جيتي مثل ربيع ازهر بقلب السيف بُستان

البارت الخامس عشر

بيت ابو زهر
ام زهر: يللا زهر وش باقي تسوين
زهر مبسوطه : يللا جايه ماما
يارا: الله الله وش هالروقان
زهر تطنشها وتروح ويطلعون هي وامها
شهد جايه وهي واضح انها مانامت زين
يارا تقوم وتسحبها : تعالي تعالي قوليلي وش صاير لك ووش قالك هذاك الاهبل
شهد تبتسم: مو اهبل عاد بس مطفوق حبتين
يارا : اخصص وصرنا ندافع عنه امانه قوليلي وش صار ووش قالك شفتكم من بعيد وهو كانت الابتسامه شاقه وجهه
شهد : بس كان يقولي انه بيوصلنا الوقت متأخر
يارا : اييه ساعه يقولك بس كذا ؟ وشفته عطاك شي وشو
شهد انحرجت: خلاص عاد مو لازم تعرفين كل شي وتقوم لغرفتها
ليان : وش فيكم ؟
يارا : ولا شي بس اختك ذي رح تجن قريب واذكرك وقتها
ليان تضحك : وهي ناقصه جنان يعني
........
عند ام رامي
ام زهر: كيفك اليوم ان شاء الله انك احسن وكيف سيف
ام رامي: الحمدلله بخير والله اني مانمت من كثر ماهو بالي مشغول عليه تعرفين سيف مابيقول انه يتألم حتى لو كان يتألم
زهر : الف سلامه عليه خالتي ومايشوف شر
ام رامي : الله يسلم عمرك حبيبتي وليه كلفتي ع نفسك وجبتي حلى وقهوه
زهر: لا كلافة ولا شي خالتي كلها كنافه وقهوه
ام رامي: تسلم يدينك
دانه : عاد كنافتك يازهر ماتتفوت
ياسمين وهي ماتدري عن زهر وسيف : ايه لذيذه دايم اذا ارسلتي كنافه سيف ياكل نص الصينيه وانا النص الثاني وتضحك
زهر قلبها يدق بسرعه وتكلم نفسها ( ياجعلها عافيه ع قلبك يالسيف)
ام زهر: كيفه سيف وهو صاحي ولا ابي اسلم عليه واتطمن
ام رامي : ياسمين روحي شوفي اخوك صاحي ولا وقولي له ان خالتك هنا تبي تسلم عليه
ياسمين تقوم وتلاقيه نايم
ياسمين : يمه نايم تبين اصحيه؟
ام زهر: لا والله ماتصحينه خليه بشوفه بعدين لما يصحى من حاله
يدق الباب وتفتح دانه
ام نايف: السلام عليكم كيفك يابنتي
دانه : بخير الحمدلله تفضلي امي وخالتي بالمجلس
ام نايف تدخل ويسلمون ع بعض وتجلس ويقومون دانه وياسمين للمطبخ
زهر تبي تشوف سيف بأي طريقه : تبون اساعدكم بشي ؟
ام زهر : ايه قومي ساعديهم
زهر تعرف غرفة سيف وتروح لها
دانه وياسمين بالمطبخ وطلال نايم بغرفته
ام نايف : عادي اذا تبين نأجل الخطوبه كم اسبوع
ام رامي: لا والله سيف حالف لو اجلتها بيزعل وانا مابي ياخذ بخاطره
ام زهر: زين ماسوا الحمدلله هو طيب وسيف اعرفه لو اجلتيها بيحس انه عاله وانه السبب
ام رامي: عشان كذا وافقت اني مااجلها
ام نايف : الله يقدم اللي فيه الخير ونفرح بعيالنا
....
عند زهر تفتح الباب بشويش وتلاقيه ساند نفسه ع تكاية السرير ونايم وماسك كتفه بيده الثانيه
زهر وهي عند الباب مادخلت : نايم ياضي عيني جعلها نومة الهناء الحمدلله اني شفتك بخير وتطلع
سيف يفتح عيونه ويلاقيها راحت ويتنهد : مادريت ان صوتك دواء يالزهر
دانه تقابلها جايه من طرف غرفة سيف : زهر تبين شي ؟
زهر توترت: لا ياعمري كنت ادور عليكم تبون اساعدكم بشي ؟
دانه : حبيبتي لا والله بس نبي سوالفك تعالي
...........
