💜💜
Janhvi bed se uthne ko hui ki uska pair lehange me phas gaya par vo niche girti usase pehle Jeetu ne jhat se uska haath pakad liya.
Janhvi uske use sambhaalne par halka muskura di. Aur usne dheere se kaha : Ye lehanga bahot bada hai.
Jeetu uski baat sun has diya aur usne haste hue kaha : Lehanga bada nahi hai tum choti si ho.
Usko haste dekh Janhvi ka chehra murjha gaya aur usne apna haath chhudate hue kaha : ho gaya. Bana liya mera majak.!
Jeetu usko laal hote dekh fir has diya. To Janhvi bed se uth gayi. Par vo ek baar fir ladkhada gayi, to Jeetu ne uth kar use sambhaalna chaha tha ki,
Janhvi ne apna haath dikha usase kaha : Rehne do. Tumhari madat nahi chahiye. Kyunki tum madat kam karte ho. Aur taane jada maarte ho.
Jeetu ne janhvi ki baat sun apna sar jhatka aur fir se vapas let gaya tha ki,
Janhvi ne use jagaate hue kaha : Ye phone fir lock hogaya.
Uski baat sun Jeetu utha aur usne paas khadi Janhvi ka haath pakad use vapas bed par khinchte hue kaha : kisi se baat nahi karogi tum, so jaao. time dekh rahi ho. 12 baj rahe hai.
Janhvi ne Jeetu ka haath dur jhatakte hue kaha : To kya hua. 12 hi to baje hai.
Jeetu ne apna sar peetate hue usase pucha ; Ek batao. Tumhare ghar wale tumhe jhelte kaise hai? Itni ziddi tum unke liye bhi ho. Ya bas mujh par hi apni zidd dikhaane ka shauk hai.
Jeetu ki baat sun Janhvi use ghurne lagi, to Jeetu ne uske haath se phone chhin dubara unlock kiya,
To Preeti ki photo dekh Janhvi ne usase ek baar fir pucha : Tumne bataya nahi ye kaun hai?
Is par Jeetu ne chidhte hue kaha : Tum apne kaam se kaam rakho. Kya karna hai tumhe jaan kar ki ye kaun hai. Sautan hai tumhari aur bolo kya jaanana hai?
Jeetu ki baat sun Janhvi use ghurne lagi par fir agale hi pal usne Jeetu ka phone uski taraf fek maara aur muh fer kar beth gayi.
Vahi Janhvi ke fekne par phone seedha Jeetu ke seene par jaa laga tha. Jisase Jeetu ki sisaki nikal gayi.
Jeetu ne apna seena sehlaa kar Janhvi par bhadakte hue kaha : Tum pagal ho kya? Galti kar di tumhe us gadhe se bacha kar. Use le jaane Dena chahiye tha tumko.
Ye sun kar Janhvi ne Jeetu ki taraf mudkar us par bhadakte hue kaha : Ha to maine kaha tha ki tum mujhe aao bachane. Kya bachaya tumne? Ha kya bachaya tumne? Tumne to ulta mujhe fasa diya. Tumhari vajah se main apne mummy papa se nazare tak milaane layak naa rahi.
Janhvi gusse me ye sab kehte hue lagbhag Jeetu ke upar jhuk chuki thi, aur Jeetu vo ab is sab se chitt hokar let gaya. Uski Janhvi ke samne bolti band ho chuki thi.
Par use kuch bolta na dekh Janhvi rone lagi aur fir Jeetu ke upar se hat bed par beth apne dono ghutno par apna sar rakh muh chhupa kar rone lagi.
Use rote dekh Jeetu ne apna sar peet liya aur man hi man sochne laga ki kya aafat usne mol le li hai.
Janhvi ko subakte dekh Jeetu ab uth kar beth gaya aur usne Janhvi ke karib hote hue pucha : Ye batao. Tumhare ye rone dhone ka program kab tak chalega. Bahot thak gaya hu. Sona chahta hu.
Janhvi ne Jeetu ki baat sun apna chehra dusri taraf fer liya aur fir se rone lagi.
Jeetu ko ab use is tarah dekh gussa aane laga aur usne us par chilaate hue kaha : Chup ho rahi ho ya fir main apne tarike se karvaau?
Jeetu ki baat sun Janhvi ne thithak kar apna rona band kiya to ab uski hichkiya shor karne lagi.
To Jeetu ne is sab se chidhkar Janhvi ka haath pakad use apni taraf khincha to Janhvi is sab me Jeetu ke karib khisak aayi. Itna karib ki un dono ke chehre me bas kuch duri ka faasla tha.
