جيتي مثل ربيع ازهر بقلب السيف بُستان

البارت الخامس والعشرين

كلهم رجعوا البيت وناموا الا العشاق
سيف يفكر بزهر وقرر يكلم امه تخطبها له
رامي قرر يفاتح امه انه يبي وحده يحبها واللي هي ديم
طلال ضايعه علومه ومافي بباله الا شهد
زهر : عقبالنا ياسيف متى اصير اتصبح بوجهك وانام ع حسك
شهد تفكر بطلال وانها كيف ماعاد تقدر تعيش بدونه
يارا وليان ناموا
وليد يهوجس وتجيه ديم
ديم : للحين مانمت ؟ وش تفكر فيه
وليد : ولا شي والله وانتي ليه مانمتي للحين؟
ديم : اشتقت لأنس ونايف
وليد يضحك : مداك تشتاقين لهم طيب
ديم : اي والله وخصوصا انس كنت اتهاوش انا وهو كل يوم
.........................
عند انس وياسمين
انس : الحمدلله انه تحقق حلمي وصرتي ملكي
ياسمين تضحك : يابختك فيني عاد
انس : والله منجد يابختي فيك
ياسمين تمسك يده: انا اللي ياحظي ويابختي فيك حبك لي خلاني اعرف ان الحياه حلوه ولها معنى
انس يبوس يدها: انا لو ماحبيتك ماكنت اظن اني بعيش هالحياه الحلوه
..............
عند نايف ودانه
دانه : جا اليوم اللي اقدر اتكلم فيه معك عن اللي احس فيه ومن زمان كنت استحي اقولك
نايف: كل شي بخاطرك قوليه لي ولاتستحين
دانه: انا من لما كنت ادرس بالجامعه وانا احبك وحاولت المح لك بس مافهمتني
نايف يضحك: كنت احس من زمان انك رح تكونين من نصيبي واول ماقالت امي بخطبلك دانه حسيت فعلا انه فيه مشاعر لك بس مافهمتها
دانه: الحمدلله انك صرت من نصيبي وصرت من نصيبك يابعد عيني
نايف يبوسها من جبينها : تسلم لي هالعيون الحلوه
دانه استحت: نايف الله لايحرمني منك
نايف: اللهم امين ولا يحرمني منك
...........................
جا الظهر اليوم الثاني
ام رامي تبكي: كنت اتصبح واتمسى ببناتي عسى الله يحفظهم وين ماراحوا
رامي: الله يهداك يمه تعبتي نفسك بالبكاء وانا كنت ناوي اكلمك تخطبين لي وحده ابيها
ام رامي تمسح دموعها: يابعد عمري ومين هي اللي تبيها
رامي: خلاص مو وقته بعدين بس انتي روقي وانا بروح دوامي
طلال توه صاحي: مساك الله بالخير غريبه وحدك وين ابوي
ام رامي: صلى الظهر وراح الغرفه اكيد حتى هو فقد البنات
طلال: اللي يشوفكم مابيقول ان بناتكم تزوجوا افرحوا لهم
ام رامي: الله يحفظهم توهم مكلميني رايحين المطار
طلال: استودعي الله فيهم يمه تبين اسوي لك شاهي معي ؟
ام رامي : وانت تعرف تسويه
طلال: ايه كلها سكر ومويه والله يايمه لو ذقتي شاهي عند خالتي حصه ماقد ذقت احلى منه
ام رامي تضحك: طيب قوم سوه  وضبطه مثل شاهي خالتك
سيف بدوامه ومارح يرجع الا العصر
طلال يحاول يروق امه : يللا وانتي شغلي لنا شي نتفرجه وانا بجيب الشاهي
ام رامي تبتسم: طيب حبيبي
......................
عند ابو نايف
ابو نايف: والله ماهقيت اني بفقد العيال اذا تزوجوا
ام نايف ودمعتها على خدها: والله ان مكانهم خالي بعد عيني هم
وليد: وش فيكم ليش تزوجونهم اجل دام بتحزنون عليهم
ديم : اسكت انت ماتعرف تواسي انطم
وليد: وانا صادق والله وش ذا الكآبه ذي كلها
ابو نايف: وانت متى ناوي تتوظف ونزوجك مثل اخوانك
وليد: لا لا وتقعدون تبكون ع فراقي
ام نايف تضرب راسه: انت وش فيك نحبكم ونبي سعادتكم بس مو معناته مانشتاق لكم
وليد: انا بطلع تبون شي؟
ابو نايف: لا سلامتك
ويطلع وليد وهو مو عارف وين بيطلع بس طفش من موضوع الوظايف
..........................
