جيتي مثل ربيع ازهر بقلب السيف بُستان

البارت السادس

عند ابو رامي
ام رامي: مافي ماتروح له ولا تطب بيته بعد اللي سواه
سيف: يمه والله انها عيب في حقنا عمنا تعبان ومانزوره
ابو رامي: عمك ذا مايحترم احد وانا والله بيته ماني طابه
سيف: على راحتك يبه بس انا بروح مع عمي ابو نايف تواعدنا بعد العشاء نروح له
طلال جايي من برا: تروحون لمين انت وعمك
سيف: وانت تعال معنا بنروح نشوف عمي فارس قالت لي خالتي انه تعبان
طلال يطالع امه وابوه: انتوا بتشوفون له حل ولا امردغه هنا وشش تروح له وهو مااحترمنا ولا احترم ابوي
سيف: عيب عمك ومهما سوا بيبقى عمك وله حق عليك
طلال : لا والله ماله حق علي انت تبي تروح روح انا ماني معك
سيف : خلاص اجل انا بصلي العشاء وبروح له ويطلع من البيت
ام رامي: وش اسوي فيه هالولد حنيته على الكل ماودي انه يروح لفارس
ابو رامي: الا عناد يبي يعاندني ويروح للي مايحترمني
طلال: الله يهديك يبه وش هالكلام تعرف ان سيف يشوفك مثل ابوه ومايسوي كذا بس مثل ماقالت امي
ويدق جوال ام رامي "ام نايف تتصل"
ام رامي تقوم عن طلال وابوه وترد : هلا جليله
ام نايف: هلا فيك وش اخبارك ان شاء الله مادقيت بوقت ماهو مناسب او انك مشغوله
ام رامي: الحمدلله بخير لا والله لا مشغوله ولا شي وحياك الله اي وقت
ام نايف: الله يبقيك ويخليك والله بغيتك بموضوع
ام رامي انخبص قلبها تفكر فيه شي صاير: امريني
ام نايف: مايامر عليك عدو حبيبة قلبي انا حابه ازوج نايف وانس ومالقيت لهم احسن من بناتك وانا دقيت عليك اطلبهم منك اول شي قبل الرجال ابي دانه لنايف وياسمين لأنس
ام رامي متفاجئه : والله هذي الساعه المباركة ونايف وانس والنعم فيهم وفيك وتربيتهم الكل يشهد لهم لكن تعرفين لازم اسأل البنات واخذ رايهم وارد لك
ام نايف: ابد حقهم وخذي راحتك ي حبيبتي واسأليهم ورديلي
ام رامي: الله يقدم اللي فيه الخير وان شاء الله خير وينهون المكالمه
ام رامي توترت ماعرفت وش تسوي وراحت لأبو رامي وطلال لقتهم قد راحو المسجد ورامي نايم
ام رامي تنادي بناتها : دانهه ياسمين تعالوا ابيكم بموضوع
.........
بعد صلاة العشاء والجماعه طالعين من المسجد
ابو نايف : سيف يللا ياولدي نروح لعمك فارس ولا ماعاد تبي تجي معي ؟
سيف : افا ياعم الا معك ويطالع ابو رامي وطلال وانتو معنا ولا ؟
ابو رامي ماتكلم خز سيف ومشى
طلال: انا تعرف ياسيف مابروح له يمكن مره ثانيه ويلحق ابوه
ابو نايف: طلال ماخذ طباع ابوه كلها الله المستعان
سيف : كلمته قبل نجيه؟
ابو نايف : لاوالله بس اكيد انه موجود في البيت ويروحون لبيت فارس
...................
عند ابو زهر
زهر وامها وابوها بالصاله ويدق الباب
ابو زهر : غريبه مين جاي بدون موعد
زهر تقوم للباب : مينن
ابو نايف : عمك ابو نايف وترى مع.. وتفتح زهر قبل يكمل ماتدري ان سيف معاه
زهر : هلا عم.. وتجي عيونها بعيون سيف ويغض البصر ع طول وزهر ترد الباب وتوقف وراه دقيقه وادخل
سيف محترم على طول غض البصر لكنه صادف عيون ماعمره صادف مثلها
زهر قلبها يدق بسرعه من الاحراج ومن الحب: يممه عمي عبدالرحمن ومعاه سيف تعالي ندخل
زهر بصوت عالي : تففضل عممي
ابو زهر وهو مو طايق سيف : وش جابه لبيتي
ابو نايف: وش فيك يااخوي درينا انك تعبان وجينا نزورك
زهر تسوي قهوه وهي بتموت بحب سيف: اخر مره شفت عيونه بهالقرب وانا صغيره معقوله انه يعرف بحبي له؟
تجي يارا من وراها : حبب مين هاه اعترفي
زهر تتوتر: اي حب انتي بعد الا اقولك عمي ابو نايف وسيف هنا
ام زهر جايه للمطبخ: الله يستر من ابوك لايخربها
سيف بيجي يسلم ع راس ابو زهر ويرده
ابو نايف عصصب : وانا ولد ابوي تردده واحنا في بيتك وجايين نتطمن عليك
ابو زهر: انت على العين والراس بس ذا (يأشر ع سيف) ماله مكان ببيتي ولا بمجلسي
سيف ماقال ولا كلمه كسر بخاطره
