تباهي بجمالك يا لورين الآسر وازهي بحبي واحيي فيني شعور كنت اجهله🌷

بارت 13

"الديرة"
غيم اللي بس تبكي وتلوم نفسها ع كل شي وغند اللي تبكي ع ولدها وما تدري عن أخباره
مزون وهي تشرب قهوتها:خلوكم من ذي البكبكه كلها قوموا جهزوا معنا عرس وش يقولوا عنا الناس هيّا
تأشر ع غيم تنطق:وأنتي روحي غسلي وجهتس والله ان العريس ليهرب من شكلتس  تأشر ع البقيه وأنتم كل وحده ع شغلها معنا عرس وأنتم بس قاعدات
تتنهد مضاوي تنطق:طيب الحين لا تشيلي هم
مزون:خلي زياد يتصل بآسر يجي هو وحرمته ما صارت لهم أسبوع قاعدين في الرياض ولا يدروا عن الناس
تهز رأسها تنطق:طيب
تأخذ وعد غيم تجهزها وباقي البنات يتجهزوا ويرتبوا المكان
بالنسبه لغيم كان يوم تعتبره أسوء يوم في حياتها تحس خسرت كل شي خسرت اللي حبها بسببها تقاطع سرحانها وعد تنطق:ما بيفيد شي الان هذا واقعك ارضي فيه واتمني انه يكون لؤي بخير
تنزل رأسها تنزل دموعها تحرق خدها تضمها وعد تتنهد تنطق:غيم ما حدا يقدر يسوي شي الحين كان كل القرار بيدك تدرين انك غلطانه الحين صح ياريت فكرتي قبل ما تتهوري بقرارك
غيم وهي تبكي:وعد تكفين ما أبيه ما احبه
وعد وهي تتنهد بقهر ع حال اختها :ما بيدي شي انتي اخترتي كل شي
غيم وهي ترفع رأسها:وعد افهميني مستحيل أعيش بدون لؤي مستحيل
وعد:ليه مافكرتي بهذا من قبل
يقطع نقاشهم دخول مضاوي تمسح دموعها غيم تتقدم لها مضاوي تمسح ع شعرها:يا يمه لا تقعدي تبكي مالك ذنب ولؤي بيلاقي نصيبه
يزيد بكاها ما تدري عن سبب بكاها الكثير هو حبها للؤي كيف بتتحمل تشوفه مع غيرها بكل سهوله تنطق وعد:يمه روحي اتجهزي أنا بساعدها
تهز رأسها مضاوي تمسح ع رأسها تتركها مع وعد تبدأ وعد تجهز لها كل شي وغيم اللي بس تبكي وبذا الوقت ادركت صعوبة الشي عليها وإنها دمرت نفسها ودمرته معاها تتمنى لو يوقف بوجيهم مره ثانيه ما بتتردد انها ترفض ظافر بس وش يفيد الحين مصيرها مع شخص ما تدري وش هي نهايتها معه

-الرياض
آسر وهو يكلم زياد
آسر:ارحب يالعضيد
زياد:اخبارك وش علومك
آسر:الحمدلله انتم وش اخباركم
زياد:الحمدلله
آسر:آمر بغيت شي
زياد:ما يأمر عليك عدو بس اليوم عرس غيم وجدتي تقول لازم تكون موجود
آسر بصدمه:زياد تتكلم جد
زياد:لو كنت تكلم زايد كنت توقع انه يمزح بس أنا لا
آسر:طيب متى وكيف
زياد:سالفه طويله وأنا اخوك ابو ظافر طلبها من جدي ولؤي اعترض وصار شد بالكلام بين جدي وعمي مصعب ولؤي وبالآخير غيم اختارت ظافر
يتنهد آسر ينطق:وغيم متأكده من قرارها
زياد:ما ادري تعرفني ما احب اتدخل بسوالف الحريم وهي بنت عاقله وتعرف مصلحتها
آسر:خير ان شاء الله، مسافة الطريق ونحنا عندكم
زياد:توصلو بالسلامه
يسكر المكالمه تناظره عاقد حجاجه تنطق بخوف:صاير شي
آسر:اليوم عرس اختي وأنا آخر من يعلم
لورين بإستغراب:مين وعد
آسر:لا غيم، قومي اجهزي بنروح الحين لديره
تهز رأسها تطلع تجهز شنطتها وشنطته تطلع فستانها
بحكم انه مافي وقت معهم تحط شنطة الميكب بشنطتها تطلع له ثوبه وشماغه تشغل المبخره الالكترونيه تحط البخور تبخره جنب فستانها يدخل يناظرها تبخر ثوبه مع فستانها يبتسم ينطق:خلصتي
تمد له الثوب تنطق:جاهز
آسر بابتسامه:شكراً
تبتسم له يطلع من الغرفه عشان تلبس فستانها اللي كان باللون السماوي ضيق من عند الصدر والخصر ويتوسع من تحت بكم واحد تلبس عبايتها تطلع تناظره متكي جنب السياره بثوبه وشماغه وبيده  زقارته ينفثها تركب جنبه يرمي الزقاره يدعسها برجله يركب السياره يحرك متوجهين للديره