.#الحلقة_65:
نرجعو لسارة...لي جازت خطبتها بطلوع الروح..الصبح راحت مشطت عند الحفافة وحزينة..
ح: شبيك ختي ماكيش تباني فرحانة ..؟! راح بزوجوك بسيف ؟
سارة تبسمت : لالا ..مقلقة برك..
..
كملت مشطت وماريا معاها فاهمتها..
رجعو للدار استقبلوها بالزغاريت ويسمو عليها..
دخلت لبيتها وغلقت الباب...هي وماريا برك ..وقعدت ساكتة.
ماريا :شبيك سارة..
سارة وقفت شافت فالتاقة طل على سمير مكاشو ..
سارة: بففف.
ماريا : شبيك سارة..
سارة : مكاش والو..
ماريا : تخبي عليا يالبهلولة..تحوسي على سمير..؟!
سارة: ايه مانيش حابة يشوفني ..وكرهت كي زغرتو ..قلت بلاك سمعهم وخرج بصح هو ماهوش هنا ..
ماريا : يا سارة انساي سمير خلاص باك هو قالك روحي وسمح فيك..درك جاي امير خمي فيه..
سارة دمعو عينيها.: مشكلتي مقدرتش ننساه..نحبو ..والله نحبو وتوحشتو..
ماريا تنهدت وقعدت قدامها..
سارة: زعما صح مرجعش يحبني !؟ مشكيتش ..محبتش تدخل راسي..ماريا ياك شفتي واش يدير على جالي وشحال يغير عليا..كيفاه اعطاه قلبو يسمح فيا هاك..حرام عليه..قلبي محروق مقدرتش نامنو..
مريا غاضتها صحبتها تبكي معاها : مكتوب ربي سارة..مكتوب..
سارة: وعلاه يعني المكتوب وقفلي في وجهي هاك..مانيش قادرة نفرح.كيما لبنات..
عنقتها وتبكي.
ماريا : خلاص اسكتي سارة ..توالفي بلعقل..امسحي عينيك ساحلك الكحل..
..
سقمت سارة مكاياج تاعها وماريا تعاون فيها...ريحو شوية وخرجو فطرو..
سارة مقدرتش تاكل ويماها فاهمتها..
..
لحق الظهر سارة في شمبرتها مع مريا واقفة عند التاقة..شافت سمير خرج يلعب مع ياسين ويهدر معاه..
شافتو غلبوها دموعها كانت حابة تعيطلو تقولو علاه سمحت فيا..علااه..
واقفة شوف فيه ودموعها نازلين..يحرقو فيها..
ماريا : سارة اسكتي حنونة راهم جايين درك يلحقو يلقاوك تبكي..
جبدتها من التاقة وهي عينيها عليه..حتى راح..وكلما يبعد وتبع فيه بعينيها تحسو دا روحها معاه..
مريا تسقملها فالمكياج..حتى سمعو زغاريت وصونات تع طونوبيلات..حاجة قليلة خطبة صغيرة برك..سارة محبتش خطبة كبيرة عياو فيها
...
سارة ولات تترعد متوقعتش تتخطب بالطريقة هذي ومن شخص متحبوش...
جات مرت عمها دخلت تزغرت عليها..وسارة تتبسم من فوق قلبها..
..
هبطت معاهم للصالون زغرتو عليها..
قعدت قدام امير وليد عمها لي كلاها بعينيه وهي هابطة ..
سلمت عليهم وقعدت..
وهوما يحكو ويضحكو وهي غايسة حزينة..شوف في مريا لي تتبسملها باش تتبسم..
امير يضحك من عينيه متوقعش تقبل بيه وهي رفضاتو شحال من مرة..
يشوف فيها وهي مشافتش كامل فيه..
قسمو بياس مونتي وزغرتو ...
جبد الخاتم لبسولها وهي مشافتش فيه كامل كلش من فوق قلبها..
امير: مبروك علينا..
سارة: ي..يبارك فيك..
ام امير: الله يبارك كلشي مبروك..
رجعو كامل يبوركو لبعضاهم..
شربو قهوة وراحو ...
سارة طلعت بيتها وماريا راحت..
سارة غلقت بيتها ونحات الخاتم رماتو..
وتبكي مقنوطة...
سارة : نعلبوه زواج هذا ..وخطبة هذي..
جات ختها دخلت لعندها..
نهال : احااي على التبهديل علاه رميتي الخاتم..
سارة: منحتاجوش نهال ..كلش من فوق قلبي..مانيش قادرة نفرح كيما الناس .
نهال : متقنطيش روحك توالفي ختي كلش مع الوقت..
سارة : منقدرش نهال..نحبو مزلت نحبو لسمير..
نهال هبطت راسها : حاسة بيك بصح معندك مديري مكتوبك..حتى انا حبيت واحد بصح هو محبنيش..وتزوج هو درك.وانا مقدرتش ننسا مي مع الوقت والفت راجلي وحبيتو..
سارة: ماشي كيف كيف هو مكانش يحبك..انا نحبو ويحبني ووالفتو ..ربيت عليه الكبدة ..كنت منرقدش بلا منسمع صوتو وكل يوم نشوفو ويشوفني ويظل يهبل فيا..وميحب حتى واحد يدنا ليا....صح كنا نظلو نتناقرو بصح نحبو نموت عليه..علااه سمح فيا علااه وخلاني محروقة هااك..
نهال : هذوهوما الرجال حنونة وسعي خاطرك نشالله امير يعوضك كلش..ديري النية برك .
سارة تمسح في الماكياج وتبكي..
نهال : روحي دوشي وريحي روحك..وكلش مع الوقت يتحل..هذي هي الدنيا..
سارة: نشالله..
دخلت سارة دوشت..
خرجت شافت الخاتم فالباطة تاعو رفاداتو وتنهدت..
خباتو فالخزانة ..وترمات في فراشها تخمم في كامل واش صار ..
...لحق اليل طل من تاقتها بلك شوف سمير مي هو مرجعش ومبانش خبرو..
قعدت في فراشها : ياربي ويكون بخير..
رفدت تليفونها جبدت لابيس تاعو ..غمضت عينيها وكسرتها ..ورماتها ..
وحطت راسها باش ترقد..
حتى شافت الضو تاع طونوبيلتو ضرب في تاقتها ...
غطات ورقدت
أنت تقرأ
ولاد الحومة
General Fictionجيتتتتتكم بعد غيبة طويلة مجيتش بيديا فارغين جبتلكم كرو فوووور من الواقع وطويلة 93 حلقة تحت عنوان " ولاد الحومة "
