جبروت المرآة

النهاية

دخلنا لبيت في صمت ... هزيت بيجاما طويلة سميطات ... و مشيت لدوش بدلت ... خرجت لقيتو متكي لابس غير بوكسور ... و مغمض عينيه... حاط إيديه على راسو ...تخشيت حداه و حطيت راسي على كتفو ...حس بيا و دار عندي خشاني فيه ... طبعت قبلة على خدودو بشكل عفوي ... ابتسم ... ابتسامة خفيفة ...
ج : من اليوم حياتنا بدات من جديد ...
ف : كنتمنى نبقاو ديما هكا مجموعين
ج :إن شاء الله غنبقاو ديما هكا ...
ف :(لوات عليه إيديها ... كتفوه ) ممم فيا النعاس ...
ج : (كيلعب ليها فشعرها ) امم نعسي احبيبتي ...
ترخيت و خليتو كيلعب ... حسيت براحة ... سعادة تغمر قلبي ... ماهي إلا دقائق ... حتى تمكن مني نعاس اما جاد ...فمغمض عينيه حتى تأكد أنها نعسات... غطاها مزيان ... و نعس حتى هو ...
أصبحنا و أصبح الملك لله ...
فقت مدكدكة ...و راه البارح داز طويل ... بغيت نقول داز كولو سفالة 😂 😂 ... شفت فالكبيدة لقيتو ناعس ... جلست فوق من كرشو ... لي مرسومة فيها العضلات سداسية ...
ج :باغة تخنقيني
ف : (ضرباتو لصدرو ) مكتسواش ....
ج :( جرها من كتافها و جابها عندو و عنقها )صباح الخير بعدا
ف : صباح النور ... إمتى غنمشيو لدار ...
ج : مغنمشيوش لدار ...
ف : و فين غنمشيو ...
ج : مفاجأة ...
ف : (جراتو ) نوض نمشيو نوض ...
ج : عهههه صبري غير نلبسو ولا نزلوا هكا
ف : لا لا غا لبس ... حتى انا انلبس ...
توجهت لدوش درت روتين الصباحي ... صليت صلاتي ... و مشيت لماريو ...
ف : شنو نلبس ؟
ج : لبسي شي حاجة مستورة و صافي ...
مجاوبتوش ... هزيت تريكو هابط من الكتاف بيض و ساية حد الركبة فيها وريدات بالحمر ... جمعت شعري بفيليل اللور و خليتو مطلوق ... و درت مكياج خفيف و حمرة .... اما جاد صدرتو لتحت باش ميشوفنيش اش لابسة ... 😈
هبطت عندهم هو غير شافني كحل بالعمى
ف : صباح الخير
الكل : صباح النور ...
أيمن : هاي هاي هاي على تيتيز .... جاد خاصك تزيدنا اخويا فصداق ...
ج : راه نتوما لي خاصكم تزيدوني حيت عاطييني هاد الهبيلة ...
ف : انا هبيلة ... كذاب ...
أيمن : وا كن مكنتش كنعرفك ... كن قلت كذاب 😂 😂
ف : (دارت راسها تقلقات )...
الأب : بعدو ليا من بنتي ...
أيمن :غرت 😂 😂
الأب : إوا الله يمسخك اولدي ...
الكل : كيضحك
فطرنا في جو مرح ... سالينا و جمعت الوقفة ... سلمنا عليهم و خرجنا ... دماغي مبغاش يهدا من تفكير ... زعما أشمن مفاجأة داير ليا ... ركبت فاللوطو اما هو غير مخنزر ... بان ليا سيد شاد طريق المطار ... سكت مدويتوش حتى نوصل و نفهم منوو ... و بالفعل ... موقفنا حتال المطار ...
ف : فين غادين ؟؟؟
ج : باريس
ف :(متحمسة )كتدوي بالصح
ج :لا كنتفلى
ف :(عنقاتو ) شكرا حبيبي
ج : العفو
ف : و لكن مجبتش حوايجي ... و مريم اتبقا راسها ... توحشتها ...
ج : هاهي جاية عندك ...
وقفات طوموبيل سوداء حدانا ... هبطات منها فنيكيشتي ...
