جيتي مثل ربيع ازهر بقلب السيف بُستان

البارت الواحد والثلاثين

مرت الايام وصار وقت روحة طلال ووليد للشرقيه وباقي اسبوع ع زواج سيف وزهر
طلال يكلم وليد بالجوال : الله لايبشرك بالخير وليه توك تقول لي
وليد: ظنيت انك تعرف ان الجوالات مانستخدمها في الدوره
طلال: لا والله توني ادري معك يللا يلا شوي ومرني
ويقفل من وليد ويدق ع شهد
شهد انفجعت من يوم عرفت طلال ماقد اتصل عليها
شهد: الو هلا
طلال: حي هالصوت عاد ماكنت اعرف ان صوتك حلو حتى بالجوال
شهد تضحك: لا ياشيخ وش تفكره ؟
طلال: فيه احلى من اني اسافر وانا سامع ضحكتك؟
شهد تتنهد: لاتذكرني انك بتتركني وتروح مدينه ثانيه بعيده عني
طلال: تتركني روحي ومااتركك ياقلب طلال بس قلت بقولك يمكن مااقدر اتواصل معك الا اذا جات فرصه تعرفين ممنوع استخدم جوالي
شهد: بعيد الشر عنك ايه اعرف قريت عن هالشي ومن وقتها وانا افكر كيف بتطمن عليك
طلال : تبين تعذبيني ؟ ترى ابطل اروح
شهد : بصبرهالشهور وبعيش معك بعدها كل العمر
طلال ضاعت علومه: انتي حالفه تخليني انجن يعني ؟
شهد تضحك: ايه ابيك تصير مجنون بس فيني
طلال: وانا بس مجنون فيك ومااهوجس الا فيك اخذتي عقلي وقلبي من يوم شفتك
شهد: انتبه لنفسك استودعتك الله ياعيون شهد انت
طلال ذاب من الحب: وانتي بعد انتبهي لنفسك ولصحتك واكلك ولاتبكين
شهد: احبك وتقفل بسرعه وتحط يدها ع قلبها
طلال خلاص مابقى عقل براسه وضاعت علومه : ناويه تقضين علي ياشهد ويضحك
يارا تسولف لزهر وليان ان طلال ووليد انقبلوا وبيروحون الشرقيه اليوم ومابيحضرون عرس سيف وزهر
ليان تفز: وش تقولين؟ وليه انا توني اعرف؟
زهر تقرصها وتطالع يارا
ليان تطلع بسرعه وتنتظر تشوف وليد لأن البيت مقابل البيت
يارا: بسم الله وش فيها؟
زهر: ولا شي
ليان شافت وليد وتلبس عبايتها وتحط الطرحه ع راسها وتطلع : ولييد
وليد يحسب ان انهبل يسمع بنت تناديه ويتلفت ويشوف ليان ويقرب منها: هلا ناديتيني ؟ وش فيك وليه تبكين؟
انا ليان بنت عمك فارس عرفتني ؟
وليد يتذكرها وهم صغار: ايه ايه عرفتك ليان الرسامه امري وش بغيتي ؟
ليان تبكي وتقرب وتعطيه ورقه وتدخل بدون ماتقول كلمه
وليد مستغرب وهو قلبه تتسارع نبضاته لأول مره وبيجي يفتح الورقه ويناديه طلال ومعاه شناطه
طلال: ياولييد وش فيك تصلبت مكانك
وليد متوتر: هلا هلا جايك ويحط الورقه بجيبه
طلال: علامك ؟ صاير شي بالبيت؟
وليد : لا والله مو صاير شي يللا مشينا؟
طلال : توكلنا ع الله
ام نايف وام رامي قضوا الليل كله يبكون
رامي : يمه استودعي الله فيه تراه بيتوظف ماراح يجاهد
ام رامي: وانا كيف بصبر عنه ٣ شهور
رامي: تحملي يمه عاد مابيدك شي
سيف: خلاص يمه بتتعبين نفسك تذكرين يوم بكيتي علي ؟ جيتك وهذاني معك ادعي له بس بالتوفيق
ام رامي : استودعت الله فيه والله يوفقه وييسر دربه
...............
عند ام نايف
ديم: يمه تراه مو بزر رجال مابيقعد معك طول العمر اكيد بيتوظف وبيتزوج
ام نايف: الله يحفظه من كل شر ويرجعه لي سالم غانم
ديم: ايه هذا الكلام اللي يريح كل ماصليتي ادعي له
دانه تنزل من غرفتها وهي تعبانه شوي
ام نايف: ليه ماارتحتي حبيبتي وجهك اصفر
دانه: مرتاحه ياخالتي والله بس اني ابي اغير جو الغرفه شوي الا وين ياسمين ؟
ديم: طلعت هي وانس يتمشون
........................................
جاء يوم زواج ابطالنا سيف وزهر
الكل مبسوط بس ام رامي وام نايف فرحتهم ناقصه لان وليد وطلال ماحضروا العرس ومعاهم شهد الغصه مناشبتها
زهر: وجات الليله اللي بكون معاك ياسيف وماافارق عيونك
ديم كاشخه وتنتظر تشوف رامي
ليان ويارا شالوا العرس شيل
يارا: شهد مارقصتي اليوم الا مره وانتي حالفه بزواج زهر ماتجلسين
شهد تتنهد: وحشني طلال
يارا : شهد شكله منجد صرتي مثله مجنونه افرضي احد سمعك
شهد: ماعاد تفرق
........
