~ملكتي قلبي ياملاكي~

57

~ الجامعه~
نزلو اميره وملاك ومسكت اميره يد ملاك وقالت:" اعرف انك مقهوره من انه ماعلمك من البدايه بس ملاك اعذريه يـ" بترت كلامها ملاك من قالت:" خذي سيارتي اليوم" قالت اميره بااستغراب:" ليه؟" قالت ملاك:" بروح مع فراس" قالت اميره:" انتي تبين خيّال يموتك صح؟" قالت ملاك:" خلاص لاتجيبين طاريه خلاص تكفين" هزت راسها اميره بالايجاب وقالت:" شوفي البنات خل نروح لهم" قالت ملاك:" خلاص تمام بس قبل انا بروح لبهاج اخوي واجيكم لحضه" قالت اميره:" تمام انتبهي لك" راحت ملاك متوجهه لكلية تخصص اخوها وشافته جالس مع اخوياه لمحها بهاج وقام لها قال:" ملاكي فيك شي شجايبك عندي؟" قالت:" ابيك تكلم خيّال" قال:" وليه ماتكلمينه؟" قالت:" مابي المهم ابيك تقول له ان عندي موعد خل يجي ياخذني" قال بهاج:" تبين اوديك؟" قالت:" مابي ابي خيّال" قال:" وش هالاصرار خلاص بعد شوي بكلم هزاع يقول له" قالت:" بهااااج قلت الحين" قال:" لاحول ولا قوة الا بالله يابنت يمكن مشغول" قالت:" ماعلي بسرعه كلمه وقول له ملاك تعبانههه وعندها موعد ابيك تجي تاخذها عندي محاضره انا" قال:" ماكانك زدتي كلام؟" قالت:" بهاج سريع يلا افتح جوالك" قال:" طيب طيب" فتح جواله ودق على خيّال مارد خيّال ورفع نظره لملاك وقال:" مارد شفتي مشغول"

~ دوام خيّال~
جالس خيّال وقدامه ملفات كثيره وكان يالله يقدر يشوف جواله دخل عليه نياف وقال بااستعجال:" خيّال مرتي بتدخل المستشفى خلك مكاني تكفى وحط جوالك عام قدامي" رفع جواله خيّال وشاف اتصال من بهاج رفع نظره لنياف وقال:" تقوم بالسلامه ماعليك فاتح جوالي" طلع نياف واهو يقول:" دعواتك" طلع ودق خيّال على بهاج وملاك كانت تقنعه يدق مره ثانيه دق عليه ورد بهاج وقال خيّال:" هلا بهاج اعذرني مارديت كنت مشغول مع ملفات قد شعر راسي وللحين مشغول بس شبغيت امرني" قال بهاج:" ابد بس ملاك تعبانه وعندها موعد وماتقدر تسوق وانا عندي محاضره مقدر اطلع منها وقلت لها تبين اي احد من اخواني وقالت لا ابي خيّال" عقد حواجبه خيّال لان لو ملاك تعبانه بهاج مستحيل يخليها واذا بيخليها بيدق على احد اخوانها قال خيّال:" خلاص ابشر دقايق وانا عندها" سكر وقام عند هزاع وصقر وقال:" ياعيال احد يروح لمكتبي يكمل الملفات واحد يروح لمكتب نياف ياخذ مكانه لان مرته دخلت المستشفى " قال صقر:" ليه شعندك تبينا نكمل عنك الملفات؟" قال خيّال:" ياخي عندي شغله ضروريه بروح لها وارجع على طول" قال هزاع:" خلاص رح وخل الباقي علينا" قال خيّال:" يسسسسعد لي جوك يلا سلام" طلع وراح اخذ جاكيته وطلع متوجه لملاك كان طول الطريق مايفكر الا ب ليه بهاج ماعارضها وقال بقول ل اخواني وليه صدق دق عليه وقال له مع ان بهاج يعرف ان خيّال وملاك يبون يتطلقون؟

