جيتي مثل ربيع ازهر بقلب السيف بُستان

البارت الرابع

عند ابو زهر
ام زهر والبنات وابو زهر جالسين بالصاله
ام زهر: تراني كلمت حليمه وبكره بروح لها ماودك تروح تعتذر من سيف؟
ابو زهر يعصب ويقوم: وانا ليه اعتذر من بزر ماعاد الا هي
ام زهر: الله يصلحك الولد ماسوا شي وانت ضربته خلك عاقل وتعذر منه
ابو زهر: انا ماني معتذر وماني رايح لبيت فايز ويروح لغرفته
يارا : يمه تعرفين ان ابوي مايحب عمي فايز من زمان يعني انسي انه يعتذر
زهر: بس ابوي غلطان ماله حق يمد يده لا على سيف ولا غيره
شهد : اول مره اتفق معك يازهر بصراحه ابوي هالمره غلطان
يارا: وش فيكم ع ابوي ولا عشان ماعنده عيال مااحترموه عيال عمي
ام زهر تنرففزت: بنننت وش اللي تقولينه انتي عيال اختي ماقللوا احترام احد وابوك رافع راسه فيكم مو شرط يكون عنده ولد عشان الناس تحترمه
زهر تطالع يارا: وش رايك تنطمين مابقى الا البزران يتدخلون
يارا تزعل وتروح غرفتها
ليان: زهر وش فيك عليها خلاص انتم ترى كبرتوا السالفه عماني وابوي وعيالهم بكيفهم مالنا دخل
زهر : انتوا اسكتوا لحد يبرر لأبوي
ام زهر ساكته وماقالت شي
شهد وليان : تصبحون على خير
زهر: وانتم من اهله حتى انا بقوم انام وانتي يمه ؟
ام زهر : انا بعد بقوم انام تصبحون على خير
تطلع زهر لغرفتها وتفكر بصوت عالي : مدري سيف بخير ولا وتغمض وتنام
.....................
بيت ابو نايف
الساعه 11
كلهم نايمين مافي الا ديم تتفرج على مسلسلها
انس توه جاي من برا: غريبه صاحيه
ديم: ايه غفيت شوي وماعاد جاني نوم قلت اتفرج
انس : امم ديم بسألك
ديم تعدل جلستها: اييه وش عندك ؟
انس يفكر يقولها ولا خايف تمسكها عليه
ديم تضربه بالريموت : تعرف اني فضوليه وش بقولك شي وتسكت
انس : اليوم جات ياسمين ؟
ديم تبتسم : ايييه ! وليش تسأل ؟
انس : اسأل بس حرام ولا عيب
ديم تضحك : ايه عيبب ليش تسأل عن البنت يعني
انس حس انه بيخربها : اقول انا بطلع انام وانتي خليك ع مسلسلك
ديم تضحك وفهمت ان انس يحب ياسمين: ياانس (بصوت عالي) ترى ماتحب اللي يروحون النوادي
انس يطالعها وهو طالع من الدرج: انا وش خلاني اسألها فضيحه هالبنت
.....................
بيت ابو رامي
الساعه 2 بالليل والكل نايم سيف يقوم بيصلي الوتر وكان مستحيل يقطع الوتر ويوضي ويمد سجادته ويصلي الوتر ويمسك المصحف ويقرا كم صفحه ويقفله
ويدعي يارب انت تعلم وانا لااعلم ويتنهد ويلف سجادته وفجأه ينفتح باب غرفته
امه: حبيبي تقبل الله
سيف : منا ومنك لسى مانمتي ؟
امه: لا حبيبي صحيت اصلي وقلت امر غرفتك اتطمن عليك
سيف يبوس راس امه : الحمدلله انا مافيني الا العافيه وانتي يمه فيك شي ؟
امه تطالعه بكل حب وحنيه: لا حبيبي برجع انام وانت نام جعله نوم الهناء وتطلع برا الغرفه
سيف حس ان امه مو ع بعضها : الله يهدي بالك يمه وبيرجع ينام
.......