مرت الايام وصارت شهر وجاء وقت رجوع العرسان من شهر العسل
ام رامي بخرت البيت وجهزت القهوه والشاهي
ابو رامي جالس بالصاله ومشتاق لبناته
طلال : يمه وين قالوا لك فيه ؟
ام رامي: قالوا انهم قربوا
يدق الباب ويفتح طلال
طلال : هلا بالنسيب خشمك يارجال ويسلم عليه
انس: هلا فيك نايف قد وصل ؟
طلال : لا والله توهم ماجو
ياسمين تحضن طلال : ماهقيت انك بتوحشني لهالدرجة
طلال يضحك : افا بس يعني كنتي تبين تنسين اخوك
ياسمين : مابطلت محارشاتك
طلال : تفضلوا امي وابوي بالصاله
انس يبوس راس عمه : كيفك ياعمي عساك بخير
ياسمين تبوس راس ابوها : كيفك يبه
ابو رامي: بشوفتكم مبسوطين انا بخير
انس يسلم ع ام رامي: وش اخبارك خالتي عساك بخير
ام رامي: بخير ياولدي بس طولت علينا بياسمين
ياسمين تحضن امها: اشتقتلك يابعد كل هالدنيا
ام رامي تنزل دموعها: وانا اشتقتلك اكثر ياروحي انتي هاه كيف كانت سفرتكم ورعسى انس مازعلك بكلمه
ياسمين: لا والله حبيبي ماقال لي ولا كلمه تزعلني وكل شي ابيه عطاني
انس: ايه ياخالتي بنتك ماهي قليله عندي
ام رامي: الله بسعدكم ويخليكم لبعض
ياسمين: وين سيف ورامي
طلال: سيف مابقى شي ويجي ورامي مابيرجع الا 11
ياسمين : فقدتهم والله
يدق الباب وصلوا دانه ونايف
طلال : تفضلوا الباب مفتوح
دانه تبوس راس امها وابوها: والله اني اشتقتلكم طمنوني عنكم
نايف يسلم ع عمه وخالته : كيفكم ان شاء الله انكم بخير
طلال: هلا بالنايف ودانه نورتي السعوديه كلها
دانه تحضنه: هلا فيك عاد النور نورك
نايف يسلم ع طلال ويلتفت ع انس ويسلم عليه
انس: كيفك يااخوي
نايف: بخير ونعمه الحمدلله
دانه وياسمين يحضنون بعض
نايف: خلاص عاد يادانه من يوم وصلنا المطار وهي عيونها ماجفت بس تبكي
دانه: شسوي اشتقت لأهلي
طلال يضحك : عساك مو السبب لو انت السبب مابتطلع من هنا سالم
نايف يضحك : دانه عيوني الثنتين والله
ابو رامي: الله يخليكم لبعض وعسى محبتكم تدوم للابد
يدخل سيف بلبس الدوام : ارححبوا بالنايف وانس واخواتي
ويوقفون نايف وانس ويسلمون ع سيف
نايف: والله ان لك فقده وانا اخوك
سيف: والله وانت بعد الحمدلله ع سلامتكم
انس: وش اخبارك وكيف كتفك الحين
سيف: الحمدلله بخير
نايف : يللا نستأذن انا وانس بنروح نسلم ع امي وابوي
ابو رامي: والقهوه جهزناها والله ان تتقهوون
نايف: كثر خيرك عمي ان شاء الله يوم ثاني بس تعرف امي وابوي لنا شهر منهم
انس: ايه والله اني اشتقت لهم
ابو رامي يضحك: اذا كذا بسمح لكم هالمره
نايف: تبون شي توصون ع شي ويطالع دانه تبين شي قبل امشي؟
دانه : سلامة عيونك مانبي شي والله
انس : ياسمين تبين شي؟ ترى يومين كذا وباخذها منكم ياخالتي
ياسمين تضحك: بعد اليومين يصير خير انتبه لنفسك
طلال : عصافير الحب الله يرزقنا وناخذ اللي نحبهم ويطالع سيف
ام رامي : عيب وش فيك احرجت اختك وزوجها
ياسمين : ماسمعتي وش قال يمه ؟ يقول يبي اللي يحبها يعني تحب ؟
طلال يضحك وماتكلم
نايف وانس استأذنوا ومشوا
ابو رامي : والله ولا وحده تبيك وانت لاشغل ولا مشغله
طلال : وانت قبلت انس ياخذ ياسمين وهو ماعنده وظيفه ولا عشانه ولد اخوك
ابو رامي : ايه ولد اخوي واعرف انه يبي يتوظف
ام رامي : خلاص يافايز وش فيك واقف له ع الكلمه والف بنت تتمناه عنده وظيفه ولا ماعنده
سيف يبي يخفف الهوشه : ايه وانا اشهد ان طلال مافي مثله والف وحده تتمناه
ياسمين ودانه طلعوا غرفهم يبدلون ملابسهم
ام رامي تناديهم: بدلوا وتعالوا نجلس سوا
ياسمين: اكيد يمه انا اشتقت لهالجلسة
طلال زعل : انا بطلع تبون شي ويروح
سيف حس انه زعل: الله يرزقك ياطلال الوظيفه والبنت اللي تبيها
طلال طلع ولقى وليد عند السياره
وليد: والله ان عمرك طويل توني بتصل عليك
طلال معصب: وش رايك نروح ندور وظايف؟
وليد: شسالفة الوظايف اليوم ونسيت اننا قدمنا بس باقي ماجات نتايج القبول
طلال : نروح الاستراحه ؟
وليد: يللا
........................