~ عند ملاك وبهاج~
سكر منه بهاج وقالت ملاك:" اففف احبك اححبك" قال بهاج:" الحين انتي تعبانه؟" قالت:" مب شغلك يلا حبيبي روح دوامك" قال:" ومحاضراتك؟"قالت:" بجيب اجازه عادي" رجعت لكليتها وشافت سيارة خيّال راحت وفتحت الباب وركبت صد وجهه خيّال وانجرحت ملاك من حركته حرك السياره وقال:" وش يوجعك؟" قالت بهدوء:" قلبي" هز راسه واهو صاد عنها وقف خيّال بالاشاره ومدت يدها ملاك تلف وجهه لها شال يدها قبل تتكلم فتحت الاشاره وحرك قالت ملاك:" رجعني القسم" قال:" لا بنروح المستشفى " قالت باانفعال:" مابي قلت رجعني القسم خلاص راح الالم فيها شي؟" قال بعصبيه:" فيها مليون شي مطلعتني من دوامي ومن الشغل كله ف الاخير تقولين رجعني القسم ليه مادقيتي على هزاع ولا صقر ليه ؟ جاوبيني" صدت ملاك بدون ماتتكلم وكانت تبكي مسك وجهها ولفه عليه شافها تبكي هدا من نفسه وقال:" جاوبيني" قالت:" خلاص فكني ودني القسم وانا اروح مع بابا وانت كمل شغل" قال خيّال:" يكون افضل" انجرحت ملاك من كلمته لكن سكتت كمل طريقه خيّال ووقف على جنب وقال:" قلتي تبيني اطلقك وقلت حاضر الحين يدق علي بهاج ويقول ملاك تعبانه تعال خذها وش تلـ" قطعت كلامه ملاك وقالت:" بطلت تحبني؟" قال:" لين متى تشكين فيني لين متى؟ اول مره سجى وثاني مره هديل والحين غرام ولا مخليتني متزوجها وجايب منها بنت ليه ليه ياملاك لين متى بتشكين فيني؟" قالت :" خيّال" قال:" لاتناديني لاتناديني جاوبيني انتي ليه تشكين فيني؟ هل انا مب قد الثقه جاوبيني قد شفتي مني خيانه جاوبي" صدت ملاك وحرك خيّال السياره متوجه للقسم كانت ملاك طول الطريق تبكي وخيّال كل شوي يسرق النظر عليها كان قلبه يقطعه بس شيسوي لازم يشوف هل هي صدق ماتثق فيه وصلو نزلت ملاك ودخلت وتوجهت على طول لقسمها متجاهله الي جالسين بالحديقه دخل وراها خيّال وسلم بصوت جمهوري ودخل لقسمه ماسمع رد اي احد دخل وكان يبي يشوف ملاك لكن شافها مقفله على نفسها بالغرفه الثانيه دخل غرفتهم غير بدلته لبدله ثانيه وطلع راح طق عليها الباب وقال:" انا بروح للدوام بعده بروح لنياف اخوي بالمستشفى مرته بتولد" مااعطته اي اهتمام وطلع للدوام

~ دوام خيّال~
دخل خيّال على هزاع وقال:" زدت النار حطب ياهزاع شكلها كانت تبيني اجي عشان اراضيها بس شسوي ياهزاع لو راضيتها من بيراضيني كل مره تشك فيني واقول يارجال عادي هاذي هرمونات الحمل بس لا ياخي الوضع جدي" قال هزاع:" شصار علمني" قال له خيّال كل شي بالتفصيل المهم قال هزاع:" من حركتها واضح كانت تبي تراضيك مدامها بس شلت يدها من وجهك وقالت رجعني اللقسم واضحه ياخي" بس اسمع انا بكلمها الحين انت اجلس مكان نياف ومكاني وانا رايح" سوا الي قاله خيّال وطلع هزاع متوجه للقصر بعد مده وصل للقصر وتوجه لقسم ملاك طق الباب وفتحت له العامله سال عن ملاك وقالت له انها فوق رقى فوق لغرفة ملاك وخيّال وعقد حواجبه من شاف الغرفه مفتوحه ومافيها احد راح الغرفه الثانيه وطق الباب فتحت له ملاك ولما شافت انه هزاع جت بتسكر الباب بوجهه لكن حط يده وقال:" حتى انا ماتبين تشوفيني؟" فتحته وقالت بصراخ:" كل الي صار بسببك انا مابي اترك خيّال انا احبه احبه تعرف معنى كلمة احبه"

~ الدور الي تحت~
رجع خيّال للقسم عشانه نسى شي سمع صوت ملاك واهي تصارخ جاء بيرقى يحسب ان فيه احد بس لما سمع صوت هزاع وقف وقعد يسمع كان هزاع يقول:" ولله اني اسف ولله تكفين ملاكي ترا الندم مقطع قلبيي وترا ولله اني نادم اني جبتهم هنا اسمعيني انتي" قالت باانهيار:" انا طلبت منه الطلاق تسمع هو وافق ليه يوافق ليه جاوبني هو بطل يحبني ؟ ها جاوبني صار يحب وحده غيري جاوبني ياهزاع لاتحرق قلبي انا رضيت عنك بس تكفى جاوبـ" قاطع كلامها وجود خيّال قدامها واهو فاتح يدينه بمعنى تعالي ركضت له وحضنته وقالت:" تكفى انا اسفه بـ" بعدها عن حضنه وحط يده على فمها وقال:" اش اش اهدي انتي الحين اهدي بعدين نتفاهم" ناظر هزاع وقال:" خلاص روح واعتذر عن الي صار" قال هزاع:" ملاكي ولله اني مالي دخل بالموضوع تكفين افهميني " قالت:" محد منكم غلط انا فكرت بلغلط وتسرعت بكل شي اسفه" طلع هزاع وقالت ملاك:" طاح الحطب؟" صد عنها خيّال وراح للغرفه

" قراءه ممتعه❤️...
لا احلل القراءه بدون النجمه والاضافه والكومنت ❤️
+ حبايبي صرت انزل انستا ( euxxu7)