جيتي مثل ربيع ازهر بقلب السيف بُستان

البارت السابع والعشرين

عند ابو نايف توه داخل البيت
ام نايف: ماصادفت وليد توه طالع يقول متضايق
ابو نايف: ايه شفته مع عيال عمه راحوا بالسياره
ديم تبي تعرف اذا رامي معهم : اكيد مع طلال
ابو نايف : هالمره معاه سيف ورامي مدري وين بيروحون
ديم تحب طاري رامي وتقوم وبتكلم وليد
انس : يمه بكره بجيب ياسمين للبيت
ام نايف: زين قلت لي من بدري ابي اسوي لها عزيمه
انس : اجلي العزيمه شوي لين نايف يجيب زوجته
ابو نايف: نعزمها واذا جات دانه عزمناها حقهم وواجبهم
انس : طيب بتعزمون ناس ؟
ام نايف: لا بس غداء بما انها اول مره تدخل بيتنا بعد العرس
انس العاشق : اييه اخيراً بنعيش سوا انا وياسمين
ديم : الو وليد وينك
وليد: مع الشباب وش تبين؟
ديم: ابي وانت جاي تجيب لي قهوه من دانكن
وليد: ماني فاضي لدانكن بعدين اجيب لك ويقفل
ديم زعلت كانت تبي تسمع صوت رامي لو شوي
رامي سمع صوت ديم وهي تكلم وليد لأن صوت جواله عالي
...................
مر الوقت وصارت الساعه ٩
عند ام زهر
زهر رايقه وتغني وتسوي لها اكل
ليان: وش هالروقان جعله دوم
زهر: بصير زوجة سيف وماتبيني انبسط
ليان: الله يسعدك ويهنيك
ام زهر تمسك جوالها وتكلم ام رامي
ام رامي: بشريني وش رد زهر
ام زهر: زهر موافقه والله يتمم لهم ع خير عاد سيف ولدي ماقدرت اطول ماارد عليك
ام رامي: اللهم امين الحمدلله انك اتصلتي عشان افرحه شوي بعد ماتضايق
ام زهر: افا ومين يضايق السيف وخالته موجوده
زهر تسمع امها وتجي
ام رامي: انا ليتني سكت كلمته عن عمانه
ام زهر: الله يهديك تعرفين ان هالموضوع يتحسس منه سيف ليه كلمتيه فيه
ام رامي: قلت يمكن يبي يعزمهم
ام زهر عصبت: لا بارك الله فيهم وماالوم السيف لو عصب منهم
زهر قلقانه ع سيف وتبي تعرف علامه متضايق
ام رامي : امين خلينا الحين في زهر وسيف وفرحتنا
ام زهر: ايه وفرحي سيف
ام رامي: سيف يبي الخطوبة والملكة بنفس اليوم
ام زهر: ماعندي مانع حددوا اليوم وقولي لي
زهر: علامه السيف؟
ام زهر: مافيه شي حبيبتي بس يبي الخطوبة والملكه بنفس اليوم
زهر مبسوطه : ايه ووش قلتي لخالتي
ام زهر تحضن زهر: قلت لها اللي تشوفه وانتي وش رايك ؟
زهر: انا رايي من رايك وراي خالتي
ام زهر: مدري كيف بصبر عنك
زهر : هنا جنبك وبكون عندك كل يوم انا وسيف
يارا : من الحين تربطين اسمه بأسمك
ام زهر: لسانك يبي له قص
يارا: وانا صادقه يمه وش فيكم
زهر تضحك : يمه خليها
شهد: وش الاخبار الجديده؟
ام زهر: خالتك تقول يبون الخطوبة والملكه بنفس الليله
شهد تطالع زهر: السيف مستعجل شكله
زهر: انعديتي من يارا صار لسانك طويل
شهد تضحك: امزح معك طيب
......................
رامي : تأخرت نص ساعه عن دوامي
سيف: حاولنا مانتأخر بس شنسوي
طلال : ياخي ترى تأخرت ربع ساعه بس مسوي انك مهم
رامي : ايه وراي مرضى الا انت روح لاتفوتك رياضتك مع عمي
طلال يضحك: ايه ايه افهم النغزات بكره اتوظف وتشوف
وليد يضحك : ايه خلهم اخذونا مضحكه بكره يفقدوننا
سيف: يللا تصبحون ع خير بكره دوامي ٦ الفجر
رامي: انا بلبس وبروح الدوام
طلال ووليد بيروحون يمشون مع عمهم
طلال وقف عند الباب ويطالع ماشاف شهد ويتنهد
وليد: وش فيك ؟ كلم عمي يطلع
طلال: طيب بكلمه وينادي بصوته العالي ياعممي فارسس
شهد تسمعه وتروح للشباك وتشوفه وهو بس لمحها مامداه يشوفها طلع ابوها بسرعه
شهد: الله يجعلني فدى هالصوت وهالزول
.....................