( الساعه 4 ونص العصر)
بيت ابو نايف
ديم : لا والله استحي مابقولها وش اقولها انس يبيك عشان ياسمين تعطيني كف
انس: كبرتي الموضوع ابي اقولها شي واصلاً خلاص صارت خطيبتي
ديم: اجل خلي الكلام اللي بتقوله لين وقت الخطوبه
انس : عشان اخوك ! ولا مالي خاطر عندك
ديم : طيب طيب لاتصيح خلاص بس انت ودني وانتظر عند الباب ولما ادخل بقولها
انس : اييه هذي اختي اللي تحبني
وليد : وين رايحين
انس : بودي ديم عند خالتي ام رامي
وليد: وشوف بالله سيارة طلال واقفه ولا ادق عليه ومايرد
انس : ابشر يللا ياديم
.........
بيت ابو زهر
يارا: ليان يللا انتي وشهد وش تسوون والله لو نتأخر امي تهاوشنا
ليان: يللا خلصت
شهد : انتظروا باقي ماخلصت شعري
يارا تحاول تنرفز شهد : ترى بنروح لخالتي مابنروح شارع الحب
شهد عصبت: يارررا بتسكتين ولا اقسم بالله اعطيك كف
ليان: غريبه شهد متحمسه كانت تكرهه بنات خالتي وش اللي غيرها
يارا : الحب يغير ويحلي ياروحي
شهد : يللا يالجاجه صرعتيني باقي بس ابخر عبايتي
يارا: يالييل شكلك مطوله انتي
..........
عند ام رامي
يدق الباب وتفتح دانه
ديم : هلا حبيبتي ويسلمون ع بعض
دانه: هلا فيك تفضلي
ياسمين تجي : هلا وغلا وترحب فيها
ديم : هلا بك وتهمس لها انس يبي يكلمك هو ينتظر عند الباب
ياسمين تهمس: نععم ليه وش يبي ؟
ديم : انتي اطلعي وشوفي قال يبي يقولك شي مابيطول
ياسمين : طيب باخذ طرحتي واجي
ديم تدخل المجلس وتسلم ع خالاتها
ديم : الحمدلله ع سلامة سيف خالتي
ام رامي: الله يسلم قلبك حبيبتي
ياسمين لبست وطلعت الحوش
انس يفكر ويرفع راسه الا ويشوف حبيبته : ياسمين هلا
ياسمين : هلا فيك قالت لي ديم انك تبي تقولي شي وش هو ؟ بسرعه قبل يجي احد
انس مبسوط : بس كنت بسألك انتي وافقتي بكيفك ولا احد غصبك ؟
ياسمين انحرجت: مافهمت وش المقصد
انس : بس ابي اعرف ويرتاح قلبي
ياسمين تضحك: ايه واذا احد غاصبني وش بتسوي ؟
انس متوتر : منجد يعني عمي غصبك ؟
ياسمين تستفزه : لا انا وافقت بكيفي ليكون ماتبيني ؟
انس كان بينط من الفرحه : الا ابيك وابيك وابيك بس قبل امشي تراني احبك وشاريك ولو تبين عيوني ماتغلى عليك ويروح
ياسمين تبتسم: والله وطلعت رومانسي بعد لو مالاحظت حبك لي ماوافقت وتدخل
ديم: شهد وليان ويارا مارح يجون ؟
زهر : الا ياعمري شوي ويجون
دانه: زهر وجهك اليوم متفتح اما امس كنتي مره شاحبه وخفت يصير لك شي
زهر تضحك: لا اليوم لأني نمت زيين الحمدلله
يجون شهد ويارا وليان فتحت لهم ام رامي
دانه : هلا ببنات خالتي
شهد تبتسم : هلا فيك ياعمري
يارا تطالع ليان ويضحكون عالصامت (مستغربين ان شهد تحب بنات خالتهم اللي كانت تقول عنهم متكبرين)
ليان تجي جنب زهر وتهمس: وجهك مبتسم وش صار
زهر تبتسم : ولا شي
ام رامي بصوت عالي: ياسسمين شوفي سيف صحى ولا لا خالاتك يبون يسلمون عليه
ياسمين : طيب يمه بقوم اشوفه
زهر كل ماجابو طاري سيف شردت بأفكارها
ياسمين تروح لسيف وتلاقيه صاحي
سيف: هلا
ياسمين: خالاتي يبون يسلمون عليك
سيف : طيب بس اغير ملابسي اول
ياسمين : طيب وكلم امي لما تخلص
.........
