جيتي مثل ربيع ازهر بقلب السيف بُستان

البارت الخامس

بيت ابو زهر
ابو زهر تعبان ومهدود حيله ومو قادر يوقف
ام زهر: بكلم حليمه بعتذر اني ماعاد بجيها
زهر : ليه يمه ؟ انا بقعد مع ابوي انتي روحي
شهد : ماعليك يمه مابنخليه يحتاج شي
ام زهر : اذا صار شي كلموني
يارا وليان في المطبخ يسوون شاهي وقهوه لأبوهم
وتطلع ام زهر لحليمه اختها
...............
بيت ابو رامي
يدق الباب وتفتح دانه : هلا خالتي حياك الله تفضلي
وتدخل ام زهر : هلا فيك وكيفك يادانه ووش مسويه
دانه: الحمدلله بخير وين البنات ماجو معك
ام زهر : والله ابوهم تعبان وقعدوا يهتمون فيه
دانه: سلامته وش فيه ؟
ام زهر : والله ماندري فجأه تعب ويقول ماله حيل يقوم من السرير
وتدخل ام رامي : هلا بحصه (وتسلم عليها)
دانه : بروح اجيب القهوه واجيكم
ام زهر: كيفك ياوخيتي وكيف عيالك كلهم
ام رامي: كلهم بخير الحمدلله
ام زهر : وينهم ماشفتهم
ام رامي: والله طلعوا رامي وسيف بدواماتهم وطلال مع اصحابه
ام زهر : سيف باقي مارجع ؟
ويدخل سيف من باب البيت توه راجع من الدوام
ام رامي: الطيب عند ذكره يبان هذاك هو وتناديه
سيف منزل راسه : هلا يمه
ام رامي: تعال حبيبي مافي احد غريب
سيف يرفع راسه : خالتي ارحبي وانا اقول البيت منور ويسلم على راسها ويدها
ام زهر: ياحبيبي انت نور البيت والله كيفك وش اخبارك
سيف : الحمدلله بخير انتي كيفك ياخاله واعذريني امس ماعرفتك افكركم ضيوف جايين لبيت عمي
ام زهر: معذور ياولدي كنت لابسه عبايه اكيد ماميزتني
ام رامي: دانهه وين القهوه
ام زهر تمسح ع ظهر سيف: انا جايه اليوم مخصوص عشانك
سيف : حياك الله امريني
ام زهر: مايامر عليك عدو انا جيتك اعتذر عن اللي صار امس
سيف : لا والله مايحتاج تعتذرين ماصار شي والله سوء تفاهم وانتهى
ام زهر: ليه ماقلت لي امس لما سألتك وش فيك ؟ مو انا مثل امك ؟ لو ماقالت لي زهر ان دانه قالت لها عن اللي صار كنت مادريت
ام رامي: ماقال لي حتى انا ان طلال قال لي
سيف : ماصار شي والله ياخالتي وانتي تعرفين اني احترم عمي فارس وماازعل منه وانا مثل ولده
ام زهر : حبيبي السيف والله اني مانمت البارح وانا افكر فيك
سيف يبتسم : والله ودي انك كلمتيني كنت قلت لك اني ماني زعلان ولا ماخذ بخاطري عليه
ام رامي : حبيبي الحنون
دانه تجيب القهوه والتمر والحلى
سيف : انا بقوم اغير وارتاح شوي تبون شي ؟
ام زهر : سلامة عمرك ياحبيبي
سيف يلف : نسيت اسألك كيفه عمي ماشفته اليوم بالمسجد كان اول الناس
ام زهر : والله انه تعبان اليوم ماقدر يتحرك من سريره
سيف: الله يسامحك ياخاله تعبان وماقلتي لي تبين اوديه المستشفى ؟
ام زهر: لا والله مايحتاج هو بس ماله حيل
سيف : الله يقومه بالسلامه وان شاء الله اني اجي ازوره
ام زهر: حياك الله اي وقت
يطلع سيف ويروح غرفته
ام رامي : شفتي يوم اقولك انه كتوم ومايتكلم البارح دخلت عليه وهو يدعي ويتنهد
ام زهر : بعمري عن عمره انقهرت يوم دريت انه انضرب بالمجلس
دانه: بس سيف قلبه طيب مستحيل يشيل على احد
ام زهر : اي والله
وتتقهوى ام زهر مع اختها واخذتهم السوالف لين اذن المغرب
ام زهر : والله ان السوالف ماتنمل منها بس لازم ارجع فارس تعبان والبنات مختفين مايردون علي
ام رامي: سلميلي عليهم والله ودي انك جبتيهم معك
ام زهر : مره ثانيه ان شاء الله وتطلع
وتصادف رامي توه يرجع
رامي : كيفك ياخاله ويبوس راسها
ام زهر تبتسم : هلا ب رامي المختفي اللي مانشوفه الا بالسنه مره
رامي: والله اني ماافضى من البيت للدوام ومن الدوام للبيت
ام زهر : الله يحفظكم ويوفقكم وتروح
..........