مريم : (عنقاتها ) ماماتي زوينة توحشتك
ف : احححح على عسيلة ديالي شحال توحشتها حتى انا ...
مريم : انا فرحانة ... عرفتي علاش
ف : علاش ابنتي
مريم : حيت انمشي نجلس عند جدي و جدا ... حتى تجيو ... و غيبقاو يخرجوني نلعب ... و يشريو ليا حلاوة ...
ف :هههه ياك الشويطينة نتي باغة تاكلي ا الحلاوة ...
م : ههههه اه ...
خرج شوفور باليزاتنا... باينة جمعوهم البنات ... علم الله اش دارو ليا هنا ... ودعت مريم .. و دخلنا لمطار ... درنا الإجراءات الازمة ... و اتجهنا لطائرة ... جلسنا فبلايصنا ... قلبي يرقص من السعادة ... كيف لا و انا كنعيش أفضل أيام حياتي ...و حبيبي بجنبي ...
قلعت الطائرة و أنا حاطة راسي على كتفو ... كم هو جميل الحب كيخليك تحس أنك تمتلك العالم بين يديك ....وصلنا لوجهتنا و دوزنا أسبوع تما ... أسبوع لي غندوز فيه أجمل أيام حياتي ... أسبوع لي ضاربنا فيه شي 20 مرة ... على لباس 😂 و 30 مرة على المكياج و الشعر و لكن منكرش أنه دوزت فيه ذكريات لن تنسى ... رجعنا المغرب ...و جاد خدا فيلا جديدة باش نساو الماضي فخطرة ...و فعلا كانت خطوة جميلة من طرفوا ... لي ساعداتنا أكثر و أكثر ...
بعد سنتين :
ف : (معاقرة مع سنسلة ) عطيني الفولار من فوق الكوافوز ...
ج : (جا من اللور و سدها ليها ) هاكي ...
ف : شكرا حبيبي ...
ج : (كيشوف فيها بإعجاب ) جيتي زوينة بزاف ... منديروش بناقص ؟
ف : اويلي على راجل هبل راه عرس ختك هادا ...
ج :هبلتيني نتي (باس ليها ييدها بكل رقة ) كل نهار كتزيدي تزياني فعيني ... كنحمد الله صباح و ليل حيت رزقني بزوحة بحالك
ف :(حشمانة ) هادشي لي بغيت احبيبي ...و حتى انا كنحمد الله حيت رزقني برجل بحالك كيقدرني و كيعاملني مزيان ...
ج : (باسها فراسها ) كنبغيك ...
ف :كنعشقك
ج :انا انمشي نطل على هدى ... لبسي زيفك دغيا راه تعطلنا ...
ف : اوك ...
درت فولاري على راسي ... و لبست طالوني ...
ف :مريييم بنتي لبستي قفيطينك ...
م : اه لبستو ... ماما ديري لياشوية د العكر ...
ف : هههه هي الأولى يا الكبيدة ... (عكرات ليها )
م :(شافت راسها فمراية ... فرحانة ) يالاه نمشيو قبل ميشوفنا بابا ... و يبدا يضحك علي...
ف : هههه زيدي زيدي
ج : واجدين
ف : واجدين هدى فاقت ... ؟
ج : لا باقة ناعسة ...
ف : صافي يالاه ...
ركبنا فاللوطو ... جاد طريق كاملو هو حاضيني وليت خايفة ايدخلنا فشي حيط ... شفت فزاجة ... و سهيت اه عامين طارت ... انعطيكم خلاصة اش طرا فاش ستقرينا فالفيلا جديدة ... بداو كيبانو علي أعراض الحمل ... و فاش مشييت عند طبيبة لقيت راسي فعلا حاملة ... فرحت و أخيرا انولدوا ثمرة حبنا ... دوزت على جاد مسكين العذاب ... مخليت متشهيت ليه الحلوة مع 3 د الليل ... البابوش مع 2 د الليل ...و لكن عمرو خسر ليا الخاطر ...فالأخير ولدت بينتة و سميتها هدى ...و من بعد ماولدتها درت الحجاب عن قناعة شيئ لي خلا جاد يفرح بزاف ... اما عمر فولا صديق جاد ... و مكيتفارقوش سبحان مبدل الأحوال ... و اليوم عرسوا هو وياسمين ... لي خلاتو يبغيها بطيبتها و عفويتها ... اما ايمن فحتى هو مراتو حاملة و قريب تولد ... فعلا عامين طارت و لكن تبدلوا فيها بزاف د الحوايح ... حبنا انا وجاد غادي و كيكبر ... رغم مشاكيل د الغيرة ... و راسي لي قاصح ... و لكن قدرنا نتغلبو عليهم ... حيت فاش كيكون الحب حاضر بين زوج و بقوة فجميع المشاكيل كيهونوا ... وصلنا للعرس ... طوموبيلات واقفين ... و بنادم ... صداع كيتسمع من بعيد ... الحايحة
ج :(بصرامة ) متشطحيش ...