بيت ابو نايف
وليد : مو قلت لك شوف سيارة طلال موجوده ولا
انس: ماانتبهت طيب
وليد: ع اساس انك دايم منتبه
انس شارد بياسمين ومو فاضي لهواشه مع وليد
يدق جوال وليد
وليد: وينك يارجال انت ميت ولا حي
طلال وهو صوته كله نوم: والله راحت علي نومه علامك متصل فوق المية مره
وليد : الشباب ينتظروننا ولا نسيت اننا بنروح الملعب
طلال : ايه والله اني نسيت متى تبدأ المباراه
وليد : الساعه 8
طلال يطالع الساعه : باقي ساعتين بقوم اصلي واتجهز وبنزل لك
وليد : يللا انتظرك بسيارتي
طلال: عطني دقايق واجيك
..................
بيت ام رامي
يتجهز طلال ويلبس لبس الملعب وجا بينزل وتذكر ان ياسمين قالت له اذا بتنزل عطني خبر ويتصل عليها
ياسمين: هلا طلال
شهد ع طول تلف لياسمين بدون ماتحس ع نفسها
طلال : ابي انزل شوفيلي طريق
ياسمين : طيب وتطالع البنات تعالوا الصاله اللي جوا طلال بيطلع
ويقومون كلهم وشهد كانت اخر وحده بس مادخلت معاهم تنتظر تشوف طلال
ياسمين: خلاص انزل
طلال ينزل وراسه بالارض وبسرعه طلع
شهد بينها وبين نفسها يازين هالريحه (تقصد عطر طلال) وتستوعب : انا وش صاير لي ليكون بجن بعد
ياسمين بدت تشك بطلال وشهد: وش فيك وجهك احمر ؟ تعبانه ؟
شهد توترت: لا والله مافيني شي بس ابي مويه بارده واحس حرر
ياسمين : اها طيب بروح اجيبلك مويه بارده
شهد تاخذ نفس: والله اني جنيت منجد بسبب ورقة هالمطفوق اللي عطاني وتروح
يارا: شهد وجهك احممر والله ماامزح
شهد : ايه عشان الجو حار
يارا تجي جنبها: شفتي المجنون صح؟
شهد تقرصها بقووه
يارا بصوت عالي : اييي وش فيك علي
زهر : وش فيكم ولا لازم تتهاوشون يعني
دانه تضحك: زي طلال وياسمين دايم هواش وصراخ
يارا تطالع شهد وتبتسم بخبث عشان جابوا طاري طلال وشهد تتلعثم : لا مو هواش بس مخشتها باظافري بالغلط
.............
(الساعه 7 بعد المغرب)
ابو رامي عند ابو نايف بالبيت
ابو نايف: والله نبي نتطمن ع سيف كيفه
ابو رامي : الحمدلله بخير بعد مايرجعون الحريم تعال معي تطمن عليه
ابو نايف: ايه وبكلم ابو زهر بعد يبي يتطمن عليه
ابو رامي: حياكم الله
............