عند الرجال
سيف ونايف ورامي وابو نايف وابو زهر يرقصون العرضه
سيف كانت الابتسامة شاقه وجهه "مثل اللي يقول لاتبين لهم انك اخذتها عن حب"
ابو رامي: والله ان العرس ناقص بدون طلال ووليد
انس: والله انك صادق ياعمي كانوا يسوون جو بس الله يحفظهم ويرجعون سالمين
وفجأه يدخل عم سيف اسمه منصور ( كان يضربه وهو عمره ٥ سنوات وماعطاه ورثه) ومعاه عياله عبدالعزيز وراشد
سيف يوقف العرضه ويجيه عمه
منصور : افا ياولد اخوي تسوي زواجك ولا تعزمنا؟ لو ماشفنا الدعوه مادرينا
سيف: وانت خليت فيها ولد اخ ؟ وينك قبل هالسنين ؟ وينك يومني كنت صغير واكد ع نفسي وماعطيتوني حق ابوي ؟
منصور بيجي يسلم ع سيف ويصده : انا ماعندي اعمام غير فايز وعبدالرحمن وفارس
منصور : تبريت من اصلك ياسيف؟
سيف: ماتبريت وانا اصيل واتفاخر لكن ماعندي عم مثلك
منصور: انا جايك الليله وابي ابري ذمتي قدام الكل
سيف عصب: وانا ماني مسامحك لا على ظلمك لي ولا ع ظلمكم يااهل ابوي لأمي
يففز رامي: ياليت ماتخرب فرحة ولد اخوك اذا هو يهمك اجل الموضوع لبعدين
منصور يبي يقوله انه مريض وبيموت : لكن ياولدي
سيف يتركه ويمشي
عبدالعزيز ولد عم سيف بيجي يلحقه لكن يمسكه رامي: انتوا تفضلوا مع المعازيم نكرمك مثل مانكرم ضيوفنا لكن تخربون ليلة السيف لو على جثتي
عبدالعزيز ماطلع لأبوه : ابشر بنا ان بغيتنا عزوه وان بغيتنا ضيوف
راشد اللي يكره سيف وكاره فكرة ان ابوه بيرجع كل شي لسيف : عبدالعزيز انا مالي مقعد في مجلس مااحترم ابوي
منصور ابو راشد: اقعد ياولد وانا ماالوم السيف ع افعاله لأنه كل كلمه قالها معاه حق فيها
.................................
عند الحريم
ياسمين: يمه انس يقول جا عم سيف اسمه منصور ومعاه عياله
ام رامي: وش تقولين انتي ووينهم ؟ ووش سوا لسيف؟
ياسمين : انس يقول ماقال له شي بس سيف عصب وان عمه قال له يبي يبري ذمته
ام رامي: الله لايبريه من فعايله اتصلي ع سيف وعطيني
سيف: هلا ياسمين
ام رامي: انا امك قالوا ان عمك منصور جاء وش يبي ووش قال لك
سيف: لاتخافين يمه ماقال شي ولا سوا شي هذا هو جالس مع الضيوف ومعاه عياله
ام رامي: الله لايحييه وش جابه بعد كل هالسنين ومثل هالليله
سيف: يمه لاتخربين فرحتك وانا بخير الا متى الزفه
ام رامي تبتسم: جعل السعاده ماتفارقك ياولدي بعد شوي نزف لك زهر
سيف يضحك: استعجلوا بالله
ام رامي تضحك وتقفل
سيف يتنهد حاول يسوي نفسه انه مو متضايق عشان امه
نايف يحط يده ع كتف سيف: لاتنقهر وانا اخوك خله مثله مثل اي ضيف
سيف: مايحبون يخلون الواحد يفرح ولا مثل هالليله يجي بعد كل هالسنين
ابو رامي: وانا ابوك خل هالليله تعدي وعامله كأنه وجوده وعدمه واحد
ابو زهر: ماعندك الا هالعم؟
سيف: لا ياعمي عندي اثنين غيره لكن مااعرف عن اخبارهم قطعوني من سنين طويله
ابو زهر: لابارك الله فيهم وانت مو بحاجتهم احنا بظهرك ياولدي
سيف: الله يخليك ويبقيك ماتقصرون
........................
زفوا زهر لسيف وكان فستانها ماسك وفيه ذيل طويل لونه اوفف وايت وفيه زهور باللؤلؤ وكان تصميمها طلعت تهببل والكل يتكلم عن طلتها وفستانها كانت اسم ع مسمى
سيف كان لابس ثوب ابيض وشماغ وبشت بيج
مسك سيف يد زهر : الحمدلله انك صرتي لي يالزهر
زهر تهمس له : الحمدلله حبيبي صار الليله زوجي
وطلعوهم للسياره ومشوا وماعطوه الدوام اجازه الا اسبوعين وقرروا يروحون ماليزيا
ديم شافت رامي بس هو ماشافها كان يكلم ابوها
شهد صارت بس شارده وتفكر بطلال وقلقانه عليه
ليان تفكر باللي سوته هو صح ولا غلط
يارا لسى مادخلت عالم الحب وتشوفهم مجانين
****************
الى كُل القُراء اوشكنا على النهايه😔💔