عند ام رامي
ام رامي: كلمت خالتك وتراهم موافقين وقلت لهم انك تبي الخطوبة والملكه بليله وحده
سيف يبوس راس امه : يابعد حيي يمه والله انك فرحتيني بهالخبر
ام رامي: جعل السعاده والفرحه دوم بطريقك
سيف: حددتوا يوم؟
ام رامي: لسى والله بس انا قلت الاسبوع الجاي يوم الخميس وش رايك؟
سيف: ماعندي مانع لو تبون الحين ويضحك
ام رامي تضحك: والله يالسيف ماهقيتك تحب العجله
سيف: بس يمه خذي راي دانه وياسمين اذا يبونها الخميس ولا
ام رامي : وهم وش عليهم اي يوم تبيه انت تم
سيف: اخواتي يمه
ام رامي: الله يخليك لهم ويخليك لي
سيف: ويخليك لي يمه ولايحرمني منك
ام رامي: انت نام الحين وراك دوام وانا بنزل اكلم اخواتك
سيف يحط راسه ع المخده : حتى امي لاحظت يازهر اني مستعجل ابيك الله يهنيني فيك واصبح واتمسى بوجهك
دانه: طيب يمه مو بدري يعني باقي اقل من اسبوع
ياسمين : طيب بيمدي وش فيك انتي خلي سيف يفرح بعد عمري هو
ام رامي: اجل بكره اكلم خالتك
.............................
مر اليوم الثاني وام رامي كلمت ام زهر واتفقوا انه يكون الخميس خطوبة وملكة زهر وسيف
الاسبوع كله مشغولين وياخذون اغراض ويتجهزون لملكة سيف وزهر
شهد متحمسه لأنها بتقدر تشوف طلال منجد الناس بصوب وهي بصوب
زهر ماهي عاطيه احد فرحتها حب الطفوله والعمر كله بيصير ملكها وحلالها
دانه وياسمين صاروا ساكنين عند ام نايف وصاروا كأنهم بناتها وديم تحبهم من حبها لأخوهم
..................
(جاء يوم زهر وسيف يومهم المنتظر)
سيف لبس ثوب اسود وشماغ ابيض ولبس الكبك اللي اعطته اياه زهر
طلال: بالله شفت احد يلبس يوم ملكته ثوب اسود؟
رامي يضحك: ياخي خله وش تبي تحارشه بيوم مثل هاليوم
طلال : منجد والله يللا الحين تغيره
سيف: جديد توني مطلعه احس الاسود هيبه اكثر
طلال يضحك ويطالع رامي: يحسب انه بيروح يحارب
سيف يضحك: يللا تأخرنا ع ابوكم ينتظرنا تحت
طلال : ايه تكفون قبل مايعطينا محاضره عن التأخير
ابو رامي: عسى مانمتوا وحلمتوا بعد
طلال: انا قايل لكم ابوي يحب القاء المحاضرات
رامي : خلاص انت امش لايفصل عليك ابوي الحين
ام رامي: يللا يابنات تأخرنا ع خالتكم
دانه: يللا يمه جيت وين ياسمين ؟
ياسمين: جيت جيت وتوقف وتتصور لأنس
دانه: اشغلتينا يللا اصلاً بترجعين عنده ويشوف كشختك كلها
ام رامي تضحك: الله يديم عليكم الحب والحنيه
...................
عند ام نايف
ابو نايف: يللا عمكم ينتظر علامكم تأخرتوا
نايف بصوت عالي: ياانس ياوليد يللا ياخي
وليد: انت مااخذ شخصية ابوي اليوم
انس يضحك : نايف كل ماكبر طلع نسخه مصغره من ابوي
ابو نايف: والله انكم ماتستحون واذا طلع علي ؟
وليد يبوس راسه: بيكون احن اب اكيد
ديم جايه وهي بكامل كشختها لبست اسود وفيه ترتر شوي وحطت روج احمر
ام نايف: اسم الله عليك تحصني حبيبتي
ديم بينها وبين نفسها: ليت اصادف رامي بس
ام نايف : يللا ياعمري نروح
...............