عند ابو زهر
ابو زهر: قابلت نايف وانس رجعوا العرسان
ام زهر: بخليهم يرتاحون اليوم وبكره نزور دانه وياسمين
زهر اللي تفكر بسيف شهر ماشافته
شهد تشوف طلال من الدريشه كل يوم بما انه يمشي مع ابوها كل ليله
ليان بدأت تيأس انها تعترف لوليد
يارا انشغلت بمشروع التخرج
............
بيت ابو نايف
ام نايف: يابعد روحي وقلبي هلا بعيالي تو مانور البيت
ابو نايف: الحمدلله ع سلامتكم ياعيالي والله اني فقدتكم
نايف يبوس راس امه وابوه: كيفكم وش انتو قاضين
انس يسلم عليهم ويبوس روسهم: عسى مابكيتوا علينا
ابو نايف: طالع امك مقضيتها بكى
انس يضحك: مماعاد بنفارقك بنناشبك
نايف : فديت عيونك يمه لاعاد تبكين
ام نايف : ابوكم يبالغ فقدتكم عيالي بس سعادتكم اهم
ديم : هلا بالعرسان اللي حطوا شهر العسل شهر منجد
انس يضحك: تعالي تعالي اكثر شي اشتقتله هوشاتي معك ويسلم عليها
نايف: هلا بديم ويسلم عليها هاه عسى تاكلين زين وماتعبتي مثل قبل
ديم تضحك: ابشرك مافيني الا العافيه وتطالع انس شكلك انت اللي كنت تسد نفسي
انس: بمشيها لك لان تعبان وابي ارتاح
ام نايف: جهزت لكم الغرف اللي فوق ووليد نزلته بالغرفه اللي تحت عشان دانه وياسمين ياخذون راحتهم
نايف: ليه طلعتي وليد من غرفته كنت بستأجر لي انا ودانه
ام نايف عصبت: مافي تستأجر والبيت كبير وفوق بيكون لدانه واختها مافي احد غريب
نايف: لاتعصبين يمه انا ع بالي تاخذون راحتكم ودانه تاخذ راحتها
ديم: ماعليك دانه طيبه وتحب امي اكيد بترتاح هنا
ام نايف: انا مازوجتك عشان تتركني وتروح ابيك انت وزوجتك معاي
نايف : مابيصير خاطرك الا طيب يمه ويروح غرفته
ديم : يمه لو كلمتيه بشويش توه جاي وبكره وراه دوام
ام نايف ماتكلمت
ابو نايف: ماكأنك تعرفين طبع امك لازم تهاوش
...............
