ولاد الحومة

44

#الحلقة_44:
غدوة منذاك راحت زينب لدارهم طريق كامل ساكتة
احمد شافها تنهد حبس..
زينب: علاه حبست؟؟
احمد: زينب..علابالي ماشي هذي الحياة لي كنتي متمنيتها..ومام انا مكنتش حاب هاك بصح الله غالب..كون جات بيدي نديرلك واش تحبي ..بصح الله غالب..راكي شوفي الخدمة والمصروف بزااف
زينب: علابالي وانا مقلت والو حابة نريح في دارنا
احمد: معليش ريحي بصح نتوحشك نجي نديك متقوليلي والو .
زينب ساكتة.
احمد تبسم : متتقلقيش درك يرجع عندنا ولد وتتلهاي بيه ونعيشو لباس نشالله ...
زينب: نشالله .بصح راهو عندي الستر بزاف هذا النهارات مفهمتش علااه..
احمد: مقلتيش ؟!
زينب: منعرف..قلت حاجة عادية بصح ساعات مع الشغل كي نخمل ولا نرفد حاجة ثقيلة يبداني الوجع..
احمد: ونتي علاه عليك الثقيل؟
زينب: مالقلق والزعاف ..نولي منعرفش كيفاه نخدم .
احمد: بفف حايدي على روحك..
زينب: تخمم في وليدك متتخممش فيا
احمد: يار** واش هذي الهدرة...علاه مانيش موالف نحوس عليك ولا كيفاه ؟؟
زينب: مم ملي خلق وليدك لاهي غير بيه وتحوس غير عليه..فاهماتك انا..
احمد: اووهوو واشبي جدك ضرك .خلينا لباس مع الصبح..
زينب: هاني ساكتة..
لحقو لدراهم..
ريحت زينب نهارات واحمد لاهي مع الخدمة باش ميجيش للدار بكري ميحبش يجي وميلقاش زينب فيها والف بيها..صح كاين مشاكل بصح مهما كان يحبها وهي مرتو وعارف ماشي غرضها والمشاكل قلقوها ..وهو يساعف ويحاول ينقص قدما يقدر..

جازت عشرة ايام هكاك راح يجيبها..
احمد: صباح الخير خالتي فطيمة
فطيمة: صباح الخير وليدي .جوز ..ادخل..
احمد: يعيشك..زينب وين راهي ؟
فطيمة: راهي في بيتها..ادخل شوفها
احمد راح لعندها ..دقدق ودخل .
شافتو ناضت قعدت..
احمد: اقعدي صباح الخير ريحتي شوي
زينب: والله شوي راهو كل يوم يجيني الستر
احمد: امشي نديك للطبيبة..
زينب: ياك ديتني وقاتلك الطبيبة لازم تحايد على روحها
احمد: ايه عارف..هيا امشي وجدي روحك تروحي معايا
زينب: وين ؟!
احمد: للدار وين يعني ؟!
زينب: نن..احمد راني مريضة منرجعش للدار
احمد: زينوبة ياك جيت ليك وقلتيلي زيد خليني وخليتك ..وهاني رجعت نديك .
زينب: بصح لازمني نريح
احمد: زينب..لوقتاش راح تبقاي هنا؟؟ وزيد منقولك ديريلي والو ..اصلا والفت ناكل برا والحوايج كاين مشينة..حابك ترجعي لدارك..راكي ريحتي .
زينب: منرجعش احمد..
احمد تقلق.: واش هذي الهدرة زينب قالك امشي تروحي
سمعتهم فطيمة يهدرو..تقلقت كل مرة نفس الحكاية .
زينب: قتلك منروحش راني عيانة وزيد المشاكل عندكم مانيش خابة كاشما يصرالي..
احمد: استغفر الله ولا حول ولا قوة الا بالله. صحا نخليك بصح ..لوقتاش راح تقعدي هنا ؟؟
زينب: حتى تلقالي حل
احمد: واش مالحل تهدري عليه ؟!
زينب: نسكن وحدي ونخرج منثم..
احمد: زينب هدرنا وعاودنا الهدرة هذي انسايها
زينب : املا انا ثان انساني
احمد نخلع : وشنو ؟؟ واش قلتي ؟!
زينب : لي سمعتو..
احمد زير على يدو كان راح يضربها وحبس..
احمد: يار** حابة تهبليني ؟! واش راكي تهدري..
دخلت فطيمة
فطيمة: يابنتي وتش هذي الهدرة لي تقوليها لراجلك ؟!
زينب: يما نتوما متفهموش انا مانيش عابشة ثم..راني مخنوقة محاال نرجع نعيش ثم..
فطيمة: يابنتي هذو هوما ديار الناس وش حبيتي
زينب:لالا متشي كامل..نتي علاه نسيمة مرت فاتح خويا متحوسيش عليها كامل ومنخلوش فيها كامل ..عايشة حياتها وانا يعني لازم نسوفري ونتحمل..
فطيمة: يابنتي ماشي كيف كيف..
زينب: لااا كيف كيف وانا هذا قراري..
احمد: معليش ..نتي هدرتي وانا سمعت..
رفد روحو وخرج تلاقا مغ سمير لي سمع كلش ..شد احمد من يدو واحمد نحاهالو خارج مغشش ومدمر كامل
سمير: احمد خويا ريح نتفاهمو.
احمد: خلينا سمير..خليني ...مكان حتى تفاهم..
وخرج