عند ام زهر
يارا: شهد وش هالكشخه احسبك انتي العروس
شهد: ليه الكشخه بس للعروس
ليان: خليك منها والله انك طالعه تهبلين
زهر متوتره وتطق اصابعها : معقوله جاء اليوم اللي ننتظره ياسيف
شهد: ايه جاء اليوم ياجعله يوم الهناء
زهر تبتسم: احس اني متوتره مدري وش صايبني
ليان: عادي حبيبتي شي طبيعي لاتخافين
ام زهر: هلا بحليمه والعرايس وتسلم عليهم
ام رامي: هلا فيك ياوخيتي
ام زهر تطالع دانه وياسمين : ياحي هالطله اعذروني مامداني اجيكم بعد مارجعتوا
دانه: معذوره ياخالتي عاد اليوم كلنا معذورين حتى احنا مازرناك
ليان ويارا يجون يرحبون فيهم
وتدخل شهد وتسلم عليهم وتجلس جنب ياسمين ودانه وتسألهم عن شهر العسل وتتحمد لهم عالسلامة
يدق الباب وتقوم ليان تفتح
ام نايف : السلام علييكم عسى ماطولنا
ليان: هلا ياخالتي وعليكم السلام لا والله بالوقت المناسب تفضلي حياك
وتدخل ام نايف المجلس
ديم: كيفك لولي وش مسويه
ليان : الله وش هالكشخه وش هالحلاوه ليت رامي يشوف بس
ديم تتنهد: ليته يفكر فيني مثل ماافكر فيه الا مادرى عني بعد
ليان تضحك: كلنا في الهواء سوا تفضلي
.............
عند الرجال
ابو رامي: جيناك ياابو زهر وانت عارف كل الموضوع
ابو زهر: ايه وحياكم الله
ابو نايف: وكلمنا الشيخ وقال قريب
نايف : سيف ليش لبست ثوب اسود ؟
سيف يضحك : حتى انت وش فيكم ع ثوبي الليله
طلال يهمس لأنس ووليد : سيف شكله يبي يسود حياة زوجته من اولها
انس يضحك: حرام عليك خله كاشخ ومبسوط
وليد: بنشوفك ليلة ملكتك وش بتلبس
طلال: بلبس كل شي ابيض
انس : وش بتلبس كفن انت
طلال: الله يلعنك وش هالفال
وليد: خلاص اسكتوا ترى عمي ابو رامي يطالعكم
رامي : الشيخ جاء يللا تجهز ياعريس
ابو زهر : شروطنا معروفه انه لو جاتها وظيفه ماترفض ولا تحرمها اي حق من حقوقها
سيف: زهر بعيوني ياعمي
يقوم نايف ويسلم ع سيف جعله عقد السعاده والهناء يااخوي
رامي يبوس خشمه : الله يسعدك يااخوي
طلال : الف مبرووك الله يتمم لك
انس ووليد يباركون له
................
عند زهر وقعت العقد وهي قلبها بيطلع من بين ضلوعها عسى روحي تنعقد بروحك يالسيف
ام رامي: الف مبروك يابعد عمري وحياتي بتكونين بنتي مو بس زوجة سيف
زهر: الله يبارك فيك ياخالتي وانتي والله بمقام امي وتبوس يدها وراسها
ام نايف: الف مبروك حبيبتي
زهر: الله يبارك فيك خالتي
ام زهر : مبروك يابنتي والله يسعدك مع السيف ويهنيك
زهر تتجمع الدموع بعيونها: يابعد عمري يمه وتحضنها
شهد : خلاص لاتبكون اليوم يوم فرح وتحضن زهر
ليان: اخيراً صار السيف لك يازهر
دانه وياسمين يسلمون عليها
ياسمين: الحين اقدر احس ان عندي زوجة اخ سنين وانا انتظر هالاحساس
شهد بينها وبين نفسها ( وانا بعد بصير زوجة اخوكم) وتبتسم
ديم تبارك لها : الله يسعدك ياعمري
يارا: يللا ياشهد مهمتك محد يعرف يرقص غيرك
شهد ترقص تعشق الرقص وطلال جاي يبي يكلم امه ماردت عالجوال ويلمح شهد من الشباك اللي نسوا مانزلوا الستاره
طلال ماشال عيونه والابتسامه شاقه وجهه : اروح فدى للبني الحمدلله اني انا حبيبك ياشهد وبتصيرين زوجتي بعد