دانه: يمه سيف صاحي تبين اقوله يجي اذا يبون يسلمون عليه ؟
ام زهر: لا والله مايقوم احنا بنقوم نشوفه ونتطمن عليه خليه مرتاح
ام رامي: اللي تبونه تعالوا من هنا
سيف جالس ويتألم اذا حرك يده وتدخل عليه امه وخالاته
ام زهر: الحمدلله اني شفتك بصحه وعافيه جعلها اخر الاوجاع
ام نايف : الف سلامه عليك ماتشوف شر وكيفك الحين
سيف: الله يسلمك والله الحمدلله مافيني الا العافيه
غرفة سيف اول غرفه عند الدرج ويسمعون صوته بالصاله اللي تحت
زهر سمعته وتقول ببالها الله لايحرمني هالصوت
ام زهر : ارتاح جينا بس نتطمن عليك
سيف: الله يحييكم والله اني طيب ومافيني شي
ويطلعون من عنده
ام زهر يللا يابنات نرجع البيت
ام رامي : لسى تو الناس
ام زهر : وين تو الناس الساعه 10 اكيد تبون ترتاحون وتسولفون مع سيف واحنا من الظهر هنا
ام رامي تضحك : والله الود ودي تضلون عندي طول العمر
زهر تبتسم : تبين شي خالتي قبل نمشي؟
ام رامي : ماابي الا سلامتك والله
زهر تطالع غرفة سيف لعل وعسى يطلع منها لو شوي بس ماطلع
ويطلعون وام زهر تفتح الباب عشان يطلعون الا طلال بوجهها ويسلم عليها هلا خالتي شخبارك ومشى شوي عن الباب وهو يعرج عشان البنات يطلعون
ام زهر: سلامتك وش فيك تعرج
شهد ضلت واقفه ع اساس تنتظر امها وهي تطالع طلال تبي تعرف وش فيه
طلال : لا والله بس طحت بالملعب وانلوت رجلي بسيطه
ام زهر: سلامتك والله وش فيك انت واخوك شكلها عين وصابتكم
طلال يضحك : الله يسلمك والله لا عين ولا شي بس التركيز يادوبك
ام زهر تضحك: الله يسعدك طيب ادخل وخل امك تحط لك زيت زيتون دافي عليها وتربطها وفيها العافيه ان شاء الله ولا اجي احطها لك انا
طلال لسى ماانتبه لشهد انها واقفه : ماتقصرين ياخاله والله
ام زهر: انتبه لنفسك فمان الله
شهد مستعجله قبل يدخل طلال: يمه نسيت جوالي داخل بجيبه والحقك
ام زهر: طيب بسبقك انا للبيت
شهد تهمس : طلال
بس طلال ماسمعها ماشي بيدخل البيت
شهد بصوت اعلى : طلال انتظر
طلال مايدري هو حلم ولا علم: لبييه امري
شهد توترت واستحت : مايامر عليك عدو بس قلت بسألك عن رجلك تحس بألم ؟
طلال وهو صافن بعيونها : لا شفتك ونسيت الالم
شهد : مو وقت المزح اتكلم جد اذا تألمك حط ثلج او مويه بارده عليها
طلال يضحك : يعني افهم انك خايفه علي ؟
شهد تلعثمت: لا طبعاً وتروح وهي قلبها بيطير
طلال بصوت عالي : طيب جعلني فدى اللي تخاف علي
شهد تمشي بسرعه : ياربي وش ذا فضيحه هالطلال ومطفوق واهبل بس حلو وينحب وتضحك وتدخل بيتهم
طلال رايققق ويعرج ويغني : هو صحيح احنا التقينا
دانه تفتح له : وش فيك تعرج
طلال يطنش ويطلع غرفته وهو طربان
دانه : الحمدلله والشكر
ام نايف وديم طالعين
ام نايف : تبون شي قبل امشي
دانه : لا والله سلامتك
ديم : مع السلامه وتهمس لدانه يازوجة اخوي
دانه تنحرج وماقالت شي وتقفل الباب
يجي رامي من دوامه : السلام عليكم
ام رامي والبنات : وعليكم السلام
ام رامي: ماشفت ابوك وينه؟
رامي: ايه عند عمي عبدالرحمن
ام رامي : طيب غير وانزل تتعشى معنا
رامي: طيب بس اول بمر غرفة سيف اغير له الضمادات
ام رامي : الله يرضى عليك
**********
انتهى البارت نجمه وكومنت 💌