لقد بلغت مرادي

الفصل الرابع والعشرون

هل يطلب منها أن تستمع إليه ، هل هو أمامها الآن أم أن هذه مجرد تخيلات لكثرة تفكيرها به ، ماذا يريد منها انها تحاول تناسيه بكل ما أوتيت من قوة ، ولكن من أول مقابلة لها معه شعرت بأن كل مامضى ذهب هباءا ، انها أمامه تتمنى ألا يذهب ، تتمنى أن يطول حديثهما الى مالا نهايه ولكنها تحاول اظهار العكس ، تحاول أن تقنع نفسها قبل اقناعه بأنها لا تريده ولا تفتقده ، ولكن الحقيقة المؤلمة أنها تفتقده وبشدة خاصة بعد الشهرين اللذين قضياهما معا ، هي لم تستطع نسيانه كما تدعي ، ولكنها أيضاً لا تريد أن تعود لهذا الضغط النفسي الذي كانت تشعر به أثناء تواجدهما معا ، هي لا تدري ماذا تريد ،. أتريده معها ؟! أم أنها تريده أن يبتعد ، شردت كثيراً بأفكارها  وهي تنظر اليه ولم تجبه على سؤاله ، أما هو فشعر بارتباكها وترددها لذا قال : أنا عايز أقولك حاجه مهمة ، حاجة أنا خبيتها عنك .

تاليا باستفهام: حاجة ايه ؟!

مراد: تاليا أنا ال٨ شهور الأخيرة اللي قعدتهم في ألمانيا ، ماكنتش قاعد عشان شغل زي مانتي فاهمة ، أنا كنت عملت حادثة ودخلت ف غيبوبة ، فوقت بعدها وأنا مش فاكر حاجة .

وضعت تاليا يدها على فمها بصدمة واعتدلت بجلستها واقتربت من الطاولة مستندة عليها وقالت بلهفة: حادثة ايه ؟! وانت ازاي ماتقوليش ، ليه محدش قالي ؟!

مراد: الحقيقة أنا نفسي معرفش حادثة ايه ، انا فوقت لاقيت ناس قدامي بتقولي انها أبويا وأمي ، أنا ماكنتش فاكر أي حاجة ، لكن بعد ماقضيت معاهم شوية وقت بدأت أفتكر حاجات كتير ، قعدت تقريباً ٣ شهور افتكرت فيهم كل حاجه عن أهلي ، وكنت فاكر اني كده خلاص افتكرت ، لكن اتفاجئت ببابا بيقولي ان انا متجوز ، متجوز في مصر واحدة أنا كنت بحبها هو قالي كده ، بصراحة أنا لما قعدت مع نفسي وفكرت قولت لما انا متجوز ليه مراتي ماسألتش عليا ولا مرة ، بس لما سألت بابا قال انك اتصلتي عليهم وسألتي عني وقالولك مسافر ف مكان تاني لان تليفوني ضاع ف الحادثة ، المهم اني اقتنعت شوية لما قالولي كده .

تاليا: بس أنا ماتصلتش بحد ، انت عارف انك كنت مانعني اني أتواصل معاهم بأي شكل .

مراد: أنا كنت بصدق اي حاجه بيقولوها لي ، لاني ماكنتش فاكرك ولا فاكر أي حاجه هنا .

تاليا بإدراك: انت كده فهمتني سر تغييرك ، أنا كنت عمالة بسأل نفسي ايه اللي غيرك بالشكل ده ، بتكلمني وبتهزر وبتاكل وتخرج معايا ، بس دلوقتي فهمت ، انت عملت كده لانك أصلا كنت ناسيني وناسي قوانينك مش عشان اتغيرت ولا حاجه.

مراد: أنا فعلا ف الاول ماكنتش فاكرك ولا فاكر حاجه تخصنا ، بس مع الوقت بدأت أفتكر كل حاجه ، أنا تقريباً افتكرت كل حاجه بعد أسبوعين ، صدقيني ياتاليا أنا كنت بعمل كل ده معاكي وأنا فاكرك وفاكر قوانينا وفاكر كل حاجه عنك .