ابو نايف يفز ويقوم وبصوت عالي : والله ماهقيتها منك يافارس ترد الولد وهو جاي يشوفك حتى عيال اخوانك ماجو
يسمعونهم زهر وامها ويارا ويركضون يبون يعرفون وش السالفه
ابو زهر بصوت عالي: لا كثر الله خييره ماني منتظره يتطمن علي ولا يزورني
ابو نايف : وانا ابو نايف والله لا فيك لا شيمه ولا تقدير والله ان مانطب بيتك مره ثانيه
سيف وهو مقههور : خلاص ياعمي اقصر الشر انا بطلع
ابو نايف : وانا معك مالي قعده في بيته ويطالع ابو زهر استتح ع وجهك رجال بشيباتك وباقي تسوي سوايا البزران
ويطلعون من البيت
ام زهر ويارا يركضون للمجلس عند ابو زهر
زهر راحت بسرعه تشوف سيف من الشباك وتشوفه منزل راسه وعمه يكلمه
زهر والدموع بعيونها : يابعد عيني وروحي ياسيف
ام زهر بصوت عالي: اقسم بالله انك نسيت فعايل الرجال كيف تطرده من بيتك وهو جاي يزورك والله اني منصدمه فيك بعد كل هالعشره
يارا تهدي امها: يبه انت تعرف شقد احبك وماعمري قلت لك شي يقعد بخاطرك لكن اللي سويته والله العظيم عيب
تدخل زهر: وش سويت يبه ؟ هذا جزاته جاي يزورك ؟ كسرت بخاطره 
ابو زهر: الحين كلكم علي تهاوشون عشان هالرمه اللي ماتربى ؟
ام زهر: الا سيفف يافارس الا سيف انا مربيته ع يديني ولو اشوف بعيني مااصدق فيه الولد تعنى يجي يزورك وهو مشغول وتعبان من دوامه وتطرده ؟
ابو زهر معصب ويقوم: وانا ماقلت له يترك دوامه ويجي يزورني لا بارك الله فيهم كلهم
ام زهر : انا مالي قعده عندك وبيت ينطرد منه سيف مالي قعده فيه
يارا: يممه وش تقولين استهدي بالله وتعوذي من الشيطان مالك طلعه من بيتك
ام زهر : اذا ولدي اللي ربيته ينطرد منه هذا مو بيتي وتروح
ابو زهر يحب ام زهر مره ولا يرضى انها تروح ويلحقها للغرفه
زهر تنزل دموعها : ابوي وش فيه قاسي ع سيف ؟ وش سوا له قهرني انه كسر بخاطره
يارا تجلس جنب زهر وتحضنها: وش فيك انتي حساسه هالايام لاتبكين ماعليك بيتراضون طال الزمن ولا قصر
شهد توها صاحيه من النوم ونازله وتشوف زهر تبكي
شهد : وش فيك زهر ؟ ليه تبكين ابوي قال لك شي؟
يارا : لا بس جا عمي عبدالرحمن وسيف وابوي طرد سيف مع انه جاي يزوره
شهد: احلفي بالله ! وليه طيب طرده قال شي ييعني ؟
زهر بصوت عالي وكله بكى: سيف ماقال شيي بس ابوك ظلممه وكسسر بخاطرره وتروح لغرفتها
شهد ويارا يطالعون بعض ومصدومين
شهد : ماكنت اتوقع ان زهر طيبه وحنونه لهالدرجه
يارا : الله اعلم وش فيها ماظنتي بس حنية وطيبه
شهد تطالع يارا : وش قصدك ؟ مافهمت
يارا تضحك: الحب ياجاهلينه
شهد تضربها: والله انك تافهه مااتوقع بس زهر حساسه واكيد مارضت باللي يسويه ابوي
يارا تضحك وتطلع
شهد : الحمدلله والشكر مجنونة هالبنت
زهر تدخل غرفتها وتبكي وتحط البطانيه ع وجهها
تدخل ليان ملكة الحنيه: وش فيك؟
زهر تبكي بدون ماتتكلم
ليان تشيل البطانيه : زهر قوليلي وش فيك ابوي هاوشك ؟ او امي قالت لك شي ؟
زهر تقوم وتحضن ليان: ابوي قهر سيف وطرده من البيت تخيلي وهو جاي يزوره ويتطمن عليه
ليان تعرف ان زهر تحب سيف: طيب وليه طرده وش سوا له ؟
زهر: مدري مدري انا مددرري عن شي وليه ابوي قاسي عليه كذا
ليان تحضنها : طيب خلاص واذا بكيتي يعني بتغيرين شي ؟ هذا ابوي وهذا طبعه ومن يومنا صغار وهو يكره عمي فايز وعياله مو شي جديد
زهر لسى تبكي: بس سيف طلع من بيتنا وخاطره مكسور لو شفتيه كيف منزل راسه
ليان: ماعليك بييتفهم وضع ابوي وعمي فايز ماظنتي بيزعل
زهر: مابيتكلم حتى لو زعل
ليان: طيب امي وابوي وينهم الحين؟
زهر: امي تبي تطلع من البيت روحي شوفيها انا بغسل وجهي والحقك
ليان تروح لأمها وتسمع ابوها يقول لها لاتروحين وترجع لغرفة زهر عشان تقولها
زهر تغسل وجهها وتطلع: بسم الله مو توك طلعتي ؟
ليان: الا بس لقيت امي وابوي يتكلمون وماقطعت عليهم
زهر : طيب نشوف اخرتها
*****************************
رايكم يهمني ودعمكم يشجعني💪