عند ابو زهر
زهر : كيفك يبه الحين ؟
ابو زهر : الحمدلله احسن وامك ماجات للحين؟
زهر : الح...
ام زهر تدخل : السلام عليكم
ابو زهر: وعليكم السلام كنتي بتنامين عندهم
زهر : هلا يمه اعطيني عبايتك
ام زهر: الله يبارك فيك ياحبيبة امك
ام زهر تطالع ابو زهر : اييه لو ان سيف زعلان كنت نمت عندهم وخليتك
زهر تحب سيف وطاري سيف: وش صار يمه ؟
ام زهر تبتسم: والله ان مثل سيف ماففي الله يرضى عليه ويقول انه مااخذ في خاطره اصلاً
ابو زهر عصب: ومين قالك تروحين تعتذرين له بأسمي انا ماندمت اني ضربته مو متربي لا هو ولا طلال
ام زهر : عيب عليك والله انه سأل عنك ورامي ماسأل عنك وانت عمه وقال لي انه بيوديك المستشفى
ابو زهر : لاكثر الله خيره لايوديني الاسعاف على الطلب
ام زهر : استغفرالله العلي العظيم خلني اقوم اصلي احسن لي
زهر تلحق امها : يمه منجد سيف سأل عن ابوي ولا انتي تقولينها قدامه بس؟
ام زهر : الا جد سأل عنه وقال بيوديه المستشفى بس انا قلت له ان مافيه الا العافية
زهر تبتسم وتقول ببالها والله اني احبك ياسيف
ام زهر : علامك ؟
زهر: ولا شي والله وتروح
ام زهر تروح لغرفتها بتوضي وتصلي المغرب
..............
عند ابو رامي
سيف طالع من البيت بيروح يصلي مايفوت فرض بالمسجد
ويلاقي قدامه بالمسجد ابو رامي وابو نايف ويسلم عليهم
ويصلون المغرب ولما طلعوا من المسجد
سيف يكلم ابو رامي: تبي نزور عمي فارس؟ قالت لي خالتي انه تعبان وفعلاً اليوم ماشفته بالمسجد لا الفجر ولا الحين
ابو رامي يطالع سيف بنص عين: وانت وش لك تعبان ولا مو تعبان انا مارح اطب بيته ويروح ابو رامي
ابو نايف : خلها بعد العشاء نروح انا وانت نزوره
سيف: اللي تشوفه ياعمي
.......
بيت ابو نايف
ابو نايف: والله ان اللي يقول سيف متربي عشر مرات انه صادق يبي يزور ابو زهر وهو امس ضربه
ام نايف: ماشاء الله الكل يذكره بالخير
نايف : اشهد بالله ان سيف ماشفت مثله مع اني خالطت ناس كثير
ابو نايف: اشهد معك والله رجال والنعم فيه
ام نايف : نايف ابيك بموضوع
نايف : امري وش بغيتي
ام نايف: وش رايك تكمل نص دينك انا وابوك ودنا نفرح فيك ونشوف عيالك
نايف يبتسم: وش الطاري ليه فجأه تبون تزوجوني
ام نايف : لاطاري ولا شي موظف وحالك ميسور مو ناقصك الا زوجة تحبك وتصونك
نايف يضحك: طيب يالله على يدك دوريلي بنت الحلال
ام نايف: موجوده بنت الحلال كنت انتظرك تقول ايه
نايف: مين؟
ام نايف: دانه بنت عمك فايز
نايف: والله والنعم فيها وفي عمي وعياله ماعندي مانع
ام نايف تضحك وتحضنه : ياعمري ياوليدي اخيراً بفرح فيكم
نايف: انا ومين؟
ام نايف: انس يبي ياسمين بنت عمك والله هذي ابرك الساعات اني ازوج عيالي واشوف عيالهم
وليد جاي من برا: ماشاء الله اسمع سيرة زواج مين بيتزوج
ابو نايف: اخوانك نايف وانس
وليد مبسسوط: ع البركه نايف ويسلم عليه خششمك يارجال ووين انس
ام نايف تضحك : اصبر لاتبارك من الحين باقي ماكلمت اهل العروس
وليد : ايه ومين بتخخطبين؟ ووين
ام نايف : عند عمك فايز
وليد: ماشاء الله الله يقدم اللي فيه الخير
ام نايف : وانت متى تتلحلح وتتوظف ونشوفك عريس
وليد يضحك : يللا يلا بطلع غرفتي قبل تستلموني
..