تباهي بجمالك يا لورين الآسر وازهي بحبي واحيي فيني شعور كنت اجهله

بارت 32

يصحى من نومه يناظرها نايمه بحضنه وشعرها ع وجهها ابتسم يبعد شعرها عن وجهها تتحرك وعد بإنزعاج نومها خفيف ولو كانت لمسته خفيفه ع خدها تفتح عيونها تناظره يناظرها يبتسم علي:ياحلو الصباح اللي يبتدي فيك وياحلو وجودك في صباحي
تبتسم وعد بخفوت تشتت نظرها عنه تقوم تلف شعرها لورا تتوجه للحمام وهو يناظرها ومبتسم ينسدح ع السرير بإبتسامة:يا حلو صباحي
تطلع بعد ما أخذت شور بروبها تفتح شنطتها تطلع فستان بيج ضيق من الخصر والصدر يتوسع من تحت بأكمام طويله بلؤلؤ يزين خصر الفستان وأطراف الأكمام كان راقي ومناسب لها يقوم من السرير يتوجه للحمام "يكرم القارئ"يدخل يتروش وهي توجهت للمرايه تستشور شعرها وتفيره تحط ميكب خفيف يطلع وهو لاف المنشفه ع خصره ومنشفه تحاوط عنقه تشتت نظرها عنه تكمل تحط ميك اب يبتسم من شتت أنظارها عنه يطلع له ثوبه وشماغه يلبس الثوب يوقف قدام المرايه ويناظر انعكاسهم تقوم وعد بعد ما خلصت تناظر تحاول تبعد خجلها:اقعد انشف شعرك
يبتسم علي يقعد وهي جته من الله تاخذ المنشفه تحرك شعره فيها وتشغل الاستشوار وتنشف شعره وهو بس يناظرها بهيام وعيونه قلوب والابتسامه تملي ثغره تضحك وعد بخفه من منظره وهو يتأملها
علي بهيام:جعلها دوم
تبتسم وعد تكمل تستشور شعره يتنهد علي بهيام وحب:أنا وش مسوي بحياتي عشان صرتي من نصيبي
تضحك وعد بخفه من كلامه ترفع أكتافها بعدم معرفه يقوم تقرب له تعدل له شعره وهو بس ضايع فيها تاخذ الشماغ والعقال وتعدلهم له يشدها من خصرها تناظره وعد تبلع ريقها تنطق:تأخرنا
علي وهو ضايع بتفاصليها وعيونها اللي تناظره:عادي
يقرب يدفن راسه بعنقها تبلع ريقها وعد يرن جواله وهو مو راضي يرد وعد بربكه:علي
علي :هممم
يرن مره ثانيه وثالثه ياخذه علي بعصبيه يبعد عنها يرد:الله لا يعطيك عافيه استحى ع وجهك معرس معرس أنا وش داق تبي
زايد بضحك:احترم نفسك ووين اختي
علي:الله ياخذك يا زايد دايم تخرب اللحظات السعيده
يضحك زايد بصدمه:ولد استحى ع وجهك
علي:وش تبي
زايد:جدي يقول عجلوا وتدري انه مسافه طريق من عندكم للديره
علي:طيب الحين طالعين
يسكر الجوال يناظرها لابسه العبايه وتعدل نقابها يبتسم لها تقرب له يمسك يدها يطلعون من الفندق مع شناطهم بسبب سفرتهم

غيم وهي تأكل من الفراوله وتسولف مع البنات
يتنحنح لؤي يدخل المطبخ غيم وهي تأكل:ادخل
يدخل لؤي بعد ما تغطوا البنات يكتم ضحكته وهو يناظر
غيم ببطنها البارز وصحن الفراوله بيدها وتاكل رتيل وهي تقطع السلطه:اضحك اضحك ما عليك لوم حتى أنا يضحكني شكلها
يتحمحم لؤي:ام غيث بكل حالاتها حلوه
تبتسم غيم له ترمي له بوسه بالهواء
رتيل بصدمه منهم :عشتو ضحك عليها بكلمتين وصدقت الهبلا الرجال ما يملي عينهم شي ولو كان اخوي هذاني أقول لك
يناظرها لؤي بصدمه
غيم وهي تغني وتاكل :
حبيبي ع نياته كل البنات أخواته
دا ما كانش كدا بس أنا غيرت كل حياته
تضحك رتيل تكش عليهم:مالت عليكم انتم الاثنين بقرة تصدق وحمار يكذب
يضحك لؤي ومعه غيم بصوت عالي
غيم وهي تضحك:بطني بطني
لؤي يفز لها:ولاده
تضربه رتيل بالمعلقة ع راسه بخفه:دلخ انت وش من ولاده وهي تتضحوك وبعدين توها بأول اشهرها
غيم وهي تضحك:حدك ع زوجي
يمسك راسه لؤي بألم ويضحك :وش بلاتس علي
تضحك ابتهاج:لؤي اطلع قبل لا تطلعك رتيل متكسر
يقوم لؤي تلوح له غيم:سيو بيبي
يضحك لؤي يمسح ع ملامحه:بيبي هاه انتبهي تنكبينا عند جدي
تدخل لورين وبيدها اكياس فواكه وبالأخص الفراوله تنطق:هاي
غيم:ي أهلين
رتيل وهي تناظر الأكياس:لا تقولين لي انك انتي كمان حامل
تضحك لورين بصدمه:وش خطر لك
رتيل:طيب وش بلاتس جايبه كل ذي الفواكه
لورين وهي تحط الأكياس:آسر اشتراها واشترى فراوله لغيم
تبتسم غيم:حبيب اخته ما ينساني
يكملون تجهيز الغداء ولورين تساعدهم وغيم تساعدهم بالسوالف فوق الكرسي