ولاد الحومة

37

#الحلقة_37:
احمد خرج نقلق تلاقا مع سمير برا يتكيف..ويهدر مع سارة..
سمير شافو كوبا وراح ليه قبل ميروح..
سمير: شبيك احمد راك تبانلي مقلق..؟؟
احمد: ياودي ختك راح تهبلني بسيف نسكنها وحدها ..انا الله غالب ضيق وزيد نصرف على الدار معنديش باش نبني مالفوق..
سمير: عارف خويا .ربي يقدرك والمعيشة لي صعابت ..
احمد: كون غير جات في هذي برك والله نخدم اليل مع النهار ونديرلها دارها ماشي خسارة..بصح الله غالب لازم نبقا مع خياتي منقدرش نخليهم ونخلي يما !!
سمير تنهد: واش حبيتني نقولك يا خويا اصبر وهي ضرك تفهمها يما متكسرش راسك ..واذا مفهمتش نفهمها انا ونوريلها العقلية هذي..
احمد: يعيشك خويا سمير بصح خلي يماها تفهمها خير نحبها ترجع برضايتها منسيفش عليها
وركب طونوبيلتو وراح للبحر وقعد ..مقلق حصل واش يدير دارهم من جيه يصرف عليهم خاطر باباهم ميت وبنات ميقدرش يخليهم وزيد مرتو من جيه تقولو محملتش والضيق عليها والمشاكل بزااف..
احمد: وعلااه يا زينب تعرفيني نحبك ومنصبرش عليك راكي ديريلي هاك وتهبلي فيا ..حراام عليك يابنت النااس تعذبيني هااك..
فتح تليفونو عيطلها.
....
زينب رجعت لبيتها ملقاتوش..قعدت تبكي عرفاتو خرج مزعف كيما كل مرة يجي يشوفها..
دخلت يماها شوفها.
فطيمة: يابنتي واش صار شفت راجلك خرج مزعف ...مزال متفاهمتوش .؟!
زينب : ايه قتلو انا منرجعش لثم..محاال خياتو قباح كرهولي حياتي والله ياماما كون جاو عاقلين نعيش معاهم ...بصح هوما يالطيف وميحملونيش ...هو يهدر خاطر مراهوش يشوف وكي يجي يسكتو يخافوه وكي يروح يديرو رايهم فيا..
فطيمة: والله حيرتوني ...يابنتي لازم تصبري وحاولي تفهميه ..
زينب: قتلو يماما قتلو وفهمتو ..بصح يقولي عارف واصبري..
فطيمة: واش راح يقولك ..
زينب: يهدر معاهم ..يفهمهم ميزيدوش يدناو ليا انا مانيش كلبة عندهم ..ينوض ليهم ماشي يشطارلي غير ليا..
فطيمة تنهدت: كي يجي المرة الجاية نفهمو ونهدر معاه وبلاك تتسقم الخالة وترجعي لدارك ...
زينب: ايه قوليلو..ومنرجعش حتى يخلاصلي الوحم..
....
فطيمة خرجت وخلاتها
زينب حطت راسها باش ترقد حتى شافتو عيطلها..محبتش ترفدلو عارفة واش راح يقوللها وهي اصلا تحبو وتزوجو على قصة حب بصح الحب وحدو ميكفيش وخلقو بزااف مشاكل فالوسط
بقا يعيط ويعاود وهي تبكي وتشهق حتى هي توحشاتو بزااف..
مسحت دموعها ورفدتلو..
زينب: ااا...الو.
احمد سمع صوتها ارتاح بصح حسها بلي كانت تبكي..
احمد: وشبيها الزينة تاعي تبكي ؟
زينب رجعت تبكي خاطر مكاش حاجة تاثر فيها قدو خاطر تعرفو يحبها وبلاصتها عندو..
زينب: م..مكاش هاك عارف حالتي
احمد: توحشتك زينوبتي ..والله لا حرام عليك حصلت وش ندير
زينب: الله غالب احمد فهمتك شحال من خطرة
احمد: ومنغيضكش ..قولي..
منغيضكش تخليني وحدي وحاصل ملقيتش حل..
زينب: قتلك شحال من مرة اهدر معاهم فهمهم يخطوني ..نتا ديما تسكتلهم.
احمد : زعما كون نهدر معاهم ترجعي للدار؟؟
زينب: ايه نرجع ..بصح كون يرجعو لطبايعهم والله منرجعها..
احمد تبسم : ممم غدوة نفهمهم
زينب: بصح منرجعش حتى يخلاصلي الوحم..
احمد: اااه يار*** انا نستناك الوقت هذا كامل؟! نجي نديك واذا بقيتي عيانة نرجعك..
زينب: بصح ...
احمد: بصح وااش !!! توحشتك متفهميش نتي ضرك ؟!
زينب: اوك نشالله.
احمد: عندك الحق خاطر علابالك بلي نحبك علاه راك تتقلشي عليا..
زينب: ايه نتقلش عليك ياك راجلي ..وعلمن نتقلش كي منتقلش عليك !!!
احمد: ههه نحبك يا مهبولة ...غدوة ترجع فيا الروح كي نشوفك فالدار عندي ..
زينب: ممم
احمد: وشنو ممم متحبينيش..؟!
زينب: نحبك والله نحبك ..وكون صبت راني معاك ضرك
احمد: نجي نخرجك راه الهوا بارد فالبحر..؟!
زينب فرحت قعدت : صح؟! قول والله؟؟
احمد يضحك: ههههههه وعلاه شحال عندي من زينوبة وجدي روحك راني جاي..
زينب: اععع نحبك نحبك نحبك ..هههه
احمد: هههه انا نموووت عليك