عند ام رامي
رامي: وانا اقول علامه البيت منور اثاري اخواتي رجعوا ويسلم عليهم
دانه: والله ان النور نورك
ياسمين: وحشتني يادكتور
يجي سيف : وين طلال؟
رامي: اكيد يمشي هو ووليد مع عمي فارس
سيف: يمه كنت ابيكم بموضوع
رامي : اجل بطلع انا اغير وارتاح
سيف: عادي اجلس مو موضوع خاص
رامي: والله كنت بنسحب
ام رامي: امرني ياعيون امك وش تبي
سيف: مايامر عليك عدو بس كنت ابي اكلمك تخطبين لي
ياسمين تصرخ: اخيراً ياسيف مابغينا يصير عرس واحد منكم
ام رامي: اصبري علامك خلي اخوك يكمل كلامه ايه ومين تبي ولا ادورلك انا
سيف : ابي زهر بنت خالتي حصه
ام رامي: ويابعد روحي كنت بقولك عنها اصلاً سنع وذرابه
دانه: والله انها تستاهلك وانت تستاهلها الله يتم ع خير
ياسمين: اصبروا يمكن ماتوافق عليه
سيف يعرف انها بتوافق عليه
ام رامي: وليه ماتوافق ولدي شرطي وطول الف بنت تتمناه
ياسمين تضحك : ادري يمه واعرف ان زهر بتوافق بس كل اخواني الف وحده تتمناهم؟
رامي: الله يتمم لك ع خير ياسيف
تطالعه امه : وانت مو ناوي تتزوج وش ناقصك
رامي يبتسم : كلمتك قبل يمه فيه وحده ابيها بس لاجاء الوقت قلت لك ( يقصد ديم) بس هم يفكرونه يقصد وحده معاه بالدوام دكتوره
ام رامي: الله يسعدكم واشوف كل واحد منكم مبسوط وعنده عياله حواليه
سيف: يمه وابي الخطوبة والملكه بنفس اليوم كلمي خالتي عن هالموضوع
دانه تضحك: وش فيك طيب مستعجل زهر ماهي طايره
سيف حس انه جاب العيد: لا اقصد مااقدر كل شوي اخذ اجازة من دوامي ولا نسيتي اني كنت بإجازه
ياسمين: طيب وشفيك خليه حبيت فكرته مالها داعي الخطوبة لو كلهم موافقين يحطون ملكة افضل
يدخل طلال: مساكم الله بالخير
ياسمين: مساك الله بالنور تعال فيه عرس قريب بيصير
طلال متحمس:  مين سيف ولا رامي
ام رامي: سيف وان شاء الله بعدها رامي
طلال: كالعادة انا اخر واحد بكل شي ويضحك
ام رامي: مابتسألني وين بنخطب لاخوك طيب
طلال: اعرف عند خالتي حصه
ام رامي: ماشاء الله طلع الكل يدري ان سيف يبي زهر الا انا
دانه: وانا معك يمه ماادري
طلال يضحك : شنسوي اذا انتم بطيئين فهم
ياسمين تساسره: بس انا اعرف عنك وعن شهد هاه بطيئة فهم ؟
طلال يكح ويشرب مويه
ام رامي :صحه صحه وش قلتي له وشرق بالمويه
سيف: خلاص يمه لاتنسين؟ بطلع انام وراي دوام
ام رامي تطالع الساعه انها 12 بالليل: الوقت تأخر بكره بكلم حصه
سيف يدخل غرفته ويبتسم: اخيراً يازهر بتصيرين ملكي وحلالي ويطالع الكبك اللي اهدته اياه 
رامي يسرح متى يخطب ديم
وطلال يفكر متى يقولهم انه يبي شهد
مر الوقت وليل العاشقين طويل واذن الفجر لا سيف نام ولا طلال
وينزل طلال المطبخ بيسوي له شاهي قبل يروح المسجد وينزل سيف يبي مويه ويتصادفون بالمطبخ
سيف: مانمت للحين؟
طلال يتنهد: ايه والله
سيف: علامك وش تفكر فيه ولا احد قالك كلمه ضايقتك؟
طلال : لا والله بس ابي اتزوج بس ابي وظيفه قبل
سيف: طيب وش صار عالوظايف اللي قدمت عليها ؟
طلال: نصها نعتذر لعدم قبولك والباقي ماردوا للحين
سيف: ماتدري يمكن ربي كاتب لك وظيفه زينه ازين من اللي انرفضت فيها كلها
طلال: الله يسمع منك
ابو رامي : غريبه طلال صاحي وبيصلي الفجر
طلال يطالع سيف: ابوي لازم يكلمني كأني مااصلي
ابو رامي: الله يهديك انا قلت غريبه ماقلت ماتصلي
طلال: اجل بسبقك للمسجد ويطلع
سيف عرف ان طلال متضايق بس ماعرف وش يسوي
ابو رامي: يللا ياسيف نروح المسجد
ويروحون ويصلون الفجر
********************
انتهى البارت ⭐️