajah se Janhvi dur jaa giri thi, to Bhavna didi ne uske paas jaa use sambhala.
Vahi Mahender Jyoti ko apne saath le kar vaha se gusse me chala gaya.
Janhvi ko samajh hi nahi aa raha tha ki asal me ho kya raha tha.
Idhar Param khada hua abhi bhi gusse me Jeetu ko ghur raha tha.
To Jeetu ne apni shirt ki baaju fold kar uske paas aate hue kaha : Kya? Ab kyu khada hai yaha? Aise hi jaayega ya maar khaa ke jaayega?
Uski baat sun Param ne gusse se Jeetu ko dekhte hue kaha : Ye tune mere saath acha nahi kiya. Chhodunga nahi main tujhe.
Jeetu ne ye sun gusse me Param ko 2-3 thappad jad diye.
To Veer aur Chote ne jaldi se Jeetu ko pakad Param ko vaha se jaane ko keh diya.
Param ke jaate hi Veer ne Jeetu ko apne samne khinchte hue pucha : Bolega ab ki kya hai ye sab?
Veer ne roti hui Janhvi ki taraf ishara kiya.
Bhavna didi ne uske paas aate hue kaha : Vishu. Ghar pohchkar baat karenge.
To Veer ab chup hogaya.
Vahi Jeetu ne Janhvi ke paas jaa roti hui Janhvi ko utha uske aansu poch uska dupatta sar par daal Chote se kaha : Sun. Jara hum dono ki achi photo to le. Aakhir shaadi ki hai to photo to leni banti hai.
Jeetu ki baat sun Janhvi apna dar utha use dekhne lagi to Jeetu ne muskura kar use kandhe se pakad kar apne thoda aur paas khinch liya.
Chote ne Jeetu ko ghur kar dekha par fir bina kuch kahe un dono ki kuch photo click kar li.
Veer, apni behano aur Janhvi ke saath apni car me bethkar nikal gaya.
Vahi Jeetu aur Chote dusri car se ghar ke liye nikal gaye.
Chote ko Jeetu samajh nahi aa raha tha. Usne Janhvi se shaadi kyu ki jab ki use to Preeti se pyaar tha. Chote apni soch me gum drive kar raha tha ki tabhi uska dhyaan Jeetu par gaya jo muskurate hue apni shaadi ki photos kisi ko share kar raha tha. Aur ye aur koi nahi balki Preeti thi. Vo Preeti ko apni shaadi ki photos share kar raha tha.