ف : اوف منك ...
ج : باقي مغتحايد منك هاد القاعيدة ...
ف : هههه باقي ...و مغنحيدهاش ... يالاه زيد ندخلوا راه البنت جالسة اللور ...
ج : (خنزر فيها ) اوك زيدي ...
دخلنا لعرس سلمنا على العائلة ... و جلسنا ...الكبيدة محيدش عينيه حشمني ولد الحرام ... جا بابا و تلاهاو فالهضرة ...بقيت كنشوف فيه ... ملامحو لي تحفروا فذاكرتي فعلا كنبغيه ... و غنبقا نبغيه لآخر نفس فحياتي ...
داز العرس بيخير و دابا وقت الرقصة الأخيرة ... ناضو كاع لي كوبل إلا حنا ... يخ على معقد ...
ج :( بقات فيه العرس كامل و هو رابطها حداه ... مدليها إيديه ) نوضي قبل متفركعي ليا هنا نوضي
ف : (حابسة الضحكة ) حمد الله ملي عقتي ...
نضنا كنشطحوا ... على أنغام الموسيقى الرومانسية ... حاطة راسي على كتفو ... كنسمع دقات قلبو ... هزيت راسي فيه ... و سرحت ففعينيه لي كيقدرو يسلبوني فأي مرة كنشوفهم فيها ... فعلا أنا محظوظة ... كمل العرس و رجعنا لدارنا ... بدلت علي و رضعت بنتي و تكيت ... و هادي غتكون آخر مرة اتشاركوني فيها أفكار ما قبل النوم ... حطيت راسي على الوسادة ... لي هي صدر حبيبي ... لي فوقما كنتكا عليه ... كنحس براحة... تنزاح جميع الهموم و تأتي مكانها طمأنينة ... أخدتني مخيلتي ل فايزة لقديمة و فايزة ديال دابا ... لي ماولاتش هكا كون مدوزاتش عراقيل كثيرة فحياتها ... نتمنى تكونو ستفدتو من قصتي شي حاجة ... عرفتو أن قرايتكم هي لي غتنفعكم فواحد الوقيتة و ضروري غتوقفوا عليها ... أن إلا كنتوا ضريفين بزاف و بدون شخصية كولشي غيركب عليكم...قويوي نفوسكم ... و متخليو حتى حاجة تحبطكم آمنوا بنفسكم و ثيقوا فقدراتكم ... و خليو فبالكم أن حتى حاجة ممستحيلة ... و أن كولشي عند الله قريب ... و أهم شيئ متنمعوش راسكم من الوقوع في الحب ... و متحرموش راسكم من هاد الشعور ... لأنه بالفعل شعور لا مثيل له ...
ج :(سمعها كتنهد ) حبيتي مالك ...
ف : والو ... غير الصهد ...
ج : (حل ليها الريدو و الرجع باسها فوق راسها و حط إيديه على شعرها كيلعب فيه )
إيديه كتمشي و تجي فوق شعري بكل حنان .. بدأ النوم يداعب عيني و آخر صورة فيهم هي صورة نصفي الثاني ... ملاكي لي خلا الحياة وردية فعينيا ... قلبي كيفرفر ... ما أجمل هادا الشعور السامي الملقب بالحب لي كنتمناه لأي فتاة ... لأنكم كاملين كتستحقوا تعيشوه و لو مرة وحدة فحياتكم .... ❤النهاية❤ تعلييقاتكم ❤