ويدق جواله "سيف"
طلال ياسيف وقتك تدق الحين: الو هلا
سيف: هاه وش قالت امي متى اجي
طلال : وش فيك مستعجل باقي ماقلت لها ويمشي ويدق الباب
ليان: ميين
طلال بصوت عالي : نادي امي حليمه
شهد عرفت صوته وتجي : مين ياليان ؟
ليان: اظن طلال يبي خالتي
شهد تستغل الفرصه: روحي طيب نادي خالتي
طلال : حي هالصوت اللي اروح له فدى
شهد: هلا بحبيب عمري 
طلال بغى يطيح من طوله : لي نصيب اليوم من الكلام الحلو
شهد تضحك: ايه اليوم وكل يوم ان شاء الله
طلال وده يدخل ويحضنها بس مسك نفسه : قبل شوي شفت غزال لابس بني يرقص
شهد توترت وتلعثمت : وش تقول ؟
ام رامي: وش تبي ياطلال
شهد توترت اكثر: جيت بقفل الباب وقال لي انه يبيك
ام رامي مالاحظت : هلا طلال علامك جيت ومادقيت عالجوال
طلال يضحك : يمه شوفي كم مره متصل بس سيف يبي يدخل يلبس الدبل قالي اسألك انتي دقي عليه ويروح
شهد متصلبه : كيف ومتى شافني وتجي يارا تسحبها تعالي زهر تبيك
ام رامي تقفل الباب : جوالي شكلي ناسيته صامت
وتروح وتقول لأم زهر ان سيف يبي يدخل
ام زهر : يللا بس بقومهم للعشاء وانتي نادي سيف
زهر متوتره ونبضها واصل لحلقها : انا وش فيني ليه متوتره كذا
ام زهر تدخل يللا ياام نايف والبنات تفضلوا للعشاء
شهد صافنه وتفكر بطلال وكلامه وتبي تعرف متى شافها
جلسوا ع العشاء ودقت ام رامي ع سيف يجي
سيف يدخل ويبوس راس ام زهر: كيفك ياخالتي
ام زهر: بخير ياحبيب خالتك الف مبروك عليك زهر الله الله فيها تراها بنتي الغاليه
سيف: يبارك بعمرك وهي بعيوني ياخالتي وزهر غاليه علي
ام رامي تنادي دانه وياسمين عشان تلبيس الدبل تبيهم مع اخوهم
زهر لابسه فستان موف توب ومنفوش من تحت وكانت من جد زهر اسم على مسمى
سيف دخل وشافها بهالجمال وهالعيون اللي انسحر فيها من اول يوم شافها
زهر متوتره ويقرب منها سيف ويبوسها من جبينها وهي بتطيح من الخجل
سيف يطالع عيونها : ابارك لك ولا ابارك لنفسي اني فزت فيك ؟
زهر تتلعثم: انا اللي فزت فيك ياسيف ياجعلني ماافقدك
سيف يمسك يدها ويلبسها الدبله ويهمس: من اليوم انتي ملكي وحلالي
زهر تحس انها تحلم من كثر ماهي مو مصدقه وتلبسه الدبله وبتجي تبعد يدها ويسحبها سيف
سيف: مو كل مره تفكين يدي وتهربين
زهر تبتسم وهي بتموت من التوتر
ام رامي وام زهر ودانه وياسمين يباركون لهم ويطلعون يبونهم ياخذون راحتهم
زهر تتلعثم: ماني مصدقه انك جنبي وماسك يدي سنين وانا انتظر هاللحظه
سيف: رح اعوضك عن كل يوم راح وماحبيتك فيه اوعدك احبك كل يوم اكثر من اليوم اللي قبله 
زهر تتجرأ شوي وتبوسه من خده : يازين هالكلام ويازينك ياسيف لما ماشفتك شهر فكرت انك ماعاد فكرت فيني ونسيتني
سيف يشد ع يدها : انسى نفسي وماانساك يالزهر من يوم اصحى لين انام وانتي ببالي ماادري وش سويتي فيني لو ادري كنت تصاوبت من زمان
زهر تزعل: بعيد الشر عنك ماابي يجيك شي والله اموت
سيف يضحك: ماهقيت انك تحبيني لهالدرجه
زهر: واكثر ياسيف والله اكثر
سيف: الله يخليك لي يازهر
***************