ولاد الحومة

48

.#الحلقة_48:
فطيمة جرات لبنتها لقاتها كامل دم وتتوجع ...وتبكي
فطيمة تخلعت : يخاااااه واش هذا الدم ؟
سمير مخلوع مفهم والو شاف ختو تتوجع وتبكي والدم تحتها..معرفش واش يدير
زينب تبكي وتتوجع: ياماما راني نموت ياماما بالستر..
فطيمة مخلوعة: اجري سمير ندوها للسبيطار..اجري خف .
سمير رفد ختو وحطوها فالطونوبيل وداوها ...
طريق كامل زينب تتوجع وتبكي..ويماها مقلقة عليها مفهمتش واش صرالها..
سمير يجري باش يلحق للسبيطار وساعة ساعة يشوف ختو كيفاه راهي غير دم ..
لحقو للسبيطار دخلوها يجرو ..داوها فالشاريو ...
الطبيبة قلبتها وخرجت ليهم..
فطيمة: واش بيها ؟
الطبيبة: طاحلها الطفل لازمها عملية اون ايرجونس نحوهلها .
فطيمة نخلعت : ياربي وكيفاه طاحلها كانت لباس بيها ؟!
الطبيبة: مكتوب ربي الحاجة ادعي لبنتك ضيعت بزااف دم..
وراحت..
فطيمة قعدت وجها صفر وخايفة على بنتها مالعملية هذي وزيد غاضها الطفل لي طاحلها وسوفرات معاه وفلخر مكتبش..
سمير تكا على الحيط استغفر ويشوف في يماه متحيرة..
سمير: نعيط لاحمد نقولو..
فطيمة: ايه عيطلو وخبرو وليدي ..حليلو المخلوق ملقاها من حتى جيه..
سمير: واش راح يدير مكتوب ربي..يصبر واش يدير..
...
خرج لبرا وعيطلو ..
سمير: الو احمد..
احمد كان قاعد فالبحر مقلق يخمم واش يدير ومين يسلف الدراهم ..
خمم حتى يحاول مع ختو باش يحن قلبها وراح ليها اهدر معاها بصح شنفت عليه وقاتلو حقي كيما تدي نتا ندي انا وراجلها وقف معاها وقالو حقها وتديه بالملاحة ولا بالقباحة..

احمد شاف فيها : يعطيك الصحة سميرة..انا لي صرفت عليك وطاح لحمي باش قريتك وزوجتك فلخر تحطيلي الموس في رقبتي..يكثر خيرك وماليوم ماني خوك متعرفيني منعرفك .وكون نشوفك نبدل الطريق .
وخبط الباب وخرج..
راح للبحر يخمم في حل للمشكلة تاعو..ملقاش راسو كامل ..قلق..رجع يستغفر ...مين جا يلمها متلمتش..مرتو من جيه وختو ودارهم من جيه والمصروف والدراهم مكاش من جيهة وحدوخرا..حتى فيقو من غيستو صوت تليفونو
رفدو لقاه سمير
احمد : وي سمير خويا
سمير حس بصوتو عيان معرفش كيفاه يبداه
سمير: وين راك احمد ؟؟
احمد : راني فالبحر قاعد .علاه؟؟
سمير متردد واحمد قلبو وجعو عرف بلي كاينة حاجة ..شك في زينب..
سمير: ارواح للسبيطار..
احمد نخلع وقف يمشي يزرب للطونوبيل ويهدر
احمد_: سبيطار ؟؟ ..واشبيها زينب ؟؟ واش صرالها ؟؟
سمير: تهدن احمد ..مبيها والو ارواح هنا وتفهم..
احمد: هاني جاي ..
وكوبا.
قلع يجري باش يلحق ويدعي في ربي باش زينب ووليدو يكونو بخير وماوهش عارف بلي وليدو مات..
احمد: ياربي ويكونو بخير يااربي..
لحق للسبيطار دخل لقا سمير يستنا فيه برا..راح ليه..
احمد: سمير..واش كاين ؟ واش بيها زينب؟
سمير: زينب طاحلها الطفل...ربي يرحمو
احمد حبس يشوف فيه مخلوع..
احمد: تهدر صح سمير؟؟ وليدي مات ؟؟
سمير: معليش مكتوب ربي..
احمد شد في راسو ومسح على وجهو لي عرق من الصدمة...تنهد..
ونطقها : ان لله وان اليه راجعون ..ان لله وان اليه راجعو...حس قلبو تزير ووجعو على وليدو لي كان يستنى فيه ويحسبلو بالنهار اليوم مات وضاع منو ومكانش يستنا فيها ..
هبطت دمعة من عينو مسحها وشاف في سمير..
احمد: وزينب ؟؟ وين راهي زينب سمير؟؟
سمير: زينب راهي فالبلوك..باش ينحوهلها..وضيعت بزااف دم...ادعيلها خويا احمد..تكون بخير نشالله.
احمد قعد مقدرش يوقف حس روحو مخنوق هموم الدنيا كامل طاحو فوقو ضربة وحدة..معرفش واش يدير ..
تنهد .سمير حاس بيه وفاهمو ووجعو قلبو عليه..كيفاه راه يعاني..
احمد: يااربي مانيش قادر نتحمل ضربة وحدوخرا ..اذا راح تديها اديني قبلها ياربي..اديني قبلها مانيش قادر .
سمير: واش هذي الهدرة احمد..راك راجل شد روحك..وزينب ترجعلنا نشالله..
شاف فيه احمد عينيه مدمعين تاع انسان مدمر.
احمد: احمد تعب سمير خويا تعب بزااف من صغري شاقي..متهنيت لا في صغري لا في كبري..وختي لي طاح لحمي عليها ..خرجتلي عدوة .ااه ياربي ديني قبلها ..ديني قبل زينب ياربي