ويمر الوقت ويجي الفجر
عند ابو نايف
ابو نايف بصوت عالي : ياعيال يللا الصلاه ولا تبون تفوتون الفجر
ام نايف: انا بقوم اصحيهم
وتدق باب غرفة وليد اول باب
وليد يحط البطانيه ع وجهه : هاه يممه
ام نايف تصرخ: قم صل الفجر بالمسجد عشان ربي يوفققك وييسر امورك
وليد شبه مفتح عيونه : هممم يمه طيب طيب
ام نايف تسحب البطانيه: قممم
وليد عصب: يمه خلاص قمتتت ودي لو مره اصحى ع كيفي
ام نايف: لو خليناك ع كيفك بتفوت كل الصلوات قم صل الفجر وارجع نام
وليد بتنرفز : طيب طيب
نايف صحى ع صراخ امه لوليد ويمر من عند امه ويبوس راسها
ام نايف : حبيبي صبحك الله بالخير
نايف: صبحك الله بالنور اذن الفجر ولا باقي ؟
ام نايف: توه اذن بس قلت بصحي اخوانك للفجر ودي لو مره يواضبون على صلاة الفجر بالمسجد
نايف : انا بوضي وبنزل عند ابوي نروح سوا
ام نايف تفتح الباب على انس وتلاقي الغرفه حوسسه وهو نايم بوسط الحوسه وتصرخ انسسس
انس يفززز من السرير: يممه وش فيك اقسم بالله انكم تخوفون
ام نايف : وش هالحوسه ويللا قم صل وارجع نام بعدين
انس مغمض عيونه: طيب روحي وانا بلحقك
ام نايف : يللا لا تتأخر
.........
عند ابو رامي صاحي من قبل الفجر بساعه
ينزل سيف بيصلي بالمسجد ويلاقي ابو رامي جالس بالصاله
سيف: عمي بتروح معي المسجد ؟
ابو رامي : ايه يللا توكلنا على الله
رامي ينزل : انتظروا جاي معكم
ويروحون المسجد ويصلون الفجر
ام رامي صحيت وصلت وجهزت الفطور عشان سيف ورامي ياكلون قبل يروحون دواماتهم
.........
عند زهر
زهر : صباح الخير يمه
ام زهر : صباح النور ياحبيبة قلبي
زهر: يمه غريبه ابوي وينه ؟
ام زهر: صلى الفجر بالبيت يقول ماله حيل يمشي للمسجد
زهر: تعبان ؟
ام زهر : والله اني مدري ماقال لي شي غير انه ماله حيل
زهر : طيب بطلع اشوفه واقوله ينزل يفطر
وتطلع زهر وتدق باب الغرفه وتدخل
ابو زهر: هلا ببنتي
زهر تبوس راس ابوها : تعبان يبه؟ امي تقول مارحت تصلي اليوم بالمسجد
ابو زهر: والله ماادري وش اللي فيني مالي حيل اقوم من السرير
زهر تحط يدها ع جبهته: حرارتك مو مرتفعه طيب نمت زين؟
ابو زهر : ايه يابنتي مافيني شي
زهر: بتنزل ولا اطلع لك الفطور ؟
ابو زهر: لا بنزل انتي اسبقيني
يارا بالصاله : يمه وين ابوي ؟
ابو زهر وزهر نازلين من الدرج : ابوك هنا
يارا : يااحلى صباح
ابو زهر : الله يخليكم لي
ويمر وقت الصباح ويجي الظهر ووقت الغداء
...........................
بيت ابو رامي
ابو رامي : وين طلال ماصلى معنا الفجر ولا الظهر هالولد لو نخلييه ماعاد صلى
ام رامي: الله يصلحه قومته وماقام
دانه: شوي وبيصحى
ياسمين : بيصحى ويصلي كل الصلوات من بكره غصب عنه يقوم
طلال نازل من فوق : وش فيكم تحشون فيني تحسبوني مااسمعكم
ابو رامي معصب: لو ماصحيت الا المغرب احسن
طلال يضحك: كان ودي 
ابو رامي : وتضحك بعد والصلوات انت لازم تدور لك وظيفه ومن اليوم تروح تدور
طلال : وش اسوي طيب قدمت ع كل شي ماانقبلت
ام رامي: نبي نفرح فييك ونزوجك ونشوفك مستقر بوظيفه وعائله
طلال : يالليل طيب شوفوا رامي وسيف زوجوهم واتركوني انا
ام رامي: اكيد بنزوجهم بس وانت مابتتوظف يعني
طلال يعصب : من اول ماصحيت وانتم مستلميني ويطلع برا البيت ويصك الباب بقووه
دانه : يمه ضغطوا عليه لو خليتوه لين ياكل شي عالاقل
ام رامي تمسك جوالها بتدق عليه
ابو رامي : خلييه ماخربه الا دلعكك يبي ياكل يجي مايبي خليه
ام رامي حنوننه ماعاد اتغدت وقامت
ياسمين تكلم دانه: مسكين ياطلال ابوي وامي هاوشوه وهو توه صاحي من النوم
.......
بيت ابو نايف
وقت الغداء
ام نايف : وش رايك نزوج نايف ونفرح فيه؟
ابو نايف: ابركها ساعات والله ان ودي اشوفهم كلهم متزوجين وعيالهم حوالينهم
ديم تحمست : اييه يمه ومين تبين تاخذين له
انس متكي ويطالعهم
وليد يدق جواله (طلال) : هلا والله بطلال غريبه داق الظهر
طلال: وش رايك نطلع ونتغدا في الاستراحه ؟
وليد : طيب بس عطني دقايق البس واجيك
ام نايف: على وين ؟
وليد: بطلع مع طلال للاستراحه
ام نايف: والله اني مااحب الاستراحات وقعداتها
وليد : وش فيك يمه ترى مافيها شي يللا مع السلامه
ابو نايف: تراه مع طلال ولد اخوي مافيها شي
ام نايف: مو مشكلتي طلال والنعم فيه بس الاستراحات ماني متطمنه لها
ديم الفضولية : يممه خليك من وليد الحين قوليلي مين تبين تاخذين لنايف
ام نايف : والله اني افكر اخذ له بنت عمك فايز
يفز انسس وبصوت عالي : مين ؟ ياسمين ؟
ديم : بسسسم الله وش فيك انت بشويش فقعت طبلة اذني
ام نايف تضحك : لا دانه
انس بينه وبين نفسه : اشوا
ديم : وش تقول ؟ طيب واذا مثلاً ياسمين انت وشدخلك
انس بعصبيه: ديم انطمي وكملي غداك
ابو نايف: ولد كم مره اقولك لاتكلم اختك بهذي الطريقه لاتنسى انها اكبر منك
ديم تعدل جلستها: شكله نسى اني اكبر منه يبه
ام نايف: افكر اكلم حليمه اليوم واخطب دانه ونشوف ردهم
ديم: والله دانه تهبل يمه ولايقه على نايف مااتوقع بترفض
انس : وانا يمه ابي اتزوج
ديم تضحك : ياقلبو النونو اللي كبر ويبي يتزوج مافي وحده تبيك
ام نايف: بنت وش فيك على اخوك ومين يحصل لها تلاقي مثل انس وترفضه والله ان الف وحده تتمناه
ديم : يمه لايصدق ويكبر راسه ان الف بنت تتمناه
ام نايف : ايه وهذا الصدقق
انس : يمه انا ماامزح منجد ابي اتزوج
ام نايف: ي عمري انت وهذا اسعد شي سمعته اليوم من اليوم ادور لك على عروس
انس : بس انا ابي وحده ببالي
ام نايف: ومين هي اللي داعيه لها امها تاخذ انس
انس: ياسمين بنت عمي فايز
ابو نايف مبسوط: اييه ونعم البنت واخوي مربيهم احسن تربيه
ام نايف : والله انك عرفت تختار ياسمين سنع وذرابه وادب
ديم تطالع انس : والله اني كنت عارفه انك تبي ياسمين واضح عليك ترى
انس يضحك : الحمدلله اني اخترت ياسمين اللي الكل راضي عليها
ديم: الا شكل امها دعت عليها
ابو نايف: ديم وش فيك انتي على اخوك اليوم
ديم: والله حتى ابوي اليوم وقف ضدي والله اني امزح معاه
انس يضحك ويبوس راس امه ويبوس راس ابوه : الله يخليكم لي انا منجد مبسوط الحمدلله تبون شي ؟ انا بطلع
ويطالع امه : رديلي لما تكلمينهم يمه
ام نايف: ابشر ي حبيب امك بس بكلم نايف عن دانه عشان اكلم زوجة عمك مره وحده
ديم: الله بيصيرون دانه وياسمين زوجات اخواني
ابو نايف : الله يكتب اللي فيه الخير

( مر الوقت وجات الساعه 4 